Read Пәймана Ну (Инщил) Кʼаред Шандийа 17 Bible Online

Кʼаред Шандийа 17 - Пәймана Ну (Инщил) bible

Кʼаред Шандийа 17

¹Әԝана Әмфиполис у Аполонйайева дәрбаз бун һатьнә Тʼесалонике, ԝи щийе кӧ кʼьништа щьһуйа һәбу.

²Паԝлос жи мина әʼдәте хԝә чу нава ԝан у се рʼожед шәмийе ԝанарʼа дькʼәтә хәбәрдане, жь ньвисара

³шьровәдькьр у ԝанрʼа избат дькьр, кӧ гәрәке Мәсиһ щәфа бькʼьшанда у жь мьрьне рʼабуйа у дьгот: «Әв Исайе кӧ әз ԝәрʼа даннасин дькьм, әԝ Мәсиһ ә».

⁴Һьнәкед жь ԝан баԝәр кьрьн хԝә ль Паԝлос у Силас гьртьн, ӧса жи әʼлаләтәкә хԝәдебаԝәред йунан у гәләк кʼӧлфәтед хԝәйиԛәдьр.

⁵Ле жь щьһуйа һьнәка жь һʼәвсудийе чәнд мәрьвед бекерә нәрʼаст щьвандьн, кьрьнә ԛалмә-ԛалм, бажар тʼәвиһәв кьрьн у һʼьщуми сәр мала Йасон кьрьн, дьхԝәстьн Паԝлос у Силас банина бәр щьмәʼте.

⁶Гава әԝ нәдитьн, Йасон тʼәви чәнд бьрава кʼаши щәм сәрԝеред бажер кьрьн, дькьрьнә ԛирʼин дьготьн: «Әԝед дьнйа тʼәвиһәв кьрьнә гьһиштьнә вьра жи

⁷у Йасон әԝ ԛәбул кьрьнә мала хԝә! Әвана һʼәму жи мьԛабьли әʼмьред Ԛәйсәр дьчьн у дьбежьн: ‹Пʼадшаки дьн һәйә, наве ԝи Иса йә›».

⁸Бь ван готьна әʼлаләт у сәрԝеред бажер тʼәвиһәв кьрьн.

⁹Һьнге жь Йасон у йед майин кʼәфил стандьн, әԝ бәрʼдан.

¹⁰Һәма чаԝа тәʼри кʼәтә әʼрде, бьра Паԝлос у Силас шандьнә Бәройайе. Әԝ кӧ гьһиштьнә ԝьр, чунә кʼьништа щьһуйа.

¹¹Әв щьһу жь йед Тʼесалонике сәрԝахттьр бун, хәбәра Хԝәде бь дьл у щан ԛәбул кьрьн у һәр рʼож ньвисарада кʼур дьбун, кʼа әв тьшт ӧса нә.

¹²Жь ԝана гәләка баԝәр кьр, ӧса жи гәләк кʼӧлфәтед йунанә хԝәйиԛәдьр у мер жи нә кем бун.

¹³Гава щьһуйед Тʼесалонике бьһистьн кӧ Паԝлос хәбәра Хԝәде Бәройайеда жи даннасин дькә, һатьн ԝьр жи һелан данә әʼлаләте у әԝ тʼәвиһәв кьрьн.

¹⁴Ԝи чахи бьра Паԝлос дәстхԝәда шандьнә бәр бәʼре, ле Силас у Тимотʼейо Бәройайеда ман.

¹⁵Әԝед кӧ Паԝлос вәрʼедькьрьн, әԝ һʼәта Атʼинайе бьрьн, паше жь Паԝлос тʼәми стандьн кӧ Силас у Тимотʼейо зу һәрʼьн бьгьһижьнә ԝи, хԝәха жи пашда вәгәрʼийан.

¹⁶Гава Атʼинайеда Паԝлос һивийа ԝан бу, дьле ԝи нә рʼьһʼәт бу, чьмки дит бажар нава пʼутпʼарьстийеда бу.

¹⁷Аԝа әԝи кʼьништеда щьһу у йунанед хԝәдебаԝәррʼа у ль мәйдане бажерда жи һәр рʼож рʼасти кʼе дьһат ԝанрʼа дькʼәтә хәбәрдане.

¹⁸Чәнд философед епикури у стойхи ԝирʼа кʼәтьнә һʼӧщәте у һьнәка дьгот: «Әви дәвбәлайи бетʼәԝшә чь дьхԝазә бежә?» Һьнәка жи дьгот: «Ӧса те кʼьфше, кӧ әва дәрһәԛа хԝәдейед хәрибда даннасин дькә». Аһа дьготьн, чьмки әԝи бона Иса у рʼабуна мьрийа даннасин дькьр.

¹⁹Ԝи чахи әԝ һьлдан бьрьнә бәр щьвина Арйопагойе у готьн: «Әм дькарьн бона ԝе һинкьрьна нуйә кӧ тӧ даннасин дьки бьзаньбьн?

²⁰Тӧ тьштед хәриб мә дьди бьһистьне, ләма жи әм дьхԝазьн мәʼна ԝан бьзаньбьн».

²¹Һʼәму атʼини у хәрибед кӧ ԝьр дьман, тьштәки майинва мьжул нәдьбун, пештьри тьштед ну готьне йан бьһистьне.

²²Һьнге Паԝлос бәр щьвина Арйопагойеда сәкьни у гот: «Гәли атʼинийа! Әз дина хԝә дьдьме, кӧ һун жь һʼәму алийава гәләки һʼәбандьнева мьжул ьн.

²³Чьмки гава әз гәрʼийам, мьн дина хԝә да һʼәбандьнед ԝә, мьн горигәһәк дит кӧ сәр ԝе ньвисар бу ‹ХԜӘДЕЙЕ НӘНАСРʼА›. Аԝа Әԝе кӧ һун нас накьн дьһʼәбиньн, әз бона Ԝи ԝәрʼа даннасин дькьм.

²⁴Хԝәдейе кӧ әв дьнйа у һʼәмуйед нава ԝеда әʼфьрандийә, Әԝ Хӧдане әʼрд у әʼзмен ә у пʼарьстгәһед бь дәста чекьрида наминә[111],

²⁵нә жи чʼәʼве Ԝи дәсте мәрьва йә кӧ хьзмәткʼарийа Ԝи бькьн, чаԝа Йәки һʼәԝще тьштәки, ле Әԝ хԝәха әʼмьр, бине у һәр тьшти дьдә һʼәмуйа.

²⁶Һʼәму мьләтед дьнйайе жь хунәки хӧльԛанд, кӧ сәр рʼуйе тʼәмамийа дьнйайе бьжин. Әԝи зәман у синоред щи-мьскʼәна ԝанрʼа кʼьфш кьрьн.

²⁷Әԝи әв йәкана кьрьн, ԝәки мәрьв ль Ԝи бьгәрʼьн, бәлки бьпʼәлиньн бьбиньн. Ле Әԝ Хԝәде жь мә һәр кәси нә дур ә жи,

²⁸чьмки ‹әм бь Ԝи дьжин, дьмәшьн у һәнә›[112]. Чаԝа чәнд шайиред ԝә жи готьнә: ‹Әм рʼаст зарʼед Ԝи нә›[113].

²⁹Аԝа кӧ әм жь Хԝәде бунә, гәрәке әм Хԝәде аһа нәшьбиньн мина зерʼ, зив, йан кәвьре кӧ бь һʼьш у һостатийа мәрьва һатьнә кʼоландьне.

³⁰Хԝәде дина Хԝә нәдайә һʼәму зәманед кӧ мәрьвайийе Әԝ нас нәкьрийә, ле ньһа һәр дәра тʼәми ль һʼәму мәрьва дькә, кӧ жь гӧнәкьрьне вәгәрʼьн.

³¹Чьмки Әԝи рʼожәк кʼьфш кьрийә, кʼижанеда ԝе диԝана дьне рʼаст бь дәсте Мәрьвәки бькә, Йе кӧ Әԝи кʼьфш кьрийә. Хԝәде әв йәкана һʼәмуйарʼа данә избаткьрьне, гава Әԝ мәрьв жь мьрьне рʼакьр».

³²Гава бона рʼабуна мьрийа бьһистьн, һьнәк пе кʼәнийан, ле һьнәка жи гот: «Бона ԝе йәке әме щарәкә дьн жь тә бьбьһен».

³³У Паԝлос жь нав щьвина ԝан дәркʼәт чу.

³⁴Ле һьнәка хԝә ль ԝи гьрт, баԝәр кьрьн. Нава ԝанда бун Дийонисйойе әндәме Арйопагойе у кʼӧлфәтәкә наве ԝе Дамәрис, тʼәви һьнәкед майин.