Read Пәймана Ну (Инщил) Йуһʼәнна 17 Bible Online

Йуһʼәнна 17 - Пәймана Ну (Инщил) bible

Йуһʼәнна 17

¹Чахе Иса әв йәкана готьн, бәре Хԝә әʼзменда кьр у гот: «Баво, ԝәхт перʼа гьһиштийә. Кӧрʼе Хԝә рʼумәт кә, ԝәки Кӧрʼ жи Тә рʼумәт кә.

²Тә һʼӧкӧме ль сәр тʼәмамийа мәрьвайе да Ԝи, ԝәки жийина һʼәта-һʼәтайе бьдә һʼәмуйед кӧ Тә данә Ԝи.

³Әв ә жийина һʼәта-һʼәтайе, ԝәки әԝ Тә нас кьн, чаԝа Хԝәдейе рʼасти бешьрики-беһәвал у ӧса жи Иса Мәсиһе кӧ Тә шандийә.

⁴Мьн Тӧ ль сәр рʼуйе әʼрде рʼумәт кьри, әԝ шьхӧле Тә дабу Мьн кӧ Әз бькьм Мьн ани сери.

⁵Баво, бь ԝе рʼумәта Мьнә кӧ һе бәри әʼфьрандьна дьнйайе ль щәм Тә һәбу ньһа Мьн рʼумәт кә ль бәр Хԝә.

⁶Мьн Тӧ ԝан мәрьвава әʼйан кьри, йед кӧ Тә жь дьнйайе данә Мьн. Әԝ йед Тә бун, Тә әԝ данә Мьн у ԝана готьна Тә хԝәй кьр.

⁷Ньһа әԝ иди заньн һәр тьштед кӧ Тә данә Мьн әԝ жь Тә нә.

⁸Әԝ хәбәред кӧ Тә данә Мьн, Мьн жи данә ԝан у ԝана әԝ ԛәбул кьр, әԝе рʼастийе пе һʼәсийан, кӧ Әз жь Тә һатьмә у баԝәр кьрьн кӧ Тә Әз шандьмә.

⁹Әз бона ԝан һиви дькьм. Нә кӧ бона дьнйайе һиви дькьм, ле бона йед кӧ Тә данә Мьн, чьмки әԝ йед Тә нә.

¹⁰Чь кӧ йед Мьн ьн, әԝ йед Тә нә, чь кӧ йед Тә нә, әԝ йед Мьн ьн. У Әз бь ԝан рʼумәткьри мә.

¹¹Ньһа Әз темә щәм Тә, Әз иди нә дьнйайеда мә, ле әԝана дьнйайеда нә. Йа Баве Пироз! Пе ԝи наве Хԝәйи кӧ Тә дайә Мьн ван хԝәй кә[46], ԝәки бьбьн йәк, чаԝа Әз у Тӧ йәк ьн.

¹²Гава Әз тʼәви ԝан бум, Мьн әԝ пе наве Тә хԝәй дькьрьн, пе ԝи наве кӧ Тә дайә Мьн, Мьн хԝәйити ль ԝан кьр. Жь ԝана тʼӧ кәс ӧнда нәбу, пештьри йе мьрьнерʼа дайи, ԝәки ньвисар бе сери.

¹³Ле ньһа Әз темә щәм Тә у ван йәка дьнйайеда дьбежьм, ԝәки шабуна Мьн дьле ԝанда тʼәмам бә.

¹⁴Мьн хәбәра Тә гиһандә ԝан у дьнйа жәнийа ԝан, чьмки әԝ нә жь дьнйайе нә, чаԝа кӧ Әз нә жь дьнйайе мә.

¹⁵Әз һиви накьм кӧ Тӧ ԝана жь дьнйайе һьлди, ле ԝәки Тӧ ԝан жь йе Хьраб хԝәй ки.

¹⁶Әԝ нә жь дьнйайе нә, чаԝа кӧ Әз нә жь дьнйайе мә.

¹⁷Ԝан бь рʼастийа Хԝә бӧһӧрти-жьбарә кә. Хәбәра Тә рʼасти йә.

¹⁸Чаԝа кӧ Тә Әз шандьмә дьнйайе, Мьн жи әԝ шандьнә дьнйайе.

¹⁹Бона ԝан Әз Хԝә бӧһӧрти-жьбарә дькьм, ԝәки әԝ жи бь рʼастийе бӧһӧрти-жьбарә бьн.

²⁰Әз нә тʼәне бона ԝан һиви дькьм, ле бона ԝан жи, йед кӧ бь готьна ԝан ԝе баԝәрийа хԝә Мьн биньн,

²¹ԝәки һʼәму жи бьбьнә йәк. Баво, чаԝа Тӧ нава Мьнда йи у Әз нава Тәда мә, ӧса жи бьра әԝ нава Мәда бьн[47], бь ви аԝайи дьнйайе баԝәр бькә, кӧ Тә Әз шандьмә.

²²Әԝ рʼумәта кӧ Тә да Мьн, Мьн да ԝан, ԝәки әԝ бьбьн йәк, чаԝа Әз у Тӧ йәк ьн:

²³Әз нава ԝанда, Тӧ жи нава Мьнда, ԝәки әԝ тʼьфаԛеда лап гьһишти бьн у дьнйа бьзаньбә кӧ Тә Әз шандьм у ӧса ԝан һʼьз дьки, чаԝа Мьн һʼьз дьки.

²⁴Йа Баво, Әз дьхԝазьм ԝәки йед кӧ Тә данә Мьн, Әз ль кʼӧ бьм, әԝ жи тʼәви Мьн бьн, ԝәки әԝ рʼумәта кӧ Тә дайә Мьн бьбиньн, чьмки һе бәри әʼфьрандьна дьнйайе Тә Әз һʼьз кьрьмә.

²⁵Йа Баве рʼаст! Дьнйа Тә нас накә, ле Әз Тә нас дькьм у әвана жи заньн ԝәки Тә Әз шандьмә.

²⁶Мьн Тӧ ԝанва дайи әʼйанкьрьне у Әзе һе бьдьмә әʼйанкьрьне, ԝәки әԝ һʼьзкьрьна кӧ Тә Әз пе һʼьз кьрьмә нава ԝанда бә у Әз жи нава ԝанда бьм».