Read Пәймана Ну (Инщил) Кʼаред Шандийа 21 Bible Online

Кʼаред Шандийа 21 - Пәймана Ну (Инщил) bible

Кʼаред Шандийа 21

¹Гава әм жь ԝан ԛәтийан, бь гәмийе рʼекʼәтьн, рʼаст чун гьһиштьнә Косе, рʼожа дьне Рʼодосе у жь ԝьр Патарайе.

²Мә гәмик дит кӧ дьчу Финикйайе, әм кʼәтьнә ԝе рʼекʼәтьн.

³Гава Ԛӧбрьсе хӧйа кьр, мә әԝ мьле чʼәпева һьшт. Әм бәрбь ԛәза Сурйайе чун гьһиштьнә бажаре Суре, чьмки баре гәмийе ԝьр гәрәке бьһата валакьрьне.

⁴Мә шагьрт дитьн, әм һʼәфт рʼожа ль ԝьр ман. Ԝана бь Рʼӧһʼе Пироз дьготә Паԝлос кӧ нәчә Оршәлиме.

⁵Ле гава мә әԝ рʼож дәрбаз кьрьн, әм рʼабун чун у һʼәмуйа жьна у зарʼава һʼәта бажер дәр әм вәрʼекьрьн у дәве бәʼре мә чок да дӧа кьр.

⁶Паше мә хатьре хԝә жь һәв хԝәст кʼәтьнә гәмийе, әԝана жи вәгәрʼийанә малед хԝә.

⁷Мә рʼеԝити бь гәмийе жь Суре думайи кьр, әм гьһиштьнә Пьтолемайе, мә ԝьр хушк-бьра сьлав кьрьн, әм рʼожәке манә щәм ԝан.

⁸Рʼожа дьн әм жь ԝьр рʼекʼәтьн чунә Ԛәйсәрийе мала Филипойе мьзгиндар, әԝ йәк жь ԝан һәр һʼәфт кʼомәкдаред кʼьфшкьри бу[125]. Әм ль щәм ԝи ман.

⁹Чар ԛизед ԝийә бькʼьр һәбун, кӧ пʼехәмбәрти дькьрьн.

¹⁰Гава әм гәләк рʼожа ль ԝьр ман, жь Щьһустане пʼехәмбәрәки наве ԝи Һагабо бәржер бу[126].

¹¹Гава һатә щәм мә, ԛайиша пьшта Паԝлос һьлда, дәст у пʼийед хԝә гьреда у гот: «Рʼӧһʼе Пироз аһа дьбежә: ‹Әԝ мәрьве хԝәйе ве ԛайише щьһуйе Оршәлимеда аһа ԝи гьредьн у бьдьнә дәсте нәщьһуйа›».

¹²Гава әв йәк мә бьһист, тʼәви йед ԝьр мә лава кьр, кӧ әԝ һьлнәкʼьшә нәчә Оршәлиме.

¹³Ле Паԝлос щаб да у гот: «Һун чь дькьн? Чьма һун дьгьрин у дьле мьн дьшкеньн? Әз Оршәлимеда бона наве Хӧдан Иса нә кӧ тʼәне бона гьредане, ле бона кӧштьне жи һазьр ьм».

¹⁴Гава мә нькарьбу әԝ банийа сәр йа хԝә, мә дәнге хԝә бьрʼи у гот: «Бьра әʼмьре Хӧдан бә».

¹⁵Чәнд рʼожа шунда мә кʼаре хԝә кьр, әм һьлкʼьшийан чунә Оршәлиме.

¹⁶Тʼәви мә чәнд шагьртед Ԛәйсәрийе жи һатьн, әм бьрьнә мала шагьртәки зува, кӧ наве ԝи Мьнасо бу, жь Ԛӧбрьсе, ԝәки әм ль ԝьр бьминьн,

¹⁷Гава әм гьһиштьнә Оршәлиме, баԝәрмәнда әм әшԛ у ша ԛәбул кьрьн.

¹⁸Рʼожа дьне Паԝлос тʼәви мә чу щәм Аԛуб, һʼәму бәрпьрсийар жи һазьр бун.

¹⁹Паԝлос сьлав да ԝан, йәк-йәк чь кӧ Хԝәде бь ԛӧльхе ԝи нава нәщьһуйада кьрьбу, ԝанарʼа гьли кьр.

²⁰Ԝана кӧ әв йәк бьһист, шькьри данә Хԝәде у ӧса жи Паԝлосрʼа готьн: «Дина хԝә бьде, чьԛас һʼәзара щьһуйед баԝәрмәнд һәнә у һʼәму жи хирәткʼешед Ԛануне нә.

²¹Аԝа ԝана бона тә бьһистийә кӧ тӧ һʼәму щьһуйед нава нәщьһуйада һин дьки, кӧ дәст жь Ԛануна Муса бькʼьшиньн у дьбежи кӧ әԝ кӧрʼед хԝә сьнәт нәкьн у пәй әʼдәт жи нәчьн.

²²Ньһа әм чь бькьн? Ԝе әʼсә бьбьһен кӧ тӧ һатийи.

²³Дә рʼабә әм чь тәрʼа дьбежьн бькә. Вьр щәм мә чар мәрьв һәнә кӧ ад-ԛьрар[127] кьрьнә.

²⁴Ԝан хԝәрʼа һьлдә, тʼәви ԝан ль гора әʼдәт паԛьж бә у хәрще ԝан һьлдә сәр хԝә, кӧ пʼорʼе сәре хԝә кӧрʼ кьн. Һьнге һәр кәсе заньбә әԝ тьштед кӧ бона тә бьһистьнә дәрәԝ ьн у тӧ хԝәха жи пәй Ԛануна Муса дьчи.

²⁵Ле бона ԝан нәщьһуйед кӧ һатьнә сәр баԝәрийе, мә ԝанрʼа ԛьрара хԝә ньвисийә шандийә, ԝәки әԝ һʼәвза хԝә жь ԝан ԛӧрбанед пʼутпʼарьстийе, хуне, гоште мьрар у бенамусийе бькьн»[128].

²⁶Һьнге Паԝлос әԝ мәри рʼожа дьне һьлдан, тʼәви ԝан паԛьж бу, кʼәтә пʼарьстгәһе у хьлазийа рʼожед паԛьжбуне да әʼламкьрьне, кӧ ԝе кʼәнге бона ԝан һәр кәси һʼәди[129] бе дайине.

²⁷Гава һәр һʼәфт рʼож сәр һәвда һатьн, жь щьһуйед ԛәза Асйайе Паԝлос пʼарьстгәһеда дитьн, тʼәмамийа әʼлаләте тʼәврʼакьрьн, дәст авитьне

²⁸у кьрьнә ԛирʼин готьн: «Һәԝар, исраелино! Аликʼарийе бькьн! Әва әԝ мәрьв ә, йе кӧ ль һәр дәра һʼәмуйа мьԛабьли щьмәʼта мә, Ԛануна Муса у ви щийи һин дькә, һе сәрда жи йунан кьрьнә пʼарьстгәһе, әв щийе пироз һʼәрʼьманд».

²⁹Әв йәка готьн, чьмки пешийе бажерда Трофимойе жь Әфәсе тʼәви ԝи дитьбун у ԝан тʼьре Паԝлос әԝ кьрийә пʼарьстгәһе.

³⁰Тʼәмамийа бажер һʼәжийа, әʼлаләт бь ләз кʼом бу, Паԝлос гьртьн жь пʼарьстгәһе кʼаши дәрва кьрьн у дәред ԝе перʼа-перʼа һатьнә гьртьне.

³¹Гава ԝан дькьр кӧ ԝи бькӧжьн, щаб гьһиштә сәрһʼәзаре рʼәфа әскәра, ԝәки тʼәмамийа Оршәлиме тʼәвиһәв буйә.

³²Әԝи перʼа-перʼа әскәр у сәрсәд һьлдан, бь ләз чу сәр ԝан. Гава ԝана сәрһʼәзар әскәрава дитьн, дәст жь Паԝлос кʼӧтане кʼьшандьн.

³³Ԝи чахи сәрһʼәзар һатә незик, әԝ гьрт, әʼмьр кьр кӧ бь дӧ зьнщира ԝи гьредьн. Һьнге пьрси: «Әв кʼи йә у чь кьрийә?»

³⁴Нава әʼлаләтеда бона ԝи һәр йәки щурʼәки дькьрә ԛарʼә-ԛарʼ. Әԝи гава жь дәст ԛалмә-ԛалма щьмәʼте нькарьбу әʼсәйи бьзаньбуйа, әʼмьр кьр ԝи бьбьнә әскәрхане.

³⁵Гава Паԝлос гьһиштә пʼепәлинга, әскәра әԝ бьльндкьри бьрьн, чьмки әʼлаләте зор дьда ԝи,

³⁶ль пәй ԝи дьчун, дькьрьнә ԛирʼин у дьготьн: «Ԝи бькӧжьн!»

³⁷Иди Паԝлос ԝе бьбьрана һьндӧрʼе әскәрхане, әԝи сәрһʼәзаррʼа гот: «Изьна мьн һәйә тʼәви тә хәбәр дьм?» Әԝи гот: «Тӧ йунани жи зани?

³⁸Кӧ ӧса йә тӧ нә әԝи мьсьри йи, йе кӧ чәндәк пешда кьрә шәрʼ-дәʼԝ, чар һʼәзар ԛачахед меркӧж дәрхьстьнә бәрʼийе».

³⁹Паԝлос гот: «Әз мәрьвәки щьһу мә, жь Тарсуса Киликйайе, нә бажарванәки бе нав-нишан ьм. Әз һиви жь тә дькьм, изьне бьдә кӧ әз ве щьмәʼтерʼа хәбәр дьм».

⁴⁰Гава әԝи изьн да, Паԝлос сәр пʼепәлинга сәкьни, дәсте хԝә бьльнд кьр, щьмәʼте кӧ дәнге хԝә бьрʼи, әԝи бь зьмане ибрани хәбәр да у гот: