Read Пәймана Ну (Инщил) Йуһʼәнна 2 Bible Online

Йуһʼәнна 2 - Пәймана Ну (Инщил) bible

Йуһʼәнна 2

¹Дӧ рʼожа шунда бажаре Ԛанайа Щәлиледа дәʼԝатәк һәбу. Дийа Иса жи ль ԝе дәре бу,

²Иса у шагьртед Ԝи жи бона дәʼԝате һатьбунә тʼәглифкьрьне.

³Гава кемаси кʼәтә шәраве, дийа Иса жерʼа гот: «Шәрава ԝан нәма».

⁴Иса ле вәгәрʼанд у готе: «Әʼвде, чи тә Мьн кʼәтийә? Һе нә ԝәхте Мьн ә».

⁵Дийа Ԝи бәрдәстийарʼа гот: «Чь кӧ ԝәрʼа бежә, бькьн».

⁶У шәш кʼупед кәвьри һәбун, кӧ ль гора әʼдәтед щьһуйа бона шуштьн-вәшуштьна ԝана ль ԝьр данибун. Жь ԝана һәр йәки жь һʼәйште һʼәта сәд бист литьр ав һьлдьда.

⁷Иса ԝанрʼа гот: «Ван кʼупа тʼьжи ав кьн». У ԝана жи леварʼа дагьрт.

⁸Паше ԝанарʼа гот: «Ньһа һьнәки дагьрьн, бьбьн бьдьнә сәрдәʼԝати». Әԝана жи әԝ бьр.

⁹Гава сәрдәʼԝати жь ԝе ава кӧ бьбу шәрав тәʼм кьр, ԝи те дәрнәхьст кӧ әԝ жь кʼӧ һат, ле бәрдәстийед кӧ ав кʼьшандьбун заньбун. Сәрдәʼԝати гази зәʼве кьр

¹⁰у жерʼа гот: «Һәр кәс пешийе шәрава хԝәйә рʼьнд датинә сәр тʼәхтә у паше гава вәхԝари нә, әԝ йа нәрʼьнд дәрдьхә. Ле тә шәрава рʼьнд һʼәта ньһа хԝәй кьрийә».

¹¹Әва нишана Исайә пешьн бу, кӧ Ԝи Ԛанайа Щәлиледа кьр. Бь ви аԝайи Әԝи рʼумәта Хԝә да хӧйакьрьне у шагьртед Ԝи баԝәрийа хԝә Ԝи анин.

¹²Пәй ве йәкерʼа, Иса тʼәви дийа Хԝә, бьред Хԝә у шагьртед Хԝә чу Кәфәрнаһуме, ле гәләк рʼожа Әԝ ль ԝе дәре нәман.

¹³Щәжьна щьһуйайә Дәрбазбуне незик бу, Иса һәвраз чу Оршәлиме.

¹⁴Пʼарьстгәһеда Әԝи йед кӧ дәԝар, пәз у кәвотк дьфьротьн, ӧса жи йед пʼәрәгӧһерʼ рʼуньшти дитьн.

¹⁵Дә ижар Ԝи жь бәна ԛамчик чекьр, һʼәму жь пʼарьстгәһе пәз у дәԝаред ԝанва дәрхьстьн, пʼәред пʼәрәгӧһерʼа рʼетьн у тʼәхтед ԝан ԝәлгәрʼандьн.

¹⁶Кәвоткфьрошарʼа гот: «Вана жь ве дәре һьлдьн! Иди мала Баве Мьн нәкьнә базаргәһ!»

¹⁷Һатә бира шагьртед Ԝи кӧ аһа һатийә ньвисаре: «Хирәта һьндава мала Тәда агьр Мьн дьхә»[8].

¹⁸Һьнге щьһуйа же пьрси: «Те чь нишане нишани мә ки, кӧ һʼӧкӧме Тә һәйә ван тьшта бьки?»

¹⁹Иса ль ԝан вәгәрʼанд у гот: «Ве пʼарьстгәһе һьлшиньн, Әзе нава се рʼожада рʼакьм».

²⁰Һьнге щьһуйа жерʼа гот: «Нава чьл шәш салада әва пʼарьстгәһа һатийә чекьрьне. Чаԝа Те ԝе нава се рʼожада рʼаки?»

²¹Ле Иса дәрһәԛа пʼарьстгәһа бәдәна Хԝәда хәбәр дьда.

²²Пәйрʼа гава Әԝ жь мьрьне рʼабу, шагьрта әԝ готьна Ԝи ани бира хԝә у ԝана әԝ ньвисар у готьна Иса баԝәр кьрьн.

²³Аԝа гава кӧ Иса Щәжьна Дәрбазбунеда ль Оршәлиме бу, гәләка әԝ нишанед кӧ Ԝи дькьрьн дитьн, баԝәрийа хԝә наве Ԝи анин.

²⁴Ле Иса баԝәрийа Хԝә ль ԝан нәдани, чьмки дьле һʼәму мәрьва Ԝива әʼйан бу.

²⁵Нә һʼәԝщә бу, кӧ йәки һьндава мәрьвәкида шәʼдәти бьда, чьмки Ԝи дьле мәрьва заньбу.