Read Пәймана Ну (Инщил) Йуһʼәнна 4 Bible Online

Йуһʼәнна 4 - Пәймана Ну (Инщил) bible

Йуһʼәнна 4

¹Ферьсийа бьһист кӧ Иса жь Йуһʼәнна зедәтьр шагьрта дьщьвинә у бь аве дьньхӧминә,

²ле рʼаст Иса Хԝәха нәдьньхӧманд, ле шагьртед Ԝи дьньхӧмандьн.

³Һьнге Иса кӧ ве йәке пе һʼәсийа, Әԝи Щьһустан һьшт у диса чу Щәлиле.

⁴Ӧса ԛәԝьми кӧ гәрәке Әԝ Самәрйайерʼа дәрбаз бьбуйа.

⁵Әԝ һатә бажарәки Самәрйайе кӧ наве ԝи Сухар бу. Әԝ дәр незики ԝи әʼрди бу, кӧ Аԛуб дабу кӧрʼе хԝә Усьв.

⁶Бира Аԛуб ль ԝе дәре бу. Иса ӧса жь рʼеԝитийе ԝәстийайи, ль кʼеләка бире рʼуньшт. Иди рʼож нивро бу.

⁷Кʼӧлфәтәкә самәри һат кӧ аве бькʼьшинә. Иса ԝерʼа гот: «Авәке бьдә Мьн, Әз вәхԝьм».

⁸Шагьртед Ԝи жи чубунә бажер, кӧ хӧрәк бькʼьрʼьн.

⁹Ԝе кʼӧлфәта самәри жерʼа гот: «Тӧ щьһу йи у әз жи кʼӧлфәтәкә самәри мә. Тӧ чаԝа жь мьн аве дьхԝази?» Чьмки тʼӧ һәләԛәтийа щьһуйа тʼәви самәрийа тʼӧнәбу[12].

¹⁰Иса ле вәгәрʼанд у готе: «Һәгәр тә дайина Хԝәде бьзаньбуйа у бьзаньби Кʼи йә кӧ тәрʼа дьбежә: ‹Авәке бьдә Мьн Әз вәхԝьм›, тәйе жь Ԝи ав бьхԝәста у Әԝи ԝе ава жийине бьда тә».

¹¹Кʼӧлфәте жерʼа гот: «Әз хӧлам, тьштәки Тәйи кӧ Тӧ пе аве бькʼьшини тʼӧнә у бир жи кʼур ә! Дә ижар Те ава жийине жь кʼӧ дәре бини?

¹²Чьма Тӧ жь баве мә Аԛуб мәстьр и, йе кӧ әва бира дайә мә у жь ве әԝи, зарʼед ԝи, пәз у дәԝаред ԝи же вәхԝарьнә?»

¹³Иса щаба ԝе да у готе: «Һәр кәсе кӧ жь ве аве вәхԝә, әԝе диса тʼи бә.

¹⁴Ле әԝе кӧ жь ԝе аве вәхԝә, йа кӧ Әз бьдьме, әԝе тʼӧ щар тʼи нәбә. Бәле әԝ ава кӧ Әзе бьдьмә ԝи, ԝе дьле ԝида бьбә каникә аве, кӧ ԝе бона жийина һʼәта-һʼәтайе бьлԛ бьдә».

¹⁵Кʼӧлфәте жерʼа гот: «Әз хӧлам, дә бьдә мьн ԝе аве, кӧ әз иди тʼи нәбьм у нәйем жь вьр аве нәкʼьшиньм».

¹⁶Иса ле вәгәрʼанд у готе: «Һәрʼә гази мере хԝә кә у ԝәрә вьра».

¹⁷Кʼӧлфәте щаба Ԝи да у гот: «Мере мьн тʼӧнә». Иса жерʼа гот: «Тә рʼаст гот: ‹Мере мьн тʼӧнә›,

¹⁸чьмки пенщ меред тә һәбунә у йе кӧ ньһа жи тӧ перʼа йи нә мере тә йә. Тә әв йәка рʼаст гот».

¹⁹Кʼӧлфәте жерʼа гот: «Әз хӧлам, әз дьбиньм Тӧ пʼехәмбәр и.

²⁰Кал у бавед мә ль сәре ви чʼийайи Хԝәде һʼәбандьнә, ле һун дьбежьн щийе Хԝәде һʼәбандьне гәрәке ль Оршәлиме бә».

²¹Иса жерʼа гот: «Әʼвде, Мьн баԝәр бькә, ԝәхте бе, кӧ һуне нә ль ви чʼийайи у нә жи ль Оршәлиме Баве бьһʼәбиньн.

²²Һун самәри Ԝи дьһʼәбиньн, Кʼижани кӧ һун нас накьн, ле әм щьһу Ԝи дьһʼәбиньн, Кʼижани әм нас дькьн, чьмки хьлазбун жь щьһуйа те.

²³Ле бәле ԝәхте бе, иди перʼа гьһиштийә жи, кӧ йед рʼаст дьһʼәбиньн ԝе бь Рʼӧһʼ у Рʼастийе Баве бьһʼәбиньн, чьмки Бав йед аһа дьһʼәбиньн дьгәрʼә.

²⁴Хԝәде Рʼӧһʼ ә у йед кӧ Ԝи дьһʼәбиньн жи гәрәке бь Рʼӧһʼ у Рʼастийе Ԝи бьһʼәбиньн».

²⁵Кʼӧлфәте жерʼа гот: «Әз заньм кӧ Мәсиһе бе», (аԝа готи «Йе Кʼьфшкьри»). «Гава Әԝ бе, Әԝе дәрһәԛа һәр тьштида мәрʼа гьли кә».

²⁶Иса жерʼа гот: «ӘЗ ӘԜ ЬМ[13], кӧ тʼәви тә хәбәр дьдьм».

²⁷Сәр хәбәрдана ԝанда шагьртед Иса һатьн. Әԝ гәләки әʼщебмайи ман, кӧ Ԝи тʼәви кʼӧлфәте хәбәр дьда, ле кәси нәготе: «Тӧ чь дьхԝази?» йан «бона чь тʼәви ԝе хәбәр дьди?»

²⁸Һьнге кʼӧлфәте щерʼе хԝә һьшт, чу бажер у щьмәʼтерʼа гот:

²⁹«Ԝәрьн Ԝи мәрьви бьбиньн, Йе кӧ һʼәму тьштед кӧ мьн бәре кьрьбун мьнрʼа готьн. Гәло Әв ә Мәсиһ?»

³⁰Әԝ жь бажер дәркʼәтьн у һатьнә щәм Ԝи.

³¹Ԝи ԝәхтида шагьртед Ԝи лава же дькьрьн у дьготьне: «Дәрсдар, тьштәки бьхԝә!»

³²Ле Әԝи ԝанрʼа гот: «Хӧрәке Мьни хԝарьне һәйә, һун ньзаньн».

³³Шагьрта жь һәвдӧ пьрси: «Гәло кәсәки жерʼа хԝарьн анийә?»

³⁴Иса ԝанрʼа гот: «Хԝарьна Мьн әԝ ә, кӧ Әз хԝәстьна Йе кӧ Әз шандьмә бькьм у шьхӧлед Ԝи биньмә сери.

³⁵Чьма һун хԝәха набежьн: ‹Һʼәта нандьруне һе чар мәһ һәнә›? Ва йә Әз ԝәрʼа дьбежьм, чʼәʼвед хԝә вәкьн у дина хԝә бьдьнә зәвийа, әԝ чаԝа зәр бунә, дьрутьнерʼа һазьр ьн!

³⁶Йе кӧ дьдьру һәԛе хԝә дьстинә у бона жийина һʼәта-һʼәтайе бәр тʼоп дькә, ԝәки йе дьчинә у йе дьдьру бь һәврʼа ша бьн.

³⁷Вьра әв готьн рʼаст ә, кӧ: ‹Йәк дьчинә у йәки дьн дьдьру›.

³⁸Мьн һун шандьн кӧ һун ԝе бьдьрун, сәр кʼижане һун нәхәбьтинә, һьнәкед дьн хәбьтин у һун ль сәр хәбата ԝан рʼуньштьн».

³⁹Гәләк самәрийед жь ԝи бажари баԝәрийа хԝә ль Ԝи анин, бона готьна ԝе кʼӧлфәте кӧ дьгот: «Һʼәму тьштед кӧ мьн кьрьбун, Әԝи мьнрʼа готьн».

⁴⁰У гава самәри һатьнә щәм Ԝи, лава же кьрьн, кӧ Әԝ ль щәм ԝан бьминә. Әԝ жи дӧ рʼожа ль ԝе дәре ма.

⁴¹Гәләка бона ԝе хәбәрдана Ԝи баԝәрийа хԝә ль Ԝи анин

⁴²у ԝе кʼӧлфәтерʼа готьн: «Әм иди нә кӧ пе готьна тә баԝәр дькьн, ле мә хԝәха бьһист у әм заньн кӧ әв ә рʼаст Хьлазкьре дьнйайе».

⁴³Пәй ван һәр дӧ рʼожарʼа Иса жь ԝьр рʼабу чу Щәлиле.

⁴⁴Иса хԝәха шәʼдәти дабу, кӧ рʼумәта пʼехәмбәр щи-мьскʼәне ԝида тʼӧнә.

⁴⁵Гава кӧ Әԝ һатә Щәлиле, щәлилийа Әԝ ԛәбул кьр, чьмки әԝана хԝәха жи бона Щәжьна Дәрбазбуне чубунә Оршәлиме у тьштед кӧ Ԝи кьрьбун дитьбун.

⁴⁶Иса диса чу Ԛанайа Щәлиле, кʼидәре ав кьрьбу шәрав. Ԝе дәре ԛӧльхкʼарәки ԛәсьре һәбу, кӧ кӧрʼе ԝи ль Кәфәрнаһуме нәхԝәш бу.

⁴⁷Гава әԝи бьһист кӧ Иса жь Щьһустане һатийә Щәлиле, һатә щәм Ԝи у лава же кьр, кӧ һәрʼә Кәфәрнаһуме кӧрʼе ԝийи бәртәләф ԛәнщ кә.

⁴⁸Иса ԝирʼа гот: «Һʼәта кӧ һун нишан у кʼәрәмәта нәбиньн, һун тʼӧ щар баԝәр накьн».

⁴⁹Ԛӧльхкʼаре ԛәсьре жерʼа гот: «Әз хӧлам, ԝәрә әм һәрʼьн, һәла һе кӧрʼе мьн нәмьрийә».

⁵⁰Иса ле вәгәрʼанд у готе: «Һәрʼә, кӧрʼе тә сах-сьламәт ә». Ԝи мәрьви жи әԝ готьна Иса баԝәр кьр у чу.

⁵¹Әԝ һе нәгьһиштьбуйе, хӧламед ԝи пешийа ԝида һатьн у жерʼа готьн: «Кӧрʼе тә сах-сьламәт ә».

⁵²Әԝи жь хӧламед хԝә пьрси: «Кʼижан сьһʼәтеда әԝ бәрбь ԛәнщбуне чу?» Ԝана готә ԝи: «Дӧһӧ пәй ниврорʼа сьһʼәта йәке тʼайе же бәрʼда».

⁵³Һьнге баве кӧрʼьк те дәрхьст, кӧ әԝ ԝе сьһʼәтеда бу, гава Иса жерʼа гот: «Кӧрʼе тә сах-сьламәт ә». Бь ви аԝайи ԝи у тʼәмамийа нәфәред мала ԝи баԝәр кьрьн.

⁵⁴Әва нишана дӧда бу кӧ Иса кьр, гава Әԝ жь Щьһустане һатә Щәлиле.