Read Пәймана Ну (Инщил) Кʼаред Шандийа 26 Bible Online

Кʼаред Шандийа 26 - Пәймана Ну (Инщил) bible

Кʼаред Шандийа 26

¹Һьнге Әгрипа Паԝлосрʼа гот: «Изьна тә һәйә кӧ тӧ бона хԝә хәбәр ди». Ԝе дәме Паԝлос дәсте хԝә бьльнд кьр, щаба хԝә да.

²«Әгрипа пʼадша, бона һʼәму шькийатед кӧ щьһу ль мьн дькьн, әз иро хԝә бәхтәԝар һʼәсаб дькьм кӧ бәр тә сәкьни мә щаба хԝә дьдьм,

³илаһи ве пьрседа кӧ тӧ һаш жь һʼәму әʼдәт у пьрсед щьһуйа һәйи. Бона ве йәке әз жь тә һиви дькьм, бь сәбьр гӧһдарийа мьн бьки.

⁴Һʼәму щьһу заньн кӧ мьн чаԝа әʼмьре хԝә жь зарʼотийа хԝәда гьрти нава мьләте хԝә у ль Оршәлимеда дәрбаз кьрийә.

⁵Әԝана зува мьн нас дькьн, һәгәр бьхԝазьн, дькарьн шәʼдәтийе бьдьн, ԝәки әз анәгори әʼдәте кʼомәла дине мәйи һʼьшк жи ферьси бумә.

⁶У ньһа жи бона гӧмана ԝи созе кӧ Хԝәде дайә кал-бавед мә диԝана мьн те кьрьне,

⁷хут бона ԝи созе кӧ һәр донздәһ әʼширед мә бь дьл у щан, шәв у рʼож Хԝәде һʼәбандьнә, ԝәки бьгьһижьнә әԝе йәке. Бәле бона ве гӧмане йә, кӧ щьһу шькийате мьн дькьн, пʼадшайи хԝәш бә.

⁸Һун чьма нькарьн баԝәр бькьн, кӧ Хԝәде ԝе мьрийа жь мьрьне рʼакә?

⁹Мьн хԝәха жи кьрьбу дәйне стуйе хԝә, кӧ мьԛабьли наве Исайе Ньсрәте гәләк тьшт бькьра

¹⁰у мьн Оршәлимеда кьр жи. Мьн жь сәрәкед кʼаһина һʼӧкӧм станд у гәләкед жь щьмәʼта Хԝәде давитьнә кәле у гава дьһатьнә кӧштьне, мьн жи дәнге хԝә дьда.

¹¹Һʼәму кʼьништада гәләк щара мьн әԝ дьданә щәзайе у дькьр кӧ зоре бьдьмә ԝан кӧ ԝе баԝәрийа хԝә инкʼар кьн. Мьн кʼина ԝан гьртьбу, һʼәта бажаред хәрибда жи әԝ дьзерандьн[139].

¹²Аԝа әз щарәке бь һʼӧкӧм у әʼмьре сәрәкед кʼаһина дьчумә Шаме.

¹³Рʼож нивро бу, пʼадшайи хԝәш бә, рʼева мьн дит жь әʼзмен рʼонайикә жь рʼонайийа тәʼве зортьр дора мьн у йед тʼәви мьн дьһатьн шәԝԛ да.

¹⁴Әм һʼәму кʼәтьнә әʼрде, мьн дәнгәк бьһист кӧ бь зьмане ибрани мьнрʼа гот: ‹Шаԝул! Шаԝул! Тӧ чьма Мьн дьзерини? Тӧ бь кʼӧлме нькари һәрʼи дьреше[140]›.

¹⁵Мьн гот: ‹Тӧ кʼи йи, Хӧдан?› Хӧдан гот: ‹Әз әԝ Иса мә, Йе кӧ тӧ дьзерини.

¹⁶Ньһа рʼабә сәр ньгед хԝә, Әз бона ԝе йәке тәва хӧйа бум, кӧ тә бькьмә бәрдәстийе Хԝә у шәʼде ԝи тьште кӧ тә дит у ԝан тьштед кӧ Әзе паше бәр тә вәкьм.

¹⁷Әзе тә жь дәсте щьмәʼта Исраеле у нәщьһуйа хьлаз кьм. Ва Әз тә дьшиньмә нава ԝан,

¹⁸ԝәки чʼәʼвед ԝан вәки, жь тәʼристанийе бәрбь рʼонайе у жь һʼӧкӧме мирещьн бәрбь Хԝәде вәгәрʼини, ԝәки бь сайа ԝе баԝәрийа сәр мьн, гӧнед ԝан бенә бахшандьне у тʼәви пʼара щьмәʼта Мьн бьн›.

¹⁹Аԝа Әгрипа пʼадша, әз мьԛабьли ԝе дитьна ль бәрчʼәʼвайә жь әʼзмен нәсәкьним.

²⁰Ле мьн пешийе йед Шаме, Оршәлиме у тʼәмамийа тʼопрахед Щьһустанерʼа даннасин кьр, ӧса жи нәщьһуйарʼа, кӧ тʼобә кьн бәрбь Хԝәде вәгәрʼьн у кьред ԛәнщ бькьн, ԝәки бе кʼьфше әԝ жь гӧнәкьрьне вәгәрʼийанә[141].

²¹Бона ве йәке щьһуйа әз пʼарьстгәһеда гьртьм, хԝәстьн мьн бькӧжьн.

²²Ле мьн жь Хԝәде кʼомәк станд у һʼәта иро әз мамә, шәʼдәтийе дьдьмә бьчʼук у мәзьна. Тьштәки зедә жи жь ԝан тьштед кӧ пʼехәмбәра у Муса готьбун ԝе бьбьн, мьн нәготийә:

²³Гәрәке Мәсиһ щәфа бькʼьшанда, бьбуйа йе пешьн жь нава мьрийа рʼабуйи у рʼонайа хьлазбуне мьләтед щьһу у нәщьһуйарʼа даннасин кьра»[142].

²⁴Гава Паԝлос аһа щаба хԝә да, Фесто бь дәнге бьльнд гот: «Тӧ хԝә ӧнда дьки, Паԝлос! Пʼьрʼхԝәндьна тә тә ӧнда дькә».

²⁵Паԝлос готе: «Әз хԝә ӧнда накьм Фестойе хԝәйиԛәдьр, ле хәбәред рʼаст у че дьбежьм.

²⁶Пʼадша һаш жь ван тьшта һәйә, ләма жи әз аза хәбәр дьдьм у баԝәр накьм кӧ тьштәк жь ԝи вәшарти мабә, чьмки әв йәка ԛӧлчʼәкида нәбуйә.

²⁷Әгрипа пʼадша, тӧ пʼехәмбәра баԝәр дьки? Заньм кӧ тӧ баԝәр дьки».

²⁸Әгрипа Паԝлосрʼа гот: «Тә тʼьре тӧ ӧса зу дькари мьн бьки мәсиһи?»[143]

²⁹Паԝлос гот: «Әз һиви жь Хԝәде дькьм, зу-дәрәнг нә кӧ тʼәне тӧ, ле һʼәмуйед кӧ иро гӧһдарийа мьн дькьн, ӧса бьн чаԝа әз ьм, пештьри ван ԛәйда».

³⁰Һьнге пʼадша рʼабу пʼийа, ԝәли, Бәрньке у һʼәмуйед тʼәви ԝи рʼуньшти жи перʼа.

³¹Әԝ дәркʼәтьнә дәрва, һәврʼа хәбәр дан у готьн: «Әва мәрьва тьштәки ӧса накә кӧ бе кӧштьне йан гьртьне».

³²Ле Әгрипа Фесторʼа гот: «Мә дькарьбу әва мәрьва бәрʼда, һәгәр әви дәʼԝа диԝана Ԛәйсәр нәкьра».