Read Пәймана Ну (Инщил) Йуһʼәнна 20 Bible Online

Йуһʼәнна 20 - Пәймана Ну (Инщил) bible

Йуһʼәнна 20

¹Рʼожа йәкшәме[55], ԛәрәбәрбанга сьбәһе зу, Мәрйәма Мәждәлани чу сәр тʼьрбе. Дина хԝә дайе, ԝе кәвьр жь бәр дәре тʼьрбе ԝеда кьри йә.

²Дәстхԝәда рʼәви чу щәм Шьмһʼун-Пәтрус у ԝи шагьрте дьн, йе кӧ Иса же һʼьз дькьр у ԝанрʼа гот: «Хӧдан жь тʼьрбе дәрхьстьнә у әм ньзаньн кӧ Әԝ данинә кʼӧ дәре!»

³Һәма һьнге Пәтрус у шагьрте дьн дәркʼәтьнә дәрва у бәрбь тʼьрбе чун.

⁴Һәр дӧ жи һәврʼа дьрʼәвийан, ле шагьрте дьн жь Пәтрус зутьр дьрʼәвийа у әԝ пешийа ԝи гьһиштә сәр тʼьрбе.

⁵Ԝи хԝә ԛуз кьр у дина хԝә дайе, ԝе кʼәфән ль ԝьр ә, ле хԝәха нәкʼәтә һьндӧрʼ.

⁶Һьнге Шьмһʼун-Пәтрус кӧ пәй ԝи дьһат гьһиште, кʼәтә һьндӧрʼе тʼьрбе, дина хԝә дайе, ԝе кʼәфән ль ԝьр ә

⁷у дәстмала сери нә тʼәви кʼәфән бу, ле ԛаткьри алики дани бу.

⁸Паше шагьрте дьн жи кʼәтә һьндӧрʼ, йе кӧ пешийе гьһиштьбу сәр тʼьрбе. Әԝи дит у баԝәр кьр.

⁹Ԝан һе ньвисар фәʼм нәкьрьбу, кӧ гәрәке Иса жь мьрьне рʼабуйа.

¹⁰Пәй ве йәкерʼа шагьрт вәгәрʼийанә щийед хԝә.

¹¹Ле Мәрйәм жь тʼьрбе дәр сәкьнибу у дьгьрийа. Ԝе бь гьри хԝә ԛуз кьр у ль һьндӧрʼе тʼьрбе ньһерʼи,

¹²һьнге дина хԝә дайе, ԝе дӧ мьлйакʼәтед кʼьнщсьпи, ль ԝи щийе кӧ щьнйазе Иса ле данибу рʼуньштьнә, йәк бәрсәрийе у йе дьн бьнпʼийе.

¹³Мьлйакʼәта ԝерʼа гот: «Әʼвде! Тӧ чьма дьгьрийи?» Мәрйәме гот: «Хӧдане мьн һьлданә у әз ньзаньм Әԝ данинә кʼӧ дәре».

¹⁴Гава әԝе әв йәк гот, ль пьшт хԝәва вәгәрʼийа у дит кӧ Иса ль ԝе дәре сәкьнийә, ле ԝе ньзаньбу кӧ әԝ Иса йә.

¹⁵Иса готә ԝе: «Әʼвде, тӧ чьма дьгьрийи? Тӧ ль кʼе дьгәрʼи?» Мәрйәме тʼьре ԛәй әԝ рʼәзван ә, әԝе готе: «Әз хӧлам, һәгәр тә Әԝ һьлдайә, мьнрʼа бежә тә Әԝ данийә кʼӧ дәре, ԝәки әз Ԝи жь ԝе дәре һьлдьм».

¹⁶Иса готе: «Мәрйәм!» Мәрйәме бәре хԝә да Ԝи у бь ибрани готе: «Рʼаббони!» кӧ те фәʼмкьрьне: «Дәрсдар».

¹⁷Иса готә ԝе: «Мьн нәгьрә, чьмки Әз һе рʼанәбумә щәм Баве. Ле һәрʼә щәм бьред Мьн у ԝанрʼа бежә. ‹Әзе рʼабьмә щәм Баве Хԝә у щәм Баве ԝә, щәм Хԝәдейе Хԝә у щәм Хԝәдейе ԝә›».

¹⁸Мәрйәма Мәждәлани чу щәм шагьрта у ԝанрʼа гот: «Мьн Хӧдан дит» у тьштед кӧ Иса ԝерʼа готьбу ԝанрʼа гьли кьр.

¹⁹Хут ԝе еваре, рʼожа йәкшәме, гава шагьрт щьвийайи бун, жь тьрса щьһуйа жи дәри ль сәр ԝан дадайи бун, һьнге Иса һат нава ԝанда сәкьни у ԝанрʼа гот: «Әʼдьлайи ԝәрʼа».

²⁰Әв тьшт гот, дәст у нәкʼса Хԝә нишани ԝан кьрьн. Һьнге шагьрт гәләки ша бун, гава кӧ Хӧдан дитьн.

²¹Паше Иса диса ԝанрʼа гот: «Әʼдьлайи ԝәрʼа. Чаԝа кӧ Баве Әз шандьм, ӧса жи Әз ԝә дьшиньм».

²²Әв йәк кӧ гот, пʼьфи сәр ԝан кьр у ԝанрʼа гот: «Һане Рʼӧһʼе Пироз бьстиньн.

²³Һун гӧнед кʼе бьбахшиньн, әԝе бенә бахшандьне, гӧнед кʼе нәбахшиньн, әԝе нәйнә бахшандьне».

²⁴Тʼумайе йәки жь һәр донздәһа, кӧ жерʼа «Һәвал-щеԝи» дьготьн, нә тʼәви ԝан бу гава кӧ Иса һат.

²⁵Һьнге шагьртед майин ԝирʼа готьн: «Мә Хӧдан дит». Әԝи ԝанрʼа гот: «Һʼәта кӧ әз дәԝса мьха дәстед Ԝида нәбиньм, тʼьлийа хԝә нәдьмә сәр дәԝса мьха у дәсте хԝә жи нәкьмә нәкʼса Ԝи, әз тʼӧ щар баԝәр накьм».

²⁶Пәй һʼәйшт рʼожарʼа, шагьртед Иса диса малда бун у Тʼума жи тʼәви ԝан бу. Дәри дадайи бун, ле Иса һат, нава ԝанда сәкьни у гот: «Әʼдьлайи ԝәрʼа».

²⁷Паше Тʼумарʼа гот: «Тʼьлийа хԝә бинә вьр у дәстед Мьн бьньһерʼә, дәсте хԝә жи бинә у бькә нәкʼса Мьн. Нәбаԝәрийе нәкә, ле баԝәр бькә!»

²⁸Тʼума ле вәгәрʼанд у готе: «Хӧдане мьн у Хԝәдейе мьн!»

²⁹Иса готә ԝи: «Тә Әз дитьм ләма баԝәр кьр? Хԝәзи ль ԝан, йед кӧ нәдитьнә, ле баԝәр дькьн!»

³⁰Иса ль бәр шагьртед Хԝә һе гәләк нишанед дьн жи кьрьн, кӧ ве кʼьтебеда нәһатьнә ньвисаре.

³¹Ле бәле әв һатьнә ньвисаре, ԝәки һун баԝәр бькьн, кӧ Иса йә Мәсиһ, Кӧрʼе Хԝәде у бь ве баԝәрийа пе наве Ԝи жийина ԝә һәбә.