Read Пәймана Ну (Инщил) Кʼаред Шандийа 25 Bible Online

Кʼаред Шандийа 25 - Пәймана Ну (Инщил) bible

Кʼаред Шандийа 25

¹Пәй се рʼожарʼа, гава Фесто дәрбази сәр ԛӧльха хԝә бу, әԝ жь Ԛәйсәрийе һәвраз чу Оршәлиме.

²Сәрәкед кʼаһина у гьрәгьред щьһуйа бона Паԝлос шькийате хԝә ль ԝи кьрьн

³у һиви кьрьн кӧ бькә ԛәнщи ԝи бинә Оршәлиме, чьмки ԝана тʼәләк чекьрьбу кӧ рʼева ԝи бькӧжьн.

⁴Ле Фесто ль ԝан вәгәрʼанд у гот: «Паԝлос ԝе ль Ԛәйсәрийе гьрти бьминә у әзе хԝәха жи зутьре һәрʼьмә ԝьр.

⁵Аԝа бьра сәрԝеред ԝә тʼәви мьн бәржер бьн у һәгәр нәһәԛикә ԝи мәрьви жи һәбә, бьра гӧнәкʼарийа ԝи бежә».

⁶Ԝьр нәһә-дәһә рʼожа нав ԝанда ма, паше бәржер чу Ԛәйсәрийе, рʼожа дьн ль һәрәма диԝане рʼуньшт, әʼмьр кьр кӧ Паԝлос биньн.

⁷Гава Паԝлос һат, щьһуйед кӧ жь Оршәлиме бәржер һатьбун дора ԝи гьртьн у гәләк бӧхданед гьран ль ԝи дькьрьн, ле нькарьбун избат кьрьна.

⁸Паԝлос щаба хԝә да у гот: «Мьн һьндава Ԛануна щьһуйа йан пʼарьстгәһе йан жи Ԛәйсәрда тʼӧ нәһәԛи нәкьрийә».

⁹Фесто жи хԝәст кӧ щьһуйарʼа ԛәнщийе бькә, ль Паԝлос вәгәрʼанд у гот: «Тӧ дьхԝази һәвраз һәрʼи Оршәлиме, кӧ бона ван тьшта диԝана тә бәр мьн ԝьр бе кьрьне?»

¹⁰Паԝлос гот: «Әз ль бәр диԝана Ԛәйсәр сәкьни мә, ль кʼӧ жи диԝана мьн гәрәке бьбә. Мьн хьрабик ль щьһуйа нәкьрийә, чаԝа тӧ хԝәха жи ԛәнщ зани.

¹¹Аԝа һәгәр әз нәһәԛ ьм у мьн тьштәки ӧса кьрийә кӧ гәрәке бемә кӧштьне, әз жь мьрьне вәнакʼьшьм, ле һәгәр нәһәԛийа мьн ве йәкеда тʼӧнә, чаԝа кӧ әԝана шәрʼа давежьнә мьн, кәс нькарә мьн бьдә дәсте ԝан. Әз дәʼԝа диԝана Ԛәйсәр дькьм».

¹²Һьнге Фесто тʼәви ширәткʼара хәбәр да, паше ль ԝи вәгәрʼанд у готе: «Тӧ дәʼԝа Ԛәйсәр дьки, гәрәке тӧ һәрʼи щәм Ԛәйсәр».

¹³Чәнд рʼож дәрбаз бун, Әгрипа пʼадша у Бәрньке һатьнә Ԛәйсәрийе, кӧ Фесто сьлав кьн.

¹⁴Гава гәләк рʼож ль ԝьр дәрбаз кьрьн, Фесто бона Паԝлос әʼлами пʼадше кьр у гот: «Вьр мәрьвәк һәйә кӧ жь һена Фәликсда әԝ гьрти майә.

¹⁵Гава әз чумә Оршәлиме, сәрәкед кʼаһина у рʼуспийед щьһуйа шькийате ԝи бәр мьн кьрьн у һиви кьрьн кӧ әз диԝана ԝи бькьм.

¹⁶Мьн ль ԝан вәгәрʼанд у гот, ԝәки нә әʼдәте рʼомайийа йә кӧ мәрьвәки бехәда бьдьнә дәр, һʼәта мәщале нәдьнә йе гӧнәкʼар, кӧ ль бәр шькийаткьред хԝә бьсәкьнә у рʼу бь рʼу бәр ԝан щаба хԝә бьдә.

¹⁷Гава әԝана һатьнә вьра, мьн дәрәнги нәехьст, рʼожа дьне әз ль һәрәма диԝане рʼуньштьм у мьн әʼмьр кьр, кӧ ԝи мәрьви биньн.

¹⁸Гава йед кӧ әԝ гӧнәкʼар дькьрьн рʼабун кӧ хәбәр дьн, мьн бона чь хьрабийед кӧ шьк дьбьрә ԝи, тʼӧ кәси бона ԝан йәка тьштәк нәгот.

¹⁹Ле дәʼԝа ԝан тʼәви ԝи бона пьрса һʼәбандьна ԝан бу у сәр Исаки мьри, кӧ Паԝлос дьбежә Әԝ сах ә.

²⁰Һьнге мьн ньзаньбу кӧ чаԝа әв пьрсана әʼсәйи бькьрана, мьн жь ԝи пьрси: ‹Тӧ дьхԝази һәрʼи Оршәлиме, кӧ бона ван тьшта бәр диԝане бьсәкьни?›

²¹Ле чахе Паԝлос хԝәст кӧ шьхӧле ԝи һәрʼә бәр Ԛәйсәр у бе леньһерʼандьне, мьн әʼмьр кьр кӧ әԝ гьрти бьминә, һʼәта кӧ әз ԝи бьшиньмә щәм Ԛәйсәр».

²²Әгрипа Фесторʼа гот: «Мьн жи дьхԝәст хәбәрдана ԝи мәрьви бьбьһиста». Әԝи жи гот: «Те сьбе ԝи бьбьһейи».

²³Рʼожа дьне Әгрипа у Бәрньке бь рʼәԝша мәзьн тʼәви сәрһʼәзар у гьрәгьред бажер һатьнә кʼочʼьксәре, Фесто әʼмьр кьр у Паԝлос анин.

²⁴Фесто гот: «Әгрипа пʼадша у һʼәмуйед һазьр! Һун ви дьбиньн, тʼәмамийа щьмәʼта щьһуйа һьн Оршәлимеда, һьн жи вьра шькийате ви бәр мьн дькьрьн у дькьрьнә ԛирʼин дьготьн: ‹Әԝ гәрәке сах нәминә!›

²⁵Ле мьн кʼьфш кьр кӧ әви тьштәки ӧса нәкьрийә кӧ бе кӧштьне у хԝәха жи дәʼԝа диԝана Ԛәйсәр дькә, мьн ԛьрар кьр кӧ ԝи бьшиньм.

²⁶Ле бона ви тьштәки әʼсәйи тʼӧнә хԝәйе хԝәрʼа бьньвисьм, бона ве йәке мьн әв ани бәр ԝә, илаһи бәр тә Әгрипа пʼадша, ԝәки әв йәк диса бе леньһерʼандьне, һьнге тьштәки мьни ньвисаре ԝе һәбә.

²⁷Чьмки тьштәки бе аԛьли йә, һәгәр әз гьртики бьшиньм у бона суще ԝи тьштәки нәньвисьм».