Read Пәймана Ну (Инщил) Кʼаред Шандийа 2 Bible Online

Кʼаред Шандийа 2 - Пәймана Ну (Инщил) bible

Кʼаред Шандийа 2

¹Гава Рʼожа Пенщийә һʼәсаб һат[11], һʼәму жи һәврʼа щики бун.

²Ньшкева жь әʼзмен мина дәнге байе ԛайим дәнгәк һат у тʼәмамийа ԝе мала кӧ теда рʼуньштьбун тʼьжи кьр.

³Һьнге зьманед мина алава егьр ԝанва хӧйа бун у ль сәр һәр йәки жь ԝан данин.

⁴Һʼәму бь Рʼӧһʼе Пироз тʼьжи бун у дәстпекьрьн зьманед майин хәбәр дан, чаԝа кӧ Рʼӧһʼе Пироз әԝ дьданә хәбәрдане.

⁵Ԝи чахи Оршәлимеда щьһуйед хԝәдехоф дьман, әԝ жь нав һʼәму мьләтед бьн пʼәрʼе әʼзменда һатьбун.

⁶Гава әԝ дәнг һат, щьмәʼтәкә гьран щьвийа у тʼәвиһәв бу, чьмки дьбьһистьн кӧ әԝана бь зьманед ԝан һәр йәки хәбәр дьдан

⁷у һʼәйр-һʼӧжмәкʼар, зәндәгьрти майи дьготьн: «Әв һʼәмуйед кӧ хәбәр дьдьн нә жь Щәлиле нә?

⁸Ле чаԝа жь мә һәр йәк ԝи зьмани дьбьһе, йе кӧ әм навда дьне кʼәтьнә?

⁹Партойи, мәди, әʼлами, бьнәлийед Мәсопотамйайе, Щьһустане, Кәпәдокйайе, Понтосе, Асйайе[12],

¹⁰Фьригйайе, Памфилйайе, Мьсьре у йед ль алийе Либйайа незики Курене у ӧса жи йед хәрибә жь Рʼоме һати,

¹¹щьһу у нәщьһуйед кӧ һатьнә сәр баԝәрийа щьһуйа, ӧса жи кьрети у әʼрәб. Әм дьбьһен кӧ әвана бь зьмане мә кьред Хԝәдейә мәзьн дьбежьн».

¹²Һʼәмуйа һʼәйр-һʼӧжмәкʼар шашмайи һәвдӧрʼа дьготьн: «Әв чь һʼәԝал ә?»

¹³Ле һьнәка жи ԛәрфе хԝә дькьрьн у дьготьн: «Пе шәрава ну сәрхԝәш бунә».

¹⁴Һьнге Пәтрус тʼәви һәр йанздәһа рʼабу дәнге хԝә һьлда у щьмәʼтерʼа гот: «Гәли щьһуйа у һʼәмуйед кӧ Оршәлимеда дьминьн! Бьра әв йәка ԝәва әʼйан бә у гӧһ бьдьнә хәбәред мьн.

¹⁵Әвана нә сәрхԝәш ьн, чаԝа кӧ һун дьфькьрьн, һе сьбәһ зу сьһʼәт нәһә йә[13].

¹⁶Ле әва әԝ йәк ә, чь кӧ Йоел пʼехәмбәр готийә:

¹⁷‹Рʼожед ахьрийеда Хԝәде дьбежә ԝе аһа бә: Әзе жь Рʼӧһʼе Хԝә сәр һʼәму мәрьвада бьбариньм, кӧрʼ у ԛизед ԝәйе пʼехәмбәртийе бькьн, щаһьлед ԝәйе дитьнока бьбиньн у кал-пиред ԝәйе жи хәԝна.

¹⁸Бәле, Әзе ԝан рʼожада Рʼӧһʼе Хԝә сәр хӧлам у щарийед Хԝәда жи бьбариньм у ԝе пʼехәмбәртийе бькьн.

¹⁹Жор ль әʼзмен тьштед әʼщебмайи бьдьмә кʼьфше у жер сәр әʼрде жи нишана, хун у агьр, ду у духан.

²⁰Рʼойе бьԛарә у һиве жи сор бә мина хуне, һе бәри һатьна Рʼожа Хӧданә мәзьн у навә нишан.

²¹У ԝе ӧса бә, һәр кәсе кӧ гази наве Хӧдан кә ԝе хьлаз бә›[14].

²²Гәли исраелийа, ван хәбәра бьбьһен! Исайе Ньсрәте, мәрьвәки кӧ жь алийе Хԝәдеда кʼьфшкьри бу, Хԝәде пе Ԝи нава ԝәда нишан, кʼәрәмәт у кьред ԛәԝат кьрьн, чаԝа кӧ һун хԝәха жи заньн.

²³Бона Ԝи Хԝәде һе пешда ԛьрар кьрьбу у бь занәбуна Ԝи Әԝ кʼәтә дәсте ԝә, ԝә жи бь дәсте нәрʼаста дармьхе хьст кӧшт[15].

²⁴Ле Хԝәде ԛәйдед мьрьнейә щәфе вәкьрьн, Әԝ жь мьрьне рʼакьр, чьмки мьрьне нькарьбу һʼӧкӧми сәр Ԝи бькьра[16].

²⁵Даԝьд бона Ԝи дьбежә: ‹Мьн тʼьме Хӧдан пешийа хԝә дьдит, чьмки Әԝ ль алийе мьни рʼасте йә, кӧ әз нәлькʼӧмьм.

²⁶Бона ԝе йәке дьле мьн ша бу, зьмане мьн жи жь әшԛа нәсәкьни, бәдәна мьнә мьри жи ԝе бь гӧман бьжи,

²⁷чьмки Тӧ мьн дийаре мьрийада наһели, нә жи Те бьһели кӧ Пирозе Тә бьрʼьзә.

²⁸Тә рʼийед әʼмьр мьнва әʼйан кьрьн у Те шабуна диндара Хԝәва мьн тʼьжи ки›[17].

²⁹Гәли бьра! Һʼәԝщә йә кӧ әз ашкәрә бона Даԝьде бавәʼшир ԝәрʼа бежьм, кӧ әԝ мьр дәфьн кьрьн, тʼьрба ԝи һʼәта рʼожа иро жи нава мәда йә.

³⁰Ле әԝ кӧ пʼехәмбәр бу, ԝи заньбу кӧ Хԝәде бь сонд ԝирʼа соз дайә, ԝе жь бәдәна ԝи Йәки дайнә сәр тʼәхте ԝи[18].

³¹Әԝи әв йәк һе пешда дит у бона рʼабуна Мәсиһ гот, кӧ Әԝе дийаре мьрийада нәминә, нә жи бәдәна Ԝийе бьрʼьзә[19].

³²Әва әԝ Иса бу, йе кӧ Хԝәде Әԝ жь мьрьне рʼакьр, кӧ әм һʼәму жи шәʼдә нә.

³³Хԝәде Әԝ һьлкʼьшанд да кʼеләка Хԝәйә рʼасте, Әԝи жи Рʼӧһʼе Пирози создайи жь Баве станд у жорда баранд, чаԝа кӧ һун ньһа дьбиньн у дьбьһен.

³⁴Рʼаст ә Даԝьд нәчубу әʼзмана, ле ԝи хԝәха әв йәк гот: ‹Хӧдан готә Хӧдане мьн, кʼеләка Мьнә рʼасте рʼуне,

³⁵һʼәта кӧ Әз дьжмьнед Тә бькьмә бьне пʼийед Тә›[20].

³⁶Ньһа бьра тʼәмамийа мала Исраел рʼьнд заньбә әԝ Исайе кӧ ԝә хач кьр, Хԝәде Әԝ һьн кьрә Хӧдан, һьн жи Мәсиһ».

³⁷Щьмәʼте әв йәк кӧ бьһист, мина тирәке дьле ԝан кʼәт, Пәтрус у шандийед майинрʼа готьн: «Әм чь бькьн, гәли бьра?»

³⁸Пәтрус ԝанрʼа гот: «Тʼобә кьн у бьра жь ԝә һәр йәк бь наве Иса Мәсиһ бона бахшандьна гӧна бе ньхӧмандьне у һуне Рʼӧһʼе Пироз пʼешкʼеш бьстиньн.

³⁹Әв соз бона ԝә у зарʼед ԝә йә, ӧса жи бона һʼәмуйед дур ә кӧ Хӧдан Хԝәде мәйе гази ԝан кә».

⁴⁰Пәтрус бь гәләк хәбәред майин бь мәʼрифәти тʼәми да у һиви жь ԝан кьр у гот: «Хԝә жь ви ньсьле нәһәԛ хьлаз кьн».

⁴¹Әԝед кӧ хәбәред ԝи ԛәбул кьрьн, пе аве һатьнә ньхӧмандьне у ԝе рʼоже ԝәкә се һʼәзара ль һәв зедә бун.

⁴²Ԝан тʼьме хԝә ль һинкьрьна шандийа дьгьрт, ль һәв дьщьвийан, нан кәрдькьрьн[21] у дӧа дькьрьн.

⁴³Хоф у тьрс дькʼәтә сәр һәр кәси у бь дәсте шандийа гәләк кʼәрәмәт у нишан дьбун.

⁴⁴Һʼәму баԝәрмәнд һәврʼа бун у һәр тьштед ԝан йәк бу.

⁴⁵Һәбук у мьлкʼе хԝә жи дьфьротьн у бәлайи һʼәмуйед һʼәԝщә дькьрьн.

⁴⁶Һәр рʼож бь тʼьфаԛ дьчунә пʼарьстгәһе, малада нан кәрдькьрьн у әшԛ-ша бь дьле сах хԝарьн дьхԝарьн,

⁴⁷шькьрийа хԝә Хԝәде данин у тʼәмамийа щьмәʼте ль ԝан хԝәш бу. Хӧдан жи рʼож бь рʼож һʼәсабе хьлазбуйийа зедә дькьр.