Read Пәймана Ну (Инщил) Кʼаред Шандийа 27 Bible Online

Кʼаред Шандийа 27 - Пәймана Ну (Инщил) bible

Кʼаред Шандийа 27

¹Гава ԛьрар кьрьн кӧ әм бь гәмийе һәрʼьнә Италйайе, Паԝлос у чәнд гьртийед дьн данә дәсте сәрсәдәки жь рʼәфа әскәред Ԛәйсәр, наве ԝи Йулйо.

²Әм кʼәтьнә гәмикә жь Әдрәмите, кӧ ԝе гәмиԝаргәһед ԛәза Асйайева бьчуйа у рʼекʼәтьн. Әристархойе мәкәдони жи жь Тʼесалонике мәрʼа бу.

³Рʼожа дьне әм Сайдайе пәйа бун, Йулйо ԛәнщи Паԝлосрʼа кьр, изьн да кӧ һәрʼә щәм достед хԝә, ԝәки бона ԝи хәм бькьн.

⁴Жь ԝьр рʼекʼәтьн, дәст байе пешийа мә, әм тәʼлде Ԛӧбрьсерʼа дәрбаз бун.

⁵Гава әм нава бәʼра пешбәри Киликйайе у Памфилйайева дәрбаз бун, гьһиштьнә Ликйайе, бажаре Мирайе.

⁶Ԝьр сәрсәд гәмикә Скәндәрйайе дит кӧ дьчу Италйайе, әм кьрьнә ԝе гәмийе.

⁷Һеди-һеди гәләк рʼожада әм бь зорәке незики Кьнидйайе бун. Бе кӧ рʼе нәдьда мә, әм бьнатʼара Кьретайе бәр Салмонерʼа дәрбаз бун.

⁸Әм бь зорәке ԝьррʼа дәрбаз бун гьһиштьнә щики, кӧ жерʼа дьбежьн Гәмиԝаргәһед Бәдәԝ, кӧ незики бажаре Ласәйайе бу.

⁹Гәләк ԝәхт кӧ ль ԝьр дәрбаз бу, рʼеԝитийа гәмийе жи бь ԛәзийава гьредайи бу, Рʼожа Рʼожийа[144] жи иди дәрбаз бьбу. Паԝлос ширәт ль ԝан кьр у гот:

¹⁰«Гәли мәрьва! Әз дьбиньм кӧ әв рʼеԝитийа бь гәмийе гәләк зийане у щәфава гьредайи йә, нә кӧ тʼәне бона бар у гәмийе, ле бона әʼмьре мә жи».

¹¹Ле сәрсәд һе гӧрʼа гәмиван у хԝәйе гәмийе дькьр, нә кӧ хәбәред Паԝлос.

¹²Әԝ гәмиԝаргәһ бона дәрбазкьрьна зьвьстане нә ԛәнщ бу, ләма жи гәләка жь ԝан ԛьрара хԝә да кӧ жь ԝьр һәрʼьн, бәлки бькарьбьн бьгьһижьнә бажаре Финиксе у ль ԝьр зьвьстане дәрбаз кьн. Әва бажара гәмиԝаргәһәкә гьрава Кьретайе йә, кӧ ль башур-рʼоавайе у бакӧр-рʼоавайе дьньһерʼә.

¹³Гава байе башурейи нәрм һат, ԝана тʼьре иди гьһиштьнә мәрәме хԝә, ләнгәрә кʼьшандьн рʼекʼәтьн у хԝә ль һешийа Кьретайе гьрти чун.

¹⁴Ле хеләке шунда фьртонәкә ԛайим ль мә рʼабу, кӧ жерʼа дьбежьн Еврикьлон[145].

¹⁵Фьртоне ль гәмийе хьст у гәми нькарьбу мьԛабьли ԝе бьчуйа, дәст же кʼьшанди әм жь бе һатьнә ажотьне.

¹⁶Мә хԝә да бәр тәʼлде гьравәкә бьчʼук, наве ԝе Каԝда, ль ԝьр бь зорәке ԛәйьк гьрт

¹⁷кʼьшандә жор у бь ԝәрьса гәми бьнива шьдандьн. Әԝана тьрсийан кӧ нәбә гәми лила Суртьседа рʼуне, бапʼеш анинә хԝаре у аһа жь бе дьһатьнә ажотьне.

¹⁸Жь дәст ԛайимийа фьртоне, баре гәмийе рʼожа дьн рʼетьнә бәʼре.

¹⁹Рʼожа сьсийа ԝана бь дәсте хԝә һащәтед гәмийе авитьнә бәʼре.

²⁰Әԝ чәнд рʼож бун тәʼв у стәйрк нәдьһатьнә хӧйане, фьртонә жи нәдьсәкьни. Һәйнәсәр бона хьлазбуне гӧмана мә һʼәму һатә бьрʼине.

²¹Әԝ чәнд рʼож бун жи бьрʼчи мабун, Паԝлос нава ԝанда сәкьни у гот: «Гәрәке ԝә гӧрʼа мьн бькьра әʼвдно, жь Кьретайе дәрнәкʼәтана, һьнге ԝәйе әв зийан у щәфа нәкʼьшанда.

²²Ньһа жи әз һиви дькьм, кӧ һун дьл бьдьнә бәр хԝә, чьмки пештьри гәмийе зийане ль мә тʼӧ кәси нәбә.

²³Чьмки һәма ве шәва дәрбазбуйи мьлйакʼәтәки ԝи Хԝәдейе кӧ әз пʼара Ԝи мә у Ԝи дьһʼәбиньм, мьнва хӧйа бу

²⁴у гот: ‹Нәтьрсә, Паԝлос! Гәрәке тӧ ль бәр Ԛәйсәр бьсәкьни. Ва Хԝәде һʼәмуйед тʼәви тә гәмийеда данә хатьре тә›.

²⁵Ньһа дьл бьдьнә бәр хԝә әʼвдно, чьмки әз Хԝәдеда баԝәр ьм, кӧ чаԝа мьнрʼа һатә готьне, ԝе ӧса жи бьбә.

²⁶Ле тʼәне әме бенә ажотьне у бәжа гьравәке хьн».

²⁷Шәва чардәһа бу кӧ әм бәʼра Адрийатикеда жь бе дьһатьнә ажотьне. Ниве шәве гәмивана кʼьфш кьр, кӧ дьгьһиштьнә бәжәке,

²⁸кʼурпив авитьне, дитьн кӧ ԛаси чьл метьри бу, һьнәки жи пешда чун, диса авитьне дитьн кӧ ԛаси си метьри бу.

²⁹Һьнге әм тьрсийан кӧ нәбә әм щики кәвьри хьн, пашийа гәмийева чар ләнгәрә авитьн у бь дӧа чʼәʼвньһерʼийа сьбәһе бун.

³⁰Ле гәмивана хԝәст кӧ жь гәмийе бьрʼәвьн, ԛәйьк жь гәмийе пәйа кьрьн, бь ԝе мәʼнийе йанчийә дьхԝазьн пешийа гәмийева жи ләнгәра бавежьн,

³¹Паԝлос сәрсәд у әскәрарʼа гот: «Һәгәр әвана гәмийеда нәминьн, һун нькарьн хьлаз бьн».

³²Һьнге әскәра капед ԛәйьке ԛәтандьн, бәрʼдан кӧ ԝеда һәрʼә.

³³Бәрбанга сьбәһе Паԝлос һиви жь ԝан һʼәмуйа кьр кӧ нен бьхԝьн у гот: «Әва чардәһ рʼож ә кӧ һун чʼәʼвньһерʼи бьрʼчи манә у ԝә тʼӧ тьшт нәхԝарийә.

³⁴Аԝа әз һиви жь ԝә дькьм, нане хԝә бьхԝьн, кӧ әв жи бона хьлазбуна ԝә йә, тʼеләки пʼорʼе сәре ԝәйе ӧнда нәбә».

³⁵У гава әв йәк гот, нан һьлда ль бәр һʼәмуйа шькьрийа хԝә Хԝәде ани, кәркьр у дәстпекьр хԝар.

³⁶Ԝи чахи бин һатә бәр һʼәмуйа, ԝан жи нан хԝар.

³⁷Әм һʼәму һәврʼа гәмийеда дӧсьд һʼәфте шәш мәри бун.

³⁸Гава нан хԝарьн, тʼер бун, гәньм рʼетьнә бәʼре гәми сьвьк кьрьн.

³⁹Сьбәһ кӧ зәлал бу, әʼрд нас нәдькьрьн, ле дәлавәкә бәʼре рʼачʼәʼв кьрьн, кӧ һешийа ԝе һәбу у дьхԝәстьн бәлки бькарьбьн бьне гәмийе ԝьр әʼрде хьн.

⁴⁰Ләнгәрә жь бьни ԛәтандьн, бәʼреда һьштьн, һьнге жи ԝәрьсед фьтьлокед зьвьрʼандьне кӧ дьгьртьн сьст кьрьн у бапʼеша пеш данә бе, хԝә ль ԝе һешийа бәʼре гьртьн.

⁴¹Ле ль гьрәки бьне аве хьстьн, лиледа рʼуньшт, позе гәмийе теда ма у иди нәһʼәжийа, пьшта ԝе жи жь дәст ԛайимийа пела һурдәхԝәши дьбу.

⁴²Һьнге әскәра ԛьрар кьрьн кӧ гьртийа бькӧжьн, ԝәки собәкʼарийе нәдьн нәрʼәвьн.

⁴³Ле сәрсәд кӧ дьхԝәст Паԝлос хьлаз кьра, нәһьшт кӧ әԝ шеԝьра хԝә биньнә сери. Һьнге әʼмьр кьр кӧ йед собәкʼарийе заньн, пешийе хԝә бавежьнә аве дәренә бәже,

⁴⁴ле йед майин, һьнәк сәр тʼәхта, һьнәк жи сәр пʼарчʼед гәмийе дәрен. У бь ви аԝайи аһа һʼәму хьлаз бун, дәркʼәтьнә бәже.