Read Пәймана Ну (Инщил) Йуһʼәнна 9 Bible Online

Йуһʼәнна 9 - Пәймана Ну (Инщил) bible

Йуһʼәнна 9

¹Гава кӧ Иса дәрбаз дьбу, Әԝи мәрьвәки жь зькмакийеда кор дит.

²Шагьртед Ԝи же пьрсин: «Дәрсдар, гӧне кʼе йә кӧ әв мәрьва кор жь дийа хԝә буйә? Гӧне ԝи йә, йан йе де у баве ԝи йә?»

³Иса ль ԝан вәгәрʼанд у гот: «Нә гӧне ԝи йә, нә жи йе де у баве ԝи йә, ле әв йәк аһа буйә, ԝәки кьред Хԝәде ль сәр ԝи бенә әʼйанкьрьне.

⁴Һʼәта кӧ рʼож һәйә, гәрәке әм кьред Ԝи бькьн, Йе кӧ Әз шандьмә. Шәв те, һьнге тʼӧ кәсе нькарьбә тьштәки бькә.

⁵Һʼәта кӧ Әз дьнйайеда мә, рʼонайа дьнйайе мә».

⁶Әԝи әв йәк кӧ гот, тʼуйи әʼрде кьр, жь тʼуке һʼәрʼи чекьр, әԝ һʼәрʼи чʼәʼве ԝи мәрьви да

⁷у жерʼа гот: «Һәрʼә сәрчʼәʼве хԝә һʼәԝзе Силԝамеда бьшо», (кӧ әв нав те фәʼмкьрьн «Шанди»). Әԝи жи чу сәрчʼәʼве хԝә шушт у бь чʼәʼвед вәбуйи вәгәрʼийа.

⁸Щинаред Ԝи у әԝед кӧ бәре әԝ дитьбун кӧ ԝи пʼарс дькьр, дьготьн: «Әва әԝи кор нинә, кӧ рʼудьньшт у пʼарс дькьр?»

⁹Һьнәка дьгот: «Әва әԝ ә», һьнәка жи дьгот: «На, нә әԝ ә, ле мина ԝи йә». Ле ԝи хԝәха дьгот: «Әз әԝ ьм».

¹⁰Һьнге же пьрсин: «Кӧ ӧса йә чʼәʼвед тә чаԝа вәбунә?»

¹¹Әԝи ль ԝан вәгәрʼанд у гот: «Әԝ мәрьве кӧ жерʼа дьбежьн Иса, Әԝи һʼәрʼи чекьр у ль чʼәʼвед мьн дан у мьнрʼа гот: ‹Һәрʼә һʼәԝзе Силԝаме у сәрчʼәʼве хԝә бьшо›. Әз жи чум, мьн сәрчʼәʼве хԝә шушт у чʼәʼвед мьн вәбун».

¹²Ԝана же пьрси: «Кʼа Әԝ кʼӧ йә?» Әԝи гот: «Әз ньзаньм».

¹³Ԝана әԝ мәрьве кӧ бәре кор бу, бьрьнә щәм ферьсийа.

¹⁴Әԝ рʼожа кӧ Иса һʼәрʼи чекьр у чʼәʼвед ԝи вәкьрьн, шәми бу.

¹⁵Ферьсийа жи же пьрси, кʼа чаԝа чʼәʼвед ԝи вәбунә? Әԝи ԝанрʼа гот: «Һʼәрʼи ль чʼәʼвед мьн да, мьн сәрчʼәʼве хԝә шушт у ньһа әз дьбиньм».

¹⁶Һьнге һьнәкә жь ферьсийа гот: «Әв мәрьва нә жь Хԝәде йә, чьмки Әԝ рʼожа шәмийе хԝәй накә». Ле һьнәка жи дьгот: «Мәрьвәки гӧнәкʼар чаԝа дькарә ван кʼәрәмәта бькә?» Бь ви аԝайи нав ԝанда бу дӧтирәти.

¹⁷Һьнге, диса готьнә йе кӧ кор бу: «Тӧ чь дьбежи бона Әԝи кӧ чʼәʼвед тә вәкьрьн?» Әԝи жи гот: «Әԝ пʼехәмбәр ә».

¹⁸Ле щьһуйа баԝәр нәдькьр кӧ әԝ кор буйә у чʼәʼвед ԝи вәбунә, һʼәта гази де у баве ԝи нәкьрьн

¹⁹у жь де у баве ԝи нәпьрсин: «Әв ә әԝ кӧрʼе ԝәйи кӧ һун дьбежьн, жь зькмакийеда кор ә? Әва чаԝа ньһа дьбинә?»

²⁰Де у баве ԝи ль ԝан вәгәрʼандьн у готьн: «Әм заньн кӧ әва кӧрʼе мә йә у жь зькмакийеда кор ә.

²¹Ле ньһа әԝ чаԝа дьбинә, әм ньзаньн, йан кʼе чʼәʼвед ԝи вәкьрьнә, әм ԝе жи ньзаньн. Әԝ иди мәзьн ә, жь ԝи бьпьрсьн, бьра әԝ щаба хԝә бьдә».

²²Де у баве ԝи жь тьрса щьһуйа аһа готьн, чьмки щьһуйа пешда йа хԝә кьрьбунә йәк: «Һәгәр кʼи бежә Иса Мәсиһ ә, әԝе жь кʼьниште бе дәрхьстьне».

²³Ләма де у баве ԝи готьн: «Әԝ иди мәзьн ә, жь ԝи бьпьрсьн».

²⁴Аԝа щара дӧда ԝана гази ԝи мәрьве кӧ кор бу кьрьн у готьне: «Бәр Хԝәде рʼаст бежә![27] Әм заньн кӧ Әԝ Мәрьва гӧнәкʼар ә».

²⁵Әԝи ль ԝан вәгәрʼанд у гот: «Әз ньзаньм Әԝ гӧнәкʼар ә, йан на, ле әз тʼәне тьштәки заньм кӧ әз кор бум у ньһа дьбиньм».

²⁶Диса жь ԝи пьрсин: «Әԝи чь тә кьр? Чʼәʼвед тә чаԝа вәкьрьн?»

²⁷Әԝи ль ԝан вәгәрʼанд у гот: «Мьн һежа ԝәрʼа гот, ле ԝә гӧһдари нәкьр. Чьма һун дьхԝазьн диса бьбьһен? Дьбә кӧ һун жи дьхԝазьн бьбьнә шагьртед Ԝи?»

²⁸Ԝана әԝ беһӧрмәт кьр у готьн: «Тӧ йи шагьрте Ԝи, ле әм шагьртед Муса нә!

²⁹Әм заньн кӧ Хԝәде тʼәви Муса хәбәр дайә, ле бона Ви әм ньзаньн кӧ Әԝ жь кʼӧ йә!»

³⁰Әви мәрьви ль ԝан вәгәрʼанд у гот: «Һәма әв ә әʼщеба гьран, кӧ һун ньзаньн Әԝ жь кʼӧ йә, ле Ԝи чʼәʼвед мьн вәкьрьн.

³¹Әм заньн кӧ Хԝәде дәнге гӧнәкʼара набьһе. Ле һәгәр мәрьвәк хԝәденас ә у хԝәстьна Ԝи дькә, Хԝәде дәнге ԝи дьбьһе.

³²Һе бәреда тʼӧ щара ԛәт нәһатийә бьһистьне, кӧ йәки чʼәʼвед мәрьвәки зькмакийеда кор вәкьрьбьн.

³³Һәгәр Әва Мәрьва жь Хԝәдеда нибуйа Ԝи нькарьбу тʼӧ тьшт бькьра».

³⁴Щаба ԝи дан у готьн: «Тӧ сәрда-педа нав гӧнада дьне кʼәти йи у мә һин дьки?» У әԝ жь кʼьниште дәрхьстьнә дәр.

³⁵Гава Иса бьһист кӧ әԝ дәрхьстьнә дәр, әԝ дит у жерʼа гот: «Тӧ баԝәрийа хԝә Кӧрʼе Мерьв тини?»

³⁶Әԝи пьрси у готе: «Әз хӧлам, Әԝ Кʼи йә, ԝәки әз баԝәрийа хԝә Ԝи биньм?»

³⁷Иса жерʼа гот: «Тә Әԝ дит у Әԝ ә Йе кӧ ньһа тʼәви тә хәбәр дьдә».

³⁸Әԝи гот: «Хӧдан, әз баԝәр дькьм!» у бәр Ԝи та бу.

³⁹Иса гот: «Әз бона диԝанкьрьне һатьмә ве дьнйайе, ԝәки йед кӧ набиньн бьбиньн у йед кӧ дьбиньн кор бьн».

⁴⁰Һьнәкә жь ферьсийа ль ԝьр һазьр бун, гава әв йәк бьһистьн, жерʼа готьн: «Чьма әм жи кор ьн?»

⁴¹Иса готә ԝан: «Һәгәр һун кор буна, гӧнед ԝәйе тʼӧнәбуна. Ле ньһа һун кӧ дьбежьн: ‹Әм дьбиньн›, дьдьнә кʼьфше кӧ һун нава гӧнед хԝәда дьминьн.