Read Пәймана Ну (Инщил) Йуһʼәнна 3 Bible Online

Йуһʼәнна 3 - Пәймана Ну (Инщил) bible

Йуһʼәнна 3

¹Жь ферьсийа мәрьвәк һәбу, наве ԝи Никодемо, кӧ сәрәкәки щьһуйа бу.

²Әва шәв һатә щәм Иса у жерʼа гот: «Мамоста, әм заньн кӧ Тӧ жь Хԝәдеда чаԝа дәрсдар һатийи, чьмки әԝ нишанед кӧ Тӧ дьки, һәгәр Хԝәде нә перʼа бә, тʼӧ кәс нькарә бькә».

³Иса ле вәгәрʼанд у готе: «Әз рʼаст бе хельф тәрʼа дьбежьм, һәгәр мәрьвәк диса ну нәбә[9], әԝ нькарә Пʼадшатийа Хԝәде бьбинә».

⁴Никодемо же пьрси: «Мәрьв кӧ иди мәзьн буйә, әԝ чаԝа дькарә диса ну бьбә? Ԛәт дьбә кӧ әԝ щарәкә дьн бькʼәвә зьке дийа хԝә у жь дийа хԝә диса бьбә?»

⁵Иса ле вәгәрʼанд у готе: «Әз рʼаст бе хельф тәрʼа дьбежьм, һʼәта кӧ мәрьв жь аве у Рʼӧһʼ нәбә, әԝ нькарә бькʼәвә Пʼадшатийа Хԝәде.

⁶Йе кӧ жь бәдәне дьбә бәдән ә, йе кӧ жь Рʼӧһʼ дьбә рʼӧһʼ ә.

⁷Тӧ әʼщебмайи нәминә кӧ Мьн тәрʼа гот: Гәрәке һун диса ну бьбьн[10].

⁸Ба[11] ль кʼӧ дәре дьхԝазә рʼадьбә. Тӧ дәнге ԝи дьбьһейи, ле ньзани әԝ жь кʼӧ те у кʼӧда дьчә. Һәр кәсе кӧ жь Рʼӧһʼ* дьбә жи ӧса йә».

⁹Никодемо же пьрси: «Әԝ чаԝа дьбә?»

¹⁰Иса ле вәгәрʼанд у готе: «Тӧ дәрсдаре Исраеле йи у һе ван йәка ньзани?

¹¹Әз рʼаст бе хельф тәрʼа дьбежьм, тьште кӧ әм заньн ԝе дьбежьн, тьште кӧ мә дитийә шәʼдәтийа ԝе дьдьн. Ле бәле һун шәʼдәтийа мә ԛәбул накьн.

¹²Һәгәр Әз дәрһәԛа тьштед ль ве дьнеда ԝәрʼа дьбежьм һун баԝәр накьн, ле ԝәки дәрһәԛа тьштед ль әʼзмана бежьм, һуне чаԝа баԝәр бькьн?

¹³Кәсәк һьлнәкʼьшийайә әʼзмен, пештьри Әԝи кӧ жь әʼзмен пәйа бу, Кӧрʼе Мерьв.

¹⁴Чаԝа кӧ Муса бәрʼийеда мәʼр бьльнд кьр, ӧса жи гәрәке Кӧрʼе Мерьв бе бьльндкьрьне,

¹⁵ԝәки һәр кәсе кӧ баԝәрийа хԝә Ԝи бинә, жийина ԝийә һʼәта-һʼәтайе һәбә.

¹⁶Чьмки Хԝәде ӧса дьнйа һʼьз кьр, кӧ Кӧрʼе Хԝәйи тайе тʼәне бәрва да, ԝәки һәр кәсе кӧ баԝәрийа хԝә Ԝи бинә ӧнда нәбә, ле жийина ԝийә һʼәта-һʼәтайе һәбә.

¹⁷Чьмки Хԝәде Кӧрʼе Хԝә нәшандә дьнйайе, кӧ диԝана дьне бькә, ле ԝәки дьнйа пе Ԝи хьлаз бә.

¹⁸Йе кӧ баԝәрийа хԝә Ԝи бинә, диԝана ԝи набә, ле әԝе кӧ баԝәрайи хԝә Ԝи найнә, иди диԝана ԝи буйә жи, чьмки әԝи баԝәрийа хԝә наве Кӧрʼе Хԝәдейи тайе тʼәне нәани.

¹⁹Диԝан бь ви аԝайи дьбә: Рʼонайи һатә дьнйайе, ле мәрьва тәʼристани жь рʼонайе зедәтьр һʼьз кьр, чьмки кьред ԝан хьраби бун.

²⁰Һәр кәсе кӧ хьрабийе дькә, рʼонайи бәр чʼәʼва рʼәш ә. Әԝ хԝә ль рʼонайе нагьрә, ԝәки кьрьнед ԝи хӧйа нәбьн.

²¹Ле әԝе кӧ рʼастийе дькә, әԝ хԝә ль рʼонайе дьгьрә, ԝәки әʼйан бә, кӧ кьред ԝи Хԝәдеда һатьнә кьрьне».

²²Пәй ве йәкерʼа Иса у шагьртед Ԝи чунә ԛәза Щьһустане. Иса ль ԝе дәре тʼәви ԝан дьма у дьньхӧманд.

²³Йуһʼәнна жи ль Әʼйнона незики Салиме дьньхӧманд, чьмки ав ль ԝьр гәләк бу. Мәрьв дьһатьнә ԝе дәре у дьньхӧмин.

²⁴Йуһʼәнна һе нәавитьбунә кәле.

²⁵Һьнге нав шагьртед Йуһʼәнна у щьһукида ль сәр пьрса әʼдәтед шуштьн-вәшуштьне дәʼԝ пешда һат.

²⁶Әԝ шагьрт чунә щәм Йуһʼәнна у жерʼа готьн: «Дәрсдар, Әԝи кӧ ль ԝи бәри чʼәме Урдӧне тʼәви тә бу у тә бона Ԝи шәʼдәти да, ва Әԝ Хԝәха дьньхӧминә у һʼәму дьчьнә щәм Ԝи».

²⁷Йуһʼәнна щаб да у гот: «Мәрьвәк нькарә тьштәки һьлдә сәр хԝә, һәгәр әԝ жь әʼзмен жерʼа нәһатьбә дайине.

²⁸Һун хԝәха шәʼдед мьн ьн, кӧ мьн готийә: ‹Әз нә Мәсиһ ьм, ле йе ль пешийа Ԝи шанди мә›.

²⁹Бук бона кʼе бә зәʼва әԝ хԝәха йә. Ле чаԝа дәстәбьраке зәʼве сәкьни бона ԝи дьбьһе у бь дәнге ԝи ша дьбә, ӧса жи ньһа дьле мьн шабунева тʼьжи бу.

³⁰Әԝ гәрәке мәзьн бә, ле әз бьчʼук бьм.

³¹Әԝе кӧ жь жор һатийә, Әԝ сәр һʼәмуйарʼа йә. Әԝе кӧ жь ве дьне йә, әԝ йе ве дьне йә у әԝ жь ве дьне хәбәр дьдә. Ле Әԝе кӧ жь әʼзмен һатийә, Әԝ сәр һʼәмуйарʼа йә.

³²Ԝи чь дит у чь бьһист бона ԝе йәке шәʼдәтийе дьдә, ле тʼӧ кәс шәʼдәтийа Ԝи ԛәбул накә.

³³Йе кӧ шәʼдәтийа Ԝи ԛәбул дькә, әԝ мак дькә кӧ Хԝәде рʼаст ә.

³⁴Әԝе кӧ Хԝәде шандийә Әԝ готьнед Хԝәде дьбежә, чьмки Хԝәде Рʼӧһʼ бе чап дьдә Ԝи.

³⁵Бав Кӧрʼ һʼьз дькә у һәр тьшт дайә дәсте Ԝи.

³⁶Әԝе кӧ баԝәрийа хԝә Кӧрʼ тинә, жийина ԝийә һʼәта-һʼәтайе һәйә. Әԝе кӧ гӧрʼа Кӧрʼ накә, әԝ жийине набинә, ле хәзәба Хԝәде ль сәр ԝи дьминә».