Read Пәймана Ну (Инщил) Кʼаред Шандийа 10 Bible Online

Кʼаред Шандийа 10 - Пәймана Ну (Инщил) bible

Кʼаред Шандийа 10

¹Ԛәйсәрийеда мәрьвәки наве ԝи Корʼнелйо һәбу, рʼәфа «Ордийа Италйайеда» сәрсәд бу.

²Әԝ мала хԝәва йәки хԝәйиман у хԝәдехоф бу, щьмәʼта щьһуйарʼа жи гәләк хер дькьрьн у һәр гав бәр Хԝәде дӧа дькьр.

³Әԝи нивро незики сьһʼәта сьсийа дитьнокеда бәр чʼәʼве хԝә ашкәрә мьлйакʼәтәки Хԝәде дит кӧ һатә щәм ԝи у ԝирʼа гот: «Корʼнелйо!»

⁴Әԝи кӧ ль ԝи ньһерʼи, саԝ кʼәтә сәр у гот: «Чь йә Хӧдан?» Мьлйакʼәт готе: «Хԝәде дӧа у херед тә ԛәбул кьрьн у әԝ бир накә.

⁵Дә ньһа мәрийа бьшинә Йафайе, гази Шьмһʼун кә, йе кӧ жерʼа Пәтрус дьбежьн.

⁶Әԝ чаԝа меван мала Шьмһʼуне чʼәрмкәрда бәр бәʼре дьминә».

⁷Гава әԝ мьлйакʼәте кӧ ԝирʼа хәбәр дьда чу, әԝи гази дӧ хӧламед мале у әскәрәки бәрдәстийи хԝәйиман кьр

⁸у һәр тьшт ԝанрʼа гьли кьр шандьнә Йафайе.

⁹Рʼожа дьне әԝана һе дьчун у незики бажер дьбун, Пәтрус незики сьһʼәта донздәһа рʼабу сәр хени кӧ дӧа бькә.

¹⁰Әԝ бьрʼчи бу хԝәст кӧ нан бьхԝә. Һе гава нан һазьр дькьрьн, мина сьһʼәтәке сәр ԝирʼа дәрбаз бу.

¹¹У ԝи дина хԝә дайе, ва әʼзман вәбу, тьштәки мина дәстәхана мәзьн һәр чар гошава дардабу, дьһатә хԝаре сәр әʼрде.

¹²Сәр ԝе һәр щурʼә һʼәйԝанед чарпʼе, шулькийед әʼрде у тәйрәдед әʼзмен һәбун.

¹³Дәнг һатә ԝи: «Рʼабә Пәтрус, сәржекә у бьхԝә».

¹⁴Ле Пәтрус гот: «Һʼаша жь мьн Хӧдан, мьн тʼӧ щар тьштәки һʼәрам йан пʼис нәхԝарийә».

¹⁵Щара дӧда әԝ дәнг һатә ԝи: «Әԝ тьште кӧ Хԝәде һʼәлал кьрийә тӧ һʼәрам һʼәсаб нәкә».

¹⁶Әва йәка се щара ԛәԝьми у һьнге әԝ дәстәхан әʼзменва һатә һьлатьне.

¹⁷Пәтрус һе әʼщебмайи нав хԝәда дьфькьри: «Әв чь дитьнок бу мьн дит?» ва әԝ мәрьвед кӧ Корʼнелйо шандьбун ль бәр дәргәһ сәкьнин у мала Шьмһʼун пьрсин.

¹⁸Дәнг дан готьн: «Шьмһʼуне кӧ жерʼа Пәтрус дьбежьн ль вьр меван ә?»

¹⁹Пәтрус һе сәр ԝе дитьноке дьфькьри, Рʼӧһʼ жерʼа гот: «Ва нә се мәри ль тә дьгәрʼьн.

²⁰Дә иди рʼабә һәрʼә хԝаре у дӧдьли нәбә тʼәви ԝан һәрʼә, чьмки Мьн әԝана шандьнә».

²¹Пәтрус жи пәйа бу, чу щәм ԝан мәрьва у гот: «Әз ьм әԝе кӧ һун ле дьгәрʼьн. Һун бона чь һатьнә?»

²²Ԝан гот: «Корʼнелйойе сәрсәд әм шандьнә. Әԝ мәрьвәки рʼаст, хԝәдехоф у алийе тʼәмамийа мьләте щьһуйада жи хԝәйийе шәʼдәтийа ԛәнщ ә. Әԝи әʼмьр жь мьлйакʼәтәки пироз станд, кӧ тә гази мала хԝә кә у хәбәрдана тә бьбьһе».

²³Һьнге Пәтрус әԝ тʼәглифи мале кьрьн, щийе шәве да ԝан. Рʼожа дьне Пәтрус рʼабу тʼәви ԝан чу, чәнд баԝәрмәндед Йафайе жи тʼәви ԝи чун.

²⁴Рʼожа дьн гьһиштьнә Ԛәйсәрийе, Корʼнелйо жи гази хԝәхати у достед хԝә кьрьбу у һивийа ԝан бу.

²⁵Гава Пәтрус дькʼәтә һьндӧрʼ, Корʼнелйо пешийа ԝида чу у кʼәтә бәр ньга у бәр та бу.

²⁶Ле Пәтрус әԝ рʼакьрә пʼийа у готе: «Рʼабә бьсәкьнә, әз хԝәха жи мәри мә».

²⁷Ԝирʼа бь хәбәрдане кʼәтә һьндӧрʼ у ль ԝьр гәләк щьвийайи дитьн.

²⁸Әԝи ԝанарʼа гот: «Һун хԝәха заньн кӧ нә әʼдәте мере щьһу йә, кӧ тʼәви нәщьһуйа рʼабә-рʼуни, йан һәвва һәрʼьн-бен. Ле Хԝәде бәр мьн вәкьр, ԝәки әз тʼӧ кәси пʼис йан һʼәрам һʼәсаб нәкьм.

²⁹Бона ԝе йәке жи гава гази мьн кьрьн, мьн на-на нәкьр рʼабум һатьм. У әз ньһа дьпьрсьм, ԝә бона чь гази мьн кьрийә?»

³⁰Корʼнелйо гот: «Бәри чар рʼожа, незики ви чахи мьн дӧайе сьһʼәта сьсийа мала хԝәда дькьр[70], ньшкева мәрьвәк бь кʼьнще чил-ԛәрԛаш ль бәр мьн сәкьни

³¹у гот: ‹Корʼнелйо! Хԝәде дӧайед тә бьһистьн у херед тәйә кьри жи бир анин.

³²Ньһа мәрийа бьшинә Йафайе гази Шьмһʼун кә, йе кӧ жерʼа Пәтрус дьбежьн, әԝ чаԝа меван ль мала Шьмһʼуне чʼәрмкәрда бәр бәʼре дьминә›[71].

³³Мьн жи перʼа-перʼа шандьнә щәм тә у тә жи ԛәнщ кьр кӧ тӧ һати. Ньһа әм һʼәму жи ль бәр Хԝәде сәкьни нә, кӧ чь жь Хӧдан тәрʼа һатийә әʼмьркьрьне бежи, әм жи бьбьһен».

³⁴Пәтрус дәст бь хәбәрдане кьр у гот: «Әз ньһа фәʼм дькьм, ԝәки Хԝәде рʼасти жи фьрԛийе накә нава мьләта[72].

³⁵Ле жь нав һәр мьләтида, йе кӧ жь Ԝи хоф дькә у рʼастийе дькә ль Ԝи ԛәбул ә.

³⁶Һун иди рʼьнд заньн кӧ Хԝәде әва хәбәра зарʼед Исраелрʼа шанд, бь Иса Мәсиһ Мьзгинийа әʼдьлайийе да, Йе кӧ Хӧдане һʼәмуйа йә.

³⁷Ӧса жи заньн жь Щәлиле гьрти тʼәмамийа Щьһустанеда чь ԛәԝьми, пәй ԝе ньхӧмандьнерʼа, йа кӧ Йуһʼәнна даннасин кьр,

³⁸чаԝа Хԝәде Исайе Ньсрәте бь Рʼӧһʼе Пироз у ԛәԝате кʼьфш кьр, кӧ бь ԛәнщикьрьне гәрʼийа у һʼәмуйед кӧ бьн бьндәстийа мирещьнда бун ԛәнщ кьрьн, чьмки Хԝәде тʼәви Ԝи бу.

³⁹Әм хԝәха шәʼдед ԝан һʼәму тьшта нә, йед кӧ Әԝи тʼопрахед Щьһустане у Оршәлимеда кьрьн. Паше Әԝ дарва дардакьрьн у кӧштьн,

⁴⁰ле Хԝәде Әԝ рʼожа сьсийа жь мьрьне рʼакьр, да әʼйанкьрьне,

⁴¹нә кӧ һʼәму щьмәʼтерʼа, ле ԝан шәʼдарʼа, йед кӧ пешийе жь алийе Хԝәдеда һатьбунә бьжартьне, аԝа готи мәрʼа, йед кӧ пәй мьрьн-рʼабуна Ԝирʼа тʼәви Ԝи хԝарьн у вәхԝарьн.

⁴²У Әԝи тʼәми ль мә кьр, ԝәки әм щьмәʼтерʼа даннасин кьн у шәʼдәтийе бьдьн кӧ Әԝ ә һʼакьме мьрийа у зендийа жь Хԝәдеда кʼьфшкьри.

⁴³Һʼәму пʼехәмбәр шәʼдәтийа Ԝи дьдьн, кӧ һʼәмуйед баԝәрийа хԝә Ԝи биньн, ԝе бь сайа наве Ԝи бахшандьна гӧна бьстиньн».

⁴⁴Пәтрус һе әв тьшт дьготьн, Рʼӧһʼе Пироз һатә сәр һʼәмуйед кӧ әв готьн дьбьһистьн.

⁴⁵Баԝәрмәндед әʼсьле хԝәда щьһу[73], йед кӧ тʼәви Пәтрус һатьбун, зәндәгьрти ман, кӧ Рʼӧһʼе Пироз чаԝа пʼешкʼеш сәр нәщьһуйада[74] жи бари,

⁴⁶чьмки бьһистьн кӧ ԝана бь зьмана хәбәр дьдан у шькьри дьданә Хԝәде. Һьнге Пәтрус гот:

⁴⁷«Иди кʼи дькарә нәһелә кӧ әвана пе аве бенә ньхӧмандьне, йед кӧ мина мә Рʼӧһʼе Пироз жи стандьн?»

⁴⁸Ԝи чахи әʼмьр кьр кӧ бь наве Иса Мәсиһ бенә ньхӧмандьне. Паше ԝана һиви жь ԝи кьр кӧ чәнд рʼожа ль ԝьр бьминә.