Read Пәймана Ну (Инщил) Йуһʼәнна 19 Bible Online

Йуһʼәнна 19 - Пәймана Ну (Инщил) bible

Йуһʼәнна 19

²Әскәра жи тʼащәк жь стьрийа вәгьртьн у данә сәре Ԝи у чӧхәки ширк ль Ԝи кьрьн.

³Ль бәр Ԝи дьсәкьнин у дьготьн: «Хԝәш бә, Пʼадше щьһуйа!» У шәмаԛ ль Ԝи дьхьстьн.

⁴Пилато диса дәркʼәтә дәрва у ԝанрʼа гот: «Ва йә ньһа әз Ԝи тиньмә дәрва щәм ԝә, ԝәки һун бьзаньбьн кӧ мьн тʼӧ сущ Ԝида нәдитийә».

⁵Һьнге Иса тʼаще стьри ль сери у чӧхе ширк ле дәркʼәтә дәрва. Пилато ԝанрʼа гот: «Ва йә Әԝ мәрьва!»

⁶Гава сәрәкед кʼаһина у нобәдара Әԝ дит, кьрьнә ԛирʼин у готьн: «Ԝи хач кә, Ԝи хач кә!» Пилато ԝанрʼа гот: «Һун Ԝи бьбьн хач кьн. Әз хԝәха тʼӧ сущи Ԝида набиньм».

⁷Щьһуйа ле вәгәрʼанд у готьне: «Ԛанунәкә мә һәйә у анәгори ԝе ԛануне[50] гәрәке Әԝ бе кӧштьне, чьмки Ԝи Хԝә Кӧрʼе Хԝәде һʼәсаб кьр».

⁸Гава Пилато әв йәк бьһист, һе тьрс кʼәтә сәр.

⁹Әԝ диса чу һьндӧрʼе ԛәсьра ԝәли у Исарʼа гот: «Тӧ жь кʼӧ йи?» Ле Иса щаба ԝи нәда.

¹⁰Пилато готә Ԝи: «Тӧ тʼәви мьн хәбәр нади? Тӧ ньзани кӧ һʼӧкӧме мьн һәйә әз Тә бәрʼдьм у һʼӧкӧме мьн һәйә Тә бьдьмә хачкьрьне?»

¹¹Иса ле вәгәрʼанд у готе: «Һәгәр жь жор тәрʼа нәһата дайине, тʼӧ һʼӧкӧме тә ԝе ль сәр Мьн тʼӧнәбуйа. Ләма гӧне ԝи, йе кӧ Әз дамә дәсте тә һе мәзьн ә».

¹²Пәй ԝе йәкерʼа Пилато дькьр кӧ Иса бәрʼда, ле щьһуйа кьрә ԛирʼин у готьн: «Һәгәр тӧ Ви мәрьви бәрʼди, тӧ нә досте Ԛәйсәр и! Һәр кәсе кӧ хԝә пʼадша һʼәсаб дькә, әԝ нәйаре Ԛәйсәр ә!»

¹³Гава Пилато әв йәк бьһист, Иса дәрхьстә дәрва у әԝ ль һәрәма диԝане рʼуньшт, ԝи щийе кӧ жерʼа дьготьн «Сәле Кәвьри», бь ибрани Габата.

¹⁴Рʼожа тʼьвдарәккьрьна Щәжьна Дәрбазбуне бу, нивро незики сьһʼәта донздәһа Пилато щьһуйарʼа гот: «Ва йә Пʼадше ԝә!»

¹⁵Ле ԝана кьрә ԛирʼин: «Ԝи бьбә, Ԝи бьбә! Ԝи хач кә!» Пилато ԝанрʼа гот: «Пʼадше ԝә хач кьм?» Сәрәкед кʼаһина ле вәгәрʼандьн: «Пештьри Ԛәйсәр пʼадшаки дьн бона мә тʼӧнә!»

¹⁶Һьнге әԝи Иса да дәсте ԝан, ԝәки бе хачкьрьне. Ԝан Иса һьлда бьрьн.

¹⁷Иса Хԝәха хаче Хԝә һьлда у дәркʼәтә ԝи щийе кӧ жерʼа дьбежьн «Щийе Ԛаф», бь ибрани «Голгота».

¹⁸Ль ԝе дәре Әԝ тʼәви дӧ мәрьвед дьн хач кьрьн, һәр йәк ль кʼеләкәке, Иса нава ԝанда бу.

¹⁹Пилато тʼәхтәк жи ньвиси у феза хаче хьст, кӧ аһа ньвисар бу: «ИСАЙЕ НЬСРӘТЕ, ПʼАДШЕ ЩЬҺУЙА».

²⁰Гәләк щьһуйа әв ньвисара сәр тʼәхтә хԝәндьн, чьмки әԝ щийе кӧ Иса ле һатьбу хачкьрьне незики бажер бу у бь ибрани, латини у йунани һатьбу ньвисаре.

²¹Сәрәкед кʼаһинед щьһуйа Пилаторʼа готьн: «Нәньвисә ‹Пʼадше щьһуйа›! Ле бьньвисә кӧ ‹Ԝи гот: Әз Пʼадше щьһуйа мә›».

²²Пилато гот: «Мьн чь ньвиси, ньвиси».

²³Гава әскәра Иса хач кьрьн, кʼьнщед Ԝи һьлдан, кьрьнә чар пʼара, һәр йәкирʼа пʼарәк. Ле кʼьнща Ԝийә сәр жи һәбу, кӧ жь сери һʼәта бьни һунанди у бедьрун бу.

²⁴Һьнге һәвдӧрʼа готьн: «Ԝәрьн әм ви нәԛәлешьн, әм пʼәшк бавежьн, кʼа ԝе кʼерʼа бькʼәвә». Әв йәк бу, ԝәки ньвисар бе сери: «Кʼьнщед Мьн нав хԝәда пʼарәвәкьрьн у сәр пʼоте Мьн пʼәшк авитьн»[51]. Әскәра жи һәма әв йәк кьр.

²⁵Ль бәр хаче Иса дийа Ԝи, хатийа Ԝи, Мәрйәма жьна Клопас у Мәрйәма Мәждәлани сәкьни бун.

²⁶Иса кӧ дийа Хԝә у әԝ шагьрте кӧ Ԝи же һʼьз дькьр ль ԝе дәре сәкьни дитьн, дийа Хԝәрʼа гот: «Әʼвде! Ва йә кӧрʼе тә!»

²⁷Паше готә шагьрт: «Ва йә дийа тә!» Жь һьнгева әви шагьрти әԝ бьрә мала хԝә.

²⁸Пәй ве йәкерʼа Иса заньбу һәр тьштед кӧ ԝе бьбуна иди ԛәԝьмин, һьнге Ԝи гот: «Әз тʼи мә», ԝәки ньвисар бе сери.

²⁹Ль ԝьр фьраԛәкә сьркева дагьрти һәбу. Ԝана луфька бәʼре сьркеда кьр, сәре дарька зохева данин у дьрежи бәр дәве Ԝи кьрьн.

³⁰Гава кӧ Иса сьркә вәхԝар, гот: «Тʼәмам ԛәԝьми!» Сәре Хԝә бәржер кьр у рʼӧһʼе Хԝә да.

³¹Әв йәк кӧ рʼожа тʼьвдарәккьрьнеда ԛәԝьми, щьһуйа нәдьхԝәст ԝәки щьнйаз ль сәр хаче бьмана, чьмки әԝ шәми бона ԝана рʼожәкә гәләк әʼзиз бу. Ԝана жь Пилато һиви кьр, ԝәки һәстуйед рʼәʼнед хачбуйийа бенә шкенандьне у жь ԝьр бенә һьлдане.

³²Һьнге әскәр һатьн, пешийе һәстуйед рʼәʼнед йәки шкенандьн у пәйрʼа рʼәʼнед йе дьн, кӧ тʼәви ԝи һатьбу хачкьрьне.

³³Ле гава кӧ әԝ незики Иса бун у дитьн кӧ Әԝ иди мьрийә, ԝана һәстуйед рʼәʼнед Ԝи нәшкенандьн.

³⁴Ле диса жь әскәра йәки рʼьм нәкʼса Ԝирʼа кьр у перʼа-перʼа ав у хуне авит.

³⁵Йе кӧ әв йәк дит шәʼдәти да, ԝәки һун жи баԝәр бькьн. Шәʼдәтийа ԝи рʼаст ә у әԝ занә кӧ рʼастийе дьбежә.

³⁶Әв йәка ԛәԝьми, ԝәки әԝ ньвисар бе сери: «Тʼӧ һәстуйе Ԝи ԝе нәйе шкенандьне»[52].

³⁷Ньвисарәкә дьн жи аһа дьбежә: «Әԝе ль Ԝи бьньһерʼьн, нәкʼса кʼижани ԛӧл кьрьн»[53].

³⁸Пәй ве йәкерʼа, Усьве жь Аримәтйайе кӧ шагьрте Иса бу, ле жь тьрса щьһуйа хԝә әʼйан нәдькьр, һиви жь Пилато кьр кӧ щьнйазе Иса жь хаче пәйа кә у Пилато изьн дайе. Һьнге әԝ чу щьнйазе Иса жь хаче пәйа кьр.

³⁹Никодемо жи тʼәви ԝи һат, йе кӧ пешда шәв һатьбу щәм Иса, незики си килограм[54] уд у зьмьр тʼәвһәвкьри ани.

⁴⁰Щьнйазе Иса һьлдан, ль анәгори әʼдәте дәфьнкьрьна щьһуйа, бьһарәт ле дан у Әԝ ԛәдәке кʼьтанида кʼәфән кьрьн.

⁴¹Ль ԝи щийе кӧ Иса ле һатьбу хачкьрьне бахчәк һәбу у ԝи бахчәйида жи тʼьрбәкә ну һәбу кӧ һе тʼӧ кәс теда нәһатьбу данине.

⁴²Иса кьрьнә ԝе тʼьрбе, чьмки рʼожа тʼьвдарәккьрьна щьһуйа бу, тʼьрб жи незик бу.