Read Пәймана Ну (Инщил) Кʼаред Шандийа 22 Bible Online

Кʼаред Шандийа 22 - Пәймана Ну (Инщил) bible

Кʼаред Шандийа 22

¹«Гәли бав у бьра! Ньһа гӧһдарийа мьн бькьн, кӧ әз щаба хԝә бьдьм».

²Гава бьһистьн кӧ әԝ ԝанарʼа бь зьмане ибрани кʼәтә хәбәрдане, кәрʼ бун һе дәнге хԝә бьрʼин. У ԝи гот:

³«Әз мәрьвәки щьһу мә, бажаре Тарсуса Киликйайеда жь дийа хԝә бумә, ле ви бажарида бьн дәсте Гамалйелда чаԝа шагьрт мәзьн бумә у һʼәму Ԛануна кал-бава жи бь фәсал-рʼаст һин бумә, һьндава Хԝәдеда жи хԝәйихирәт бум, чаԝа кӧ һун һʼәму иро[130].

⁴Мьн һʼәта кӧштьне жи йед кӧ пәй ве Рʼе дьчун, дьзерандьн у ԛьсьме жьн у мера гьредьдан давитьнә кәле[131],

⁵чаԝа сәрәккʼаһин у тʼәмамийа щьвина рʼуспийа жи шәʼде мьн ьн. Мьн сәр бьрайед щьһутийедайә Шаме нәʼмә жь ԝан һьлдабун дьчум ԝәки йед ԝьр жи гьредайи биньмә Оршәлиме кӧ бьдьнә щәзайе.

⁶Гава әз һе рʼе дьчум, незики Шаме бум, рʼо нава рʼоже ньшкева жь әʼзмен дора мьн рʼонайикә ԛайим шәԝԛ да.

⁷Әз кʼәтьмә әʼрде у мьн дәнгәк бьһист кӧ мьнрʼа гот: ‹Шаԝул! Шаԝул! Тӧ чьма Мьн дьзерини?›

⁸Мьн ле вәгәрʼанд: ‹Тӧ кʼи йи, Хӧдан?› Әԝи мьнрʼа гот: ‹Әз Исайе Ньсрәте мә, Йе кӧ тӧ дьзерини›.

⁹Әԝед тʼәви мьн жи рʼонайи дитьн, ле дәнге кӧ мьнрʼа хәбәр дьда нәдьбьһистьн.

¹⁰Һьнге мьн гот: ‹Әз чь бькьм, Хӧдан?› Хӧдан мьнрʼа гот: ‹Рʼабә һәрʼә Шаме у ль ԝьр һәр тьште кӧ бона тә кʼьфшкьри йә бьки, ԝе тәрʼа бе готьне›.

¹¹Мьн кӧ жь дәст шәԝԛа ԝе рʼонайе нәдьдит, һьнге йед тʼәви мьн дәсте мьн гьртьн, әз бьрьмә Шаме.

¹²Йәки наве ԝи Һананийа, анәгори Ԛануне хԝәдехоф, нав щьһуйед Шамеда жи әԝ хԝәйийе шәʼдәтийа ԛәнщ бу,

¹³әва һат щәм мьн сәкьни у гот: ‹Шаԝул бьра, бьбинә!› Мьн дәстхԝәда дит у ль ԝи ньһерʼи.

¹⁴Әԝи мьнрʼа гот: ‹Хԝәдейе кал-бавед мә тӧ кʼьфш кьри кӧ әʼмьре Ԝи бьзаньби у Йе Рʼаст бьбини, хәбәра дәве Ԝи бьбьһейи,

¹⁵чьмки те бәр һʼәму мәрьва бона ԝан тьштед тә дитьн у бьһистьн бьби шәʼде Ԝи.

¹⁶Иди чьма дәрәнги дехи? Рʼабә ԝәрә ньхӧмандьне, гази наве Ԝи кә жь гӧнед хԝә ԝәрә шуштьне›.

¹⁷Гава әз вәгәрʼийамә Оршәлиме у пʼарьстгәһеда дӧа дькьр, мина сьһʼәте сәр мьнрʼа дәрбаз бу,

¹⁸мьн Әԝ дит у Ԝи мьнрʼа гот: ‹Бькә бьләзинә жь Оршәлиме дәре, чьмки әԝ шәʼдәтийа кӧ те бона Мьн бьди әԝе ԛәбул нәкьн›.

¹⁹Мьн гот: ‹Хӧдан, әԝ ԛәнщ заньн кӧ әз бум, әԝи һʼәму кʼьништада йед баԝәрийа хԝә Тә данин, давитьнә кәле у әԝ дькʼӧтан.

²⁰Гава хуна Стәйфане шәʼде Тә дьрʼьжийа, әз хԝәха жи ԝьр һазьр у рʼази бум, мьн нобәдари кʼьнщед йед әԝ кӧштьн дькьр›[132].

²¹Һьнге Әԝи мьнрʼа гот: ‹Һәрʼә, Әзе тә бьшиньмә дур щәм нәщьһуйа›».

²²Һʼәта ван хәбәра әʼлаләте гӧһдарийа ԝи кьр, паше бь дәнге бьльнд готьн: «Рʼубари дьне ԝи нәһелә! Йед мина ԝи гәрәке нәжин!»

²³Ԝана дькьрьнә ԛирʼин, кʼьнще хԝә дьԛәлаштьн давитьн у хԝәли дьрʼәшандьнә һәԝа.

²⁴Сәрһʼәзар әʼмьр кьр, кӧ ԝи бьбьнә әскәрхане у гот: «Бьдьн бәр ԛамчийа же бьпьрсьн, бьзаньбьн кʼа суще ԝи чь йә, ԝәки ӧса сәр ԝи дькьнә ԛарʼә-ԛарʼ».

²⁵Гава бь ԛайишед чʼәрм гьредан, Паԝлос сәрсәде сәкьнирʼа гот: «Гәло әва щайиз ә кӧ һун ль бажарванәки Рʼомайе хьн, йе кӧ һе диԝана ԝи нәбуйә?»

²⁶Сәрсәд гава әв йәк бьһист, чу щәм сәрһʼәзар у гот: «Тӧ чь дьки? Әва мәрьва бажарване Рʼомайе йә».

²⁷Сәрһʼәзар незики Паԝлос бу у ԝирʼа гот: «Мьнрʼа бежә, тӧ бажарване Рʼомайе йи?» Әԝи гот: «Бәле».

²⁸Сәрһʼәзар ле вәгәрʼанд у гот: «Мьн бь гәләк пʼәра әԝ бажарванти стандийә». Паԝлос гот: «Ле әз йәкрʼожийа хԝәда бажарване ԝьр ьм».

²⁹У дәстхԝәда әԝед кӧ ԝе лехьстана у гьли же бькʼьшандана жь ԝи дур кʼәтьн. Сәрһʼәзар хԝәха жи тьрсийа, гава бьһист кӧ бажарване Рʼомайе йә, чьмки әԝи әԝ дабу гьредане.

³⁰Сьбәтьра дьн сәрһʼәзар хԝәст рʼаст бьзаньбә кʼа щьһу чьма шькийате Паԝлос дькьн. Әԝ бәрʼда у әʼмьр кьр, кӧ сәрәкед кʼаһина щьвина гьрәгьрава бе. Һьнге Паԝлос ани ль бәр ԝан да сәкьнандьне.