Read Пәймана Ну (Инщил) Йуһʼәнна 5 Bible Online

Йуһʼәнна 5 - Пәймана Ну (Инщил) bible

Йуһʼәнна 5

¹Пәй ве йәкерʼа щәжьнәкә щьһуйа һат у Иса һәвраз чу Оршәлиме.

²Ль Оршәлиме, ль бәр дәргәһе Пез һʼәԝзәк һәбу, кӧ бь ибрани жерʼа дьбежьн Бәйтзатʼа, пенщ һеԝангәһед ԝе һәбун.

³Ԝан һеԝангәһада гәләк нәхԝәш пʼалдайи бун: Йед кор, шьлушәʼт у кʼут.

⁴Әвана һивийа льһәвкʼәтьна аве бун, чьмки щар-щара мьлйакʼәтәки Хӧдан дькʼәтә аве у ль һәв дьхьст. У пәй льһәвкʼәтьна аверʼа, кʼе бәри һʼәмуйа бькʼәта аве, әԝ жь нәхԝәшийа хԝә ԛәнщ дьбу[14].

⁵Мәрьвәк ль ԝе дәре һәбу, кӧ нәхԝәше си һʼәйшт сала бу.

⁶Иса гава әԝ ль ԝьр пʼалдайи дит у заньбу жи кӧ әԝ зува нәхԝәш ә, ԝирʼа гот: «Тӧ дьхԝази ԛәнщ би?»

⁷Йе нәхԝәш ле вәгәрʼанд у готе: «Әз хӧлам, кәсәки мьн тʼӧнә, ԝәки гава ав ль һәв дькʼәвә, мьн бавежә һʼәԝз. Һʼәта әз һʼьзи дьдьмә хԝә хԝә бавежьме, йәки дьн бәри мьн хԝә давеже».

⁸Иса жерʼа гот: «Рʼабә бәрʼа хԝә һьлдә у бьгәрʼә».

⁹Перʼа-перʼа әԝ мәрьв ԛәнщ бу, бәрʼа хԝә һьлда у гәрʼийа. Әԝ рʼожа шәмийе бу.

¹⁰Һьнге щьһуйа ԝи мәрьве ԛәнщбуйирʼа гот: «Иро шәми йә! Ԛанун изьне надә кӧ тӧ бәрʼа хԝә һьлди».

¹¹Әԝи ль ԝан вәгәрʼанд у гот: «Кʼе әз ԛәнщ кьрьм Әԝи мьнрʼа гот: ‹Бәрʼа хԝә һьлдә у бьгәрʼә›».

¹²Ԝана же пьрси: «Әԝ кʼи бу кӧ тәрʼа гот: ‹Бәрʼа хԝә һьлдә у бьгәрʼә?›»

¹³Ле йе ԛәнщбуйи ньзаньбу Әԝ кʼи бу, чьмки Иса Хԝә нава әʼлаләта ԝьрда бәтавәкьр.

¹⁴Пәй ве йәкерʼа Иса әԝ пʼарьстгәһеда дит у жерʼа гот: «Бьньһерʼә, тӧ ԛәнщ буйи! Иди гӧна нәкә, ԝәки тьштәки һе хьраб нәйе сәре тә».

¹⁵Ԝи мәрьви чу щьһуйарʼа гьли кьр, Йе кӧ әԝ ԛәнщ кьрийә Иса йә.

¹⁶Бона ве йәке иди щьһу пәй Иса кʼәтьн, чьмки Ԝи әв йәкана рʼожа шәмийеда дькьрьн.

¹⁷Һьнге Иса ль ԝан вәгәрʼанд у гот: «Баве Мьн һʼәта ньһа шьхӧле Хԝә дькә, Әз жи дькьм».

¹⁸Бона ве йәке щьһуйа һе дькьр кӧ Ԝи бькӧжьн, чьмки Ԝи нә тʼәне рʼожа шәмийе тʼәрʼьбандьбу, ле Хԝәде кьрьбу Баве Хԝә у Хԝә һьмбәри Хԝәде кьрьбу.

¹⁹Ләма Иса ԝанрʼа гот: «Әз рʼаст бе хельф ԝәрʼа дьбежьм, кӧ Кӧрʼ нькарә хԝәсәрихԝә тьштәки бькә, әԝ тʼәне ԝан тьштед кӧ дьбинә Бав дькә, Әԝ жи дькә. Бав чь дькә Кӧрʼ жи ӧса дькә.

²⁰Чьмки Бав Кӧрʼ һʼьз дькә у һәр тьштед кӧ Хԝәха дькә нишани Ԝи дькә. Әԝе һе тьштед мәзьн нишани Ԝи бькә у һуне әʼщебмайи бьминьн.

²¹Чаԝа кӧ Бав дькарә мьрийа сах кә у жийине бьдә ԝан, ӧса жи Кӧрʼ дькарә кʼижана Әԝ дьхԝазә, жийине бьдә ԝан.

²²Сәрда жи Бав диԝана тʼӧ кәси накә, ле һʼәму һʼӧкӧме диԝанкьрьне дайә Кӧрʼ,

²³ԝәки һʼәму ԛәдьре Кӧрʼ бьзаньбьн, чаԝа ԛәдьре Баве заньн. Йе кӧ ԛәдьре Кӧрʼ ньзанә, әԝ ԛәдьре Баве кӧ Әԝ шандийә жи ньзанә.

²⁴Әз рʼаст бе хельф ԝәрʼа дьбежьм: Һәр кәсе кӧ гӧһ бьдә готьнед Мьн у Ԝи баԝәр бькә, Йе кӧ Әз шандьмә, жийина ԝийә һʼәта-һʼәтайе һәйә. Диԝана ԝи найе кьрьне, ле әԝ жь мьрьне дәрбази жийине буйә.

²⁵Әз рʼаст бе хельф ԝәрʼа дьбежьм, ԝәхт те у перʼа гьһиштийә жи, кӧ мьрийе дәнге Кӧрʼе Хԝәде бьбьһен у әԝед кӧ бьбьһен ԝе бьжин.

²⁶Чьмки чаԝа Бав канийа жийине йә, ӧса жи кьр ԝәки Кӧрʼ Хԝәха канийа жийине бә.

²⁷Әԝи һʼӧкӧме диԝанкьрьне жи да Ԝи, чьмки Әԝ Кӧрʼе Мерьв ә.

²⁸Ль ве йәке әʼщебмайи нәминьн, чьмки ԝәхт незик дьбә, кӧ һʼәмуйед тʼьрбада ԝе дәнге Ԝи бьбьһен

²⁹у дәркʼәвьн. Йед кӧ ԛәнщи кьрьнә ԝе бона жийине рʼабьн, йед кӧ хьраби кьрьнә бона диԝане.

³⁰Әз Хԝәха нькарьм тьштәки бькьм. Чаԝа кӧ Әз дьбьһем, ӧса жи диԝане дькьм. Диԝанкьрьна Мьн рʼаст ә, чьмки Әз нә кӧ ль хԝәстьна Хԝә дьгәрʼьм, ле хԝәстьна Йе кӧ Әз шандьмә.

³¹Һәгәр Әз бона Хԝә шәʼдәтийе бьдьм, шәʼдәтийа Мьн нә рʼаст ә.

³²Ле йәки дьн һәйә кӧ бона Мьн шәʼдәтийе дьдә у Әз заньм әԝ шәʼдәтийа кӧ Әԝ бона Мьн дьдә рʼаст ә.

³³Ԝә мәрьв шандьнә щәм Йуһʼәнна у ԝи шәʼдәтийа рʼастийе да.

³⁴Ле Әз нә һʼәԝще шәʼдәтийа мәрьва мә, Әз тʼәне ван тьшта дьбежьм, ԝәки һун хьлаз бьн.

³⁵Йуһʼәнна чʼьрак бу кӧ дьшьхӧли у рʼонайи дьда. Ԝә хԝәст кӧ һьнәк ԝәхт бь рʼонайа ԝи ша бьн.

³⁶Ле әԝ шәʼдәтийа бона Мьн сәр шәʼдәтийа Йуһʼәннарʼа йә. Чьмки әԝ шьхӧлед кӧ Баве спартьнә Мьн, ԝәки Әз ԝан биньмә сери, һәма әԝ шьхӧл ьн, йед кӧ Әз дькьм, шәʼдәтийе бона Мьн дьдьн, кӧ Баве Әз шандьмә.

³⁷У Бав кӧ Әз шандьмә, Ԝи Хԝәха бона Мьн шәʼдәти дайә. Ԝә тʼӧ щар нә дәнге Ԝи бьһистийә, нә рʼуйе Ԝи дитийә

³⁸у нә жи готьна Ԝи дьле ԝәда дьминә, чьмки һун Әԝи кӧ Ԝи шандийә баԝәр накьн.

³⁹Һун ньвисарада кʼур дьбьн, чьмки һун дьбежьн, жийина ԝәйә һʼәта-һʼәтайе ԝанда йә у һәма әԝ хԝәха шәʼдәтийа Мьн дьдьн.

⁴⁰Ле һун нахԝазьн бенә щәм Мьн, ԝәки жийина ԝә һәбә.

⁴¹Әз нә һʼәԝще шькьрдайина мәрьвайе мә,

⁴²ле Әз ԝә нас дькьм у заньм кӧ дьле ԝәда һʼьзкьрьна Хԝәде тʼӧнә.

⁴³Әз бь наве Баве Хԝә һатьм у һун Мьн ԛәбул накьн. Ле һәгәр йәки дьн бь наве хԝә бе, һуне ԝи ԛәбул кьн.

⁴⁴Һуне чаԝа бькарьбьн Мьн баԝәр бькьн, һәгәр һун нав һәвда рʼумәта наве хԝә дьгәрʼьн, ле әԝ рʼумәта кӧ жь Хԝәдейе бешьрики-беһәвалә нагәрʼьн?

⁴⁵Нәфькьрьн кӧ Әзе ԝә ль бәр Баве нәһәԛ кьм. Йәк һәйә, кӧ ԝә нәһәԛ дькә, һәма әԝ Муса йә кӧ ԝә гӧмана хԝә данийә сәр ԝи.

⁴⁶Һәгәр ԝә Муса баԝәр бькьра, ԝәйе Әз жи баԝәр бькьрама, чьмки әԝи дәрһәԛа Мьнда ньвисийә.

⁴⁷Ле һәгәр һун ньвисаред ԝи баԝәр накьн, һуне чаԝа готьнед Мьн баԝәр бькьн?»