Read Пәймана Ну (Инщил) Йуһʼәнна 18 Bible Online

Йуһʼәнна 18 - Пәймана Ну (Инщил) bible

Йуһʼәнна 18

¹Пәй ве хәбәрданерʼа Иса тʼәви шагьртед Хԝә дәрбази ԝи алийе нәԝала Ԛьдроне бу. Ль ԝе дәре бахчәк һәбу, Иса шагьртед Хԝәва кʼәтьне.

²Щьһуда жи йе кӧ ԝе нәмамийа Ԝи бькьра әԝ щи заньбу, чьмки Иса у шагьртед Хԝәва гәләк щара ль ԝе дәре дьщьвийан.

³Аԝа Щьһуда кʼомәкә әскәра у нобәдара хԝәрʼа жь алийе ферьси у сәрәкед кʼаһинада һьлдабу, бь фәнәра, агьр у чʼәка һатә ԝи щийи.

⁴Иса һәр тьшт заньбу кӧ ԝе чь бе сәре Ԝи, пешда чу у ԝанрʼа гот: «Һун ль кʼе дьгәрʼьн?»

⁵Ԝана ле вәгәрʼанд у готьне: «Ль Исайе Ньсрәте!» Иса готә ԝан: «ӘЗ ЬМ». Щьһудайе кӧ нәмамийа Ԝи кьрьбу жи тʼәви ԝан бу.

⁶Гава гот кӧ: «ӘЗ ЬМ[48]!» сәр пьште чун у кʼәтьнә әʼрде.

⁷Һьнге Иса диса жь ԝан пьрси: «Һун ль кʼе дьгәрʼьн?» Ԝан гот: «Исайе Ньсрәте».

⁸Иса ль ԝан вәгәрʼанд у гот: «Мьн ԝәрʼа гот, кӧ Әз ьм. Аԝа һәгәр һун ль Мьн дьгәрʼьн, бьһельн бьра әвана һәрʼьн».

⁹Әв йәк бу ԝәки әԝ хәбәра ԝийә кӧ бәре готьбу рʼаст дәре: «Әԝед кӧ Тә данә Мьн, Мьн жь ԝан тʼӧ кәс ӧнда нәкьр»[49].

¹⁰Һьнге Шьмһʼун-Пәтрус әԝ шуре кӧ перʼа бу кʼьшанд у авитә хӧламе сәрәккʼаһин у гӧһе ԝийи рʼасте пәканд. Наве ԝи хӧлами Малхо бу.

¹¹Иса Пәтрусрʼа гот: «Шур текә ԛаве! Әзе чаԝа ԝе кʼаса кӧ Баве дайә Мьн вәнәхԝьм?»

¹²Пәй ве йәкерʼа кʼома әскәра у сәрдаре ԝан у нобәдаред щьһуйа Иса гьртьн у гьредан.

¹³Пешийе Әԝ бьрьнә щәм Һәнане хәзуре Ԛәйафа. Ԛәйафа сәрәккʼаһине ԝе сале бу.

¹⁴Әва әԝ Ԛәйафа бу, йе кӧ щьһу ширәт кьрьбун у готьбу: «Һе рʼьнд ә, бьра йәк бона щьмәʼте бьмьрә».

¹⁵Шьмһʼун-Пәтрус у шагьртәки дьн пәй Иса дьчун. Әԝ шагьрт кӧ насе сәрәккʼаһин бу, тʼәви Иса кʼәтә һʼәԝша сәрәккʼаһин,

¹⁶ле Пәтрус дәрва ль бәр дери сәкьни. Паше әԝ шагьрте насе сәрәккʼаһин дәркʼәт у тʼәви дәргәһване хәбәр да, Пәтрус бьрә һьндӧрʼ.

¹⁷Һьнге ԝе щарийа дәргәһван жь Пәтрус пьрси: «Дьбә кӧ тӧ жи жь шагьртед Ви мәрьви йи?» Пәтрус готе: «На, әз ниньм».

¹⁸Ԝи чахи, һәԝа кӧ сар бу, хӧлам у нобәдара пе кʼомьре агьр вехьстьбун, сәкьнибун у хԝә гәрм дькьрьн. Пәтрус жи ль щәм ԝан сәкьнибу, хԝә гәрм дькьр.

¹⁹Һьнге сәрәккʼаһин жь Иса дәрһәԛа шагьртед Ԝи у һинкьрьна Ԝида пьрси.

²⁰Иса щаб да у гот: «Мьн дьнйайерʼа ашкәрә хәбәр дайә, һәр гав кʼьништада ӧса жи пʼарьстгәһеда, кʼидәре кӧ һʼәму щьһу дьщьвийан һин дькьрьн. Мьн тʼӧ тьшт дьзива нәготийә.

²¹Тӧ чьма жь Мьн дьпьрси? Жь йед кӧ бьһистьнә бьпьрсә, кʼа Мьн ԝанрʼа чь готийә. Әԝ заньн Мьн чь готийә».

²²Гава Иса әв йәк гот, нобәдарәки ль ԝьр сәкьни шәмаԛәк ль Ԝи хьст у гот: «Тӧ чаԝа щаба сәрәккʼаһин дьди?»

²³Иса ле вәгәрʼанд у готе: «Һәгәр Мьн хьраб хәбәр да, хьрабийа Мьн бежә. Ле һәгәр Әз рʼаст дьбежьм, тӧ чьма Мьн дьхи?»

²⁴Һьнге Һәнан Әԝ гьредайи шандә щәм Ԛәйафайе сәрәккʼаһин.

²⁵Шьмһʼун-Пәтрус һе ль ԝьр сәкьни хԝә гәрм дькьр. Жь ԝи пьрсин: «Дьбә кӧ тӧ жи жь шагьртед Ԝи йи?» Әԝи инкʼар кьр у гот: «На, әз ниньм».

²⁶Хӧламәки сәрәккʼаһин, жь хԝәхатийа ԝи, йе кӧ Пәтрус гӧһе ԝи пәкандьбу, же пьрси: «Нә бахчәда мьн тӧ тʼәви Ԝи дити?»

²⁷Һьнге Пәтрус диса инкʼар кьр у ԝе дәме дик банг да.

²⁸Ԝи чахи Иса жь щәм Ԛәйафа бьрьнә ԛәсьра ԝәли. Сәре сьбәһе зу бу у щьһу нәкʼәтьнә ԛәсьре, ԝәки хԝә ль гора әʼдәтед шуштьн-вәшуштьне нәһʼәрʼьминьн, кӧ бькарьбьн хԝарьна Щәжьна Дәрбазбуне бьхԝьн.

²⁹Һьнге Пилато дәркʼәтә дәрва, һатә щәм ԝан у пьрси: «Һун Ви мәрьви чьда нәһәԛ дькьн?»

³⁰Ԝана ле вәгәрʼанд у готьне: «Һәгәр Әԝ нә йәки зӧлмкʼар буйа, мә Әԝ нәдьда дәсте тә».

³¹Һьнге Пилато ԝанрʼа гот: «Һане һун хԝәха Ви бьбьн у ль анәгори ԛануна хԝә диԝана Ԝи бькьн». Щьһуйа ле вәгәрʼанд у готьне: «Изьна мә тʼӧнә кӧ әм тʼӧ кәси бькӧжьн».

³²Әв йәка бу, кӧ әԝ готьна Иса бе сери, кӧ дабу фәʼмкьрьне, Әԝе чаԝа бьмьрә.

³³Һьнге Пилато диса кʼәтә ԛәсьра ԝәли, гази Иса кьр у же пьрси: «Тӧ йи Пʼадше щьһуйа?»

³⁴Иса ле вәгәрʼанд у готе: «Тӧ ве йәке хԝәха дьбежи, йан һьнәкед дьн бона Мьн тәрʼа готьнә?»

³⁵Пилато гот: «Чьма әз щьһу мә? Мьләте Тә у сәрәкед кʼаһина Тӧ данә дәсте мьн. Тә чь кьрийә?»

³⁶Иса щаб да у гот: «Пʼадшатийа Мьн нә жь ве дьнйайе йә. Һәгәр пʼадшатийа Мьн жь ве дьнйайе буйа, бәрдәстийед Мьне шәрʼ кьрана кӧ Әз нәкʼәтама дәсте щьһуйа. Ле пʼадшатийа Мьн нә жь ве дьнйайе йә».

³⁷Һьнге Пилато жерʼа гот: «Ԝәки ӧса йә Тӧ пʼадша йи?» Иса щаб да у гот: «Тӧ хԝәха дьбежи Мьн кӧ: ‹Тӧ пʼадша йи›. Әз бона ве йәке бумә у бона ве йәке һатьмә дьнйайе, ԝәки бона рʼастийе шәʼдәтийе бьдьм. Һәр кәсе кӧ жь алийе рʼастийе йә, гӧһ дьдә дәнге Мьн».

³⁸Пилато же пьрси: «Рʼасти чь йә?» Пәй ве пьрсерʼа, Пилато диса дәркʼәтә дәрва щәм щьһуйа у ԝанрʼа гот: «Әз тʼӧ нәһәԛийе Вида набиньм.

³⁹Ле әв әʼдәте ԝә йә кӧ әз Щәжьна Дәрбазбунеда йәки гьрти бона ԝә бәрʼдьм. Һун дьхԝазьн кӧ әз бона ԝә Пʼадше щьһуйа бәрʼдьм?»

⁴⁰Һьнге ԝан һе кьрә ԛирʼин, готьн: «Нә кӧ Ви мәрьви, ле Барабас бәрʼдә!» Барабас жи ԛачахәк бу.