Read Пәймана Ну (Инщил) Кʼаред Шандийа 12 Bible Online

Кʼаред Шандийа 12 - Пәймана Ну (Инщил) bible

Кʼаред Шандийа 12

¹Ԝан чахада Һеродәс пʼадша дәсте хԝә һьлда сәр һьнәкед жь щьвине кӧ ԝан бьдә щәфе,

²Аԛубе бьре Йуһʼәнна бь шур да кӧштьне.

³Әԝи дина хԝә дайе, кӧ кьрьна ԝи ль щьһуйа хԝәш һат, рʼабу Пәтрус жи да гьртьне. Әв йәк рʼожед Щәжьна Нане Шкәвада ԛәԝьмин.

⁴Гава Пәтрус гьрт, авитә кәле спартә чар тʼахьма, кӧ һәр тʼахьмәк чар-чар әскәр бун, ԝәки мьԛати ԝи бьн. Нета ԝи әԝ бу кӧ пәй Щәжьна Дәрбазбунерʼа ԝи дәрхә бәр щьмәʼте, диԝана ԝи бькә.

⁵Иди Пәтрус кәледа гьрти бу, ле щьвине бона ԝи бь дьл у щан, бь дӧа һиви жь Хԝәде дькьр.

⁶Ԝе шәве, кӧ сьбәтьре Һеродәс дьхԝәст әԝ дәрхьста бәр щьмәʼте, бона диԝанкьрьне, Пәтрус бь дӧ зьнщира гьредайи нава дӧ әскәрада рʼазайи бу, нобәдара жи бәр дери нобәдарийа кәле дькьр.

⁷Ньшкева мьлйакʼәтәки Хӧдан бәр сәкьни, рʼонайе ԝи щийи шәԝԛ да у ньчʼандә кʼеләка Пәтрус, әԝ һʼьшйар кьр у готе: «Зу рʼабә». Зьнщир жь дәстед ԝи кʼәтьн.

⁸Һьнге мьлйакʼәт ԝирʼа гот: «Пьшта хԝә гьредә у чарьхед хԝә сәр ньгед хԝәва кә». Әԝи жи ӧса кьр. Паше ԝирʼа гот: «Ԛапʼуте хԝә бавежә сәр хԝә у пәй мьн ԝәрә».

⁹Пәтрус жи дәркʼәт да пәй ԝи чу, ле ньзаньбу әԝ кьрьна мьлйакʼәт рʼаст ә, ԝи тʼьре хәԝне дьбинә.

¹⁰Әԝана жь нобәдаред пешьн у дӧда дәрбаз бун, һʼәта дәргәһе һʼәсьни һатьн, кʼижани дәрдьхьстә нав бажер. Дәргәһ хԝәха ль бәр ԝан вәбу, жь ԝьр дәркʼәтьн кʼучәке дәрбаз бун, ньшкева мьлйакʼәт жь ԝи ԛәтийа.

¹¹Һьнге Пәтрус сәр һʼьше хԝәда һат, гот: «Әз ньһа рʼаст заньм кӧ Хӧдан мьлйакʼәте Хԝә шанд, әз жь дәсте Һеродәс у жь ԝан һʼәму тьштед кӧ щьһу һивийе бун хьлаз кьрьм».

¹²Гава әв йәк фәʼм кьр, чу мала Мәрйәма дийа Йуһʼәннайе кӧ жерʼа Марԛос дьготьн, кӧ ль ԝьр гәләк щьвийабун дӧа дькьрьн.

¹³Пәтрус дәргәһ хьст, щарикә наве ԝе Рʼода чу гӧһе хԝә да сәр.

¹⁴Дәнге Пәтрус нас кьр, жь шабуна дәргәһ вәнәкьр, ле рʼәви чу һьндӧрʼ гот: «Пәтрус ль бәр дәргәһ сәкьни йә!»

¹⁵Ԝана ԝерʼа гот: «Тә һʼьше хԝә ӧнда кьрийә?» Ле әԝа сәр йа хԝә бу, кӧ рʼаст ә. Ԝана гот: «Ԛәй мьлйакʼәте ԝи йә?»

¹⁶Пәтрус жи сәрһәв-сәрһәв дәргәһ дьхьст. Гава вәкьрьн әԝ дитьн, һʼьше сәре ԝан чу.

¹⁷Әԝи дәсте хԝә һʼәжанд кӧ кәрʼ бьн у гьли кьр чаԝа Хӧдан әԝ жь кәле дәрхьстийә, ӧса жи гот: «Ве йәке Аԛуб у хушк-бьрайед дьнрʼа жи бежьн». Хԝәха жи рʼабу чу щики дьн.

¹⁸Сьбәһ кӧ сафи бу, әскәр гәләки тʼәвиһәв бун, гәло чь һатә сәре Пәтрус?

¹⁹Гава Һеродәс ль ԝи гәрʼийа у әԝ нәдит, жь әскәра һәр тьшт пьрси у әʼмьр кьр кӧ бенә кӧштьне. Паше Һеродәс жь Щьһустане бәржери Ԛәйсәрийе бу у ԝьр ма.

²⁰Һеродәс ль мьләтед Сур у Сайдайе рʼабьбу хәзәбе. Әвана жи һәврʼа рʼабун һатьн, Бьласто ԝәкʼиле мала Һеродәс анинә рʼайе у һиви кьрьн кӧ ль һәв бен, чьмки бажаред ԝан жь ԝәлате ԝи пʼадшайи хӧрәк дьстандьн.

²¹Рʼожәкә кʼьфшкьри Һеродәс кʼьнще пʼадшатийе ле, ль һәрәма диԝане рʼуньшт у бь щьмәʼти ԝанарʼа хәбәр дьда.

²²Әʼлаләте жи дькьрә ԛирʼин у дьгот: «Әва дәнге хԝәдеки йә, нә йе мәрийа йә!»

²³Дәстхԝәда мьлйакʼәтәки Хӧдан ԝи хьст, бона кӧ ԝи шькьри нәда Хԝәде, кӧрми бу мьр.

²⁴Ле хәбәра Хԝәде бәрфьрә у зедә дьбу.

²⁵Барнабас у Шаԝул гава ԛӧльхе хԝә ԛәдандьн, жь Оршәлиме вәгәрʼийан, Йуһʼәннайе кӧ жерʼа Марԛос дьготьн жи тʼәви хԝә анин.