Read Пәймана Ну (Инщил) Кʼаред Шандийа 28 Bible Online

Кʼаред Шандийа 28 - Пәймана Ну (Инщил) bible

Кʼаред Шандийа 28

¹Гава әм хьлаз бун, һьнге әм пе һʼәсийан, кӧ наве ԝе гьраве Малта йә.

²Бьнәлийед ԝьр гәләк ԛәдьр-һӧрмәт мәрʼа кьрьн, агьр вехьстьн, жь бәр ԝе сәрмайе у барана кӧ дәстпекьр әм ԛәбул кьрьн.

³Һьнге Паԝлос бәрмьлә ԛьрш бәрәв кьр дани сәр егьр, мәʼрәк жь дәст гәрме дәркʼәт, дәв авитә дәсте ԝи гьрт.

⁴Бьнәлийа гава рʼәʼԝьре дәсте ԝива дардабуйи дит, һәврʼа готьн: «Әва рʼасти меркӧж ә, жь бәʼре хьлаз бу, ле хӧдане Һәԛийе нәһьшт кӧ әԝ бьжи».

⁵Ле Паԝлос рʼәʼԝьре дәсте хԝәва даԝшандә нава егьр у зийан ль ԝи нәбу.

⁶Әԝана жи һивийа ԝе йәке бун кӧ ԝе бьԝәрьмә йан ньшкева бькʼәвә бьмьрә, гава гәләки һивийе ман у дитьн кӧ тʼӧ тьшт ль ԝи нәһат, фькьре хԝә гӧһастьн у готьн: «Әва хԝәдек ә».

⁷Ль ԝи щийе дор-бәред ԝан бәргед сәрԝере ԝе гьраве һәбун, кӧ наве ԝи Поплийо бу. Әԝи һӧрмәт мәрʼа кьр, се рʼожа әм щәм хԝә хԝәй кьрьн.

⁸Баве Поплийо тʼайеда бь зькешийе нәхԝәш пʼалдайи бу. Паԝлос чу щәм ԝи, дӧа кьр, дәстед хԝә данинә сәр ԝи у әԝ ԛәнщ кьр.

⁹Гава әв йәка ԛәԝьми, нәхԝәшед майинә ԝе гьраведа жи дьһатьн ԛәнщ дьбун.

¹⁰Ԝана гәләк ԛәдьр-һӧрмәт мәрʼа кьрьн у гава әм рʼекʼәтьн, әԝ тьштед кӧ бона рʼе ԝе кери мә бьһатана мәрʼа дагьртьн.

¹¹Се мәһа шунда әм бь гәмийа Скәндәрйайе рʼекʼәтьн, кӧ ԝе жи зьвьстан ль ԝе гьраведа дәрбаз кьрьбу, шькьле һәр дӧ хӧданед Һәвал-щеԝи[146] жи сәр бу.

¹²Әм гьһиштьнә Сирәкусе, се рʼожа ԝьр ман.

¹³Жь ԝьр жи әм чун гьһиштьнә Рʼегийоме. Рʼожәке шунда байе башуре һат, әм дӧ рʼожада гьһиштьнә Потийоле.

¹⁴Ԝьр мә хушк-бьра дитьн у һиви жь мә кьрьн, кӧ әм һʼәфтеке ԝьр бьминьн. У бь ви аԝайи әм гьһиштьнә Рʼоме.

¹⁵Хушк-бьрайед ԝьр жи бона мә бьһистьбун, пешийа мәда һатьн һʼәта Мәйдана Әпийу у Се Меванхана. Паԝлос кӧ әԝ дитьн, шькьри да Хԝәде у дьле ԝи шьдийа.

¹⁶Гава әм гьһиштьнә Рʼоме[147], изьн данә Паԝлос кӧ тʼәне тʼәви ԝи әскәре кӧ нобәдарийе ԝи дькә бьминә.

¹⁷Се рʼожа шунда Паԝлос гази гьрәгьред щьһуйа кьр, гава әԝ һатьн, ԝанрʼа гот: «Гәли бьра! Мьн тьштәки мьԛабьли щьмәʼте йан кал у бава нәкьрийә, ле Оршәлимеда әз гьртьм дамә дәсте рʼомайийа.

¹⁸Гава әз анимә бәр диԝане, хԝәстьн мьн бәрʼдьн, чьмки сәр мьн бона кӧштьне тʼӧ хьраби нәдитьн.

¹⁹Ле гава щьһуйа мьԛабьли ԝе йәке хәбәр дан, мьн иди бечʼарийа хԝә дәʼԝа Ԛәйсәр кьр, ле нә бона ԝе йәке, кӧ шькийате мьләте хԝә бькьра[148].

²⁰Ләма жи мьн һиви кьр, кӧ ԝә бьбиньм у тʼәви ԝә хәбәр дьм. Бәле әз бона гӧмана Исраеле ван ԛәйд-зьнщирада мә».

²¹Ԝана жи ԝирʼа гот: «Мә бона тә жь Щьһустане нә нәʼмә стандийә, нә жи жь бьрайед мә кәс һатийә бона хьрабийа тә гьли кьрийә йан хәбәр дайә.

²²Ле әм дьхԝазьн жь тә бьбьһен, кʼа бир у баԝәрийа тә чь йә, чьмки бона ԝе кʼомәле мәва иди әʼйан ә кӧ һʼәму щийа мьԛабьли ԝе хәбәр дьдьн».

²³Аԝа рʼожәк кʼьфшкьрьн у ԝе рʼожеда гәләк һатьнә ԝи щийе кӧ Паԝлос теда дьма. Әԝи сьбе һʼәта еваре ԝанарʼа бона Пʼадшатийа Хԝәде шьровәдькьр у бь мәʼрифәти даннасин дькьр, дәрһәԛа Исада жи бь Ԛануна Муса у ньвисаред пʼехәмбәра әԝ дьданә баԝәркьрьне.

²⁴Һьнәка хԝә ль готьнед ԝи гьртьн, һьнәка жи баԝәр нәкьр.

²⁵Аԝа бәри чуйина ԝан нава ԝанда бу дӧтирәти гава Паԝлос әв йәк гот: «Чаԝа рʼаст Рʼӧһʼе Пироз бь Ишайа пʼехәмбәр тʼәви кал-бавед мә хәбәр да

²⁶у гот: ‹Һәрʼә щәм ве щьмәʼте у бежә: Һуне бьбьһен у гӧһ бьдьне, ле фәʼм нәкьн, һуне бьньһерʼьн у дина хԝә бьдьне, ле нәбиньн.

²⁷Чьмки әва щьмәʼта сәрһʼьшк ә, бь гӧһа гьран дьбьһен у чʼәʼвед хԝә гьртьнә, ԝәки бь чʼәʼва нәбиньн, бь гӧһа нәбьһен у бь һʼьш фәʼм нәкьн, вәнәгәрʼьн, кӧ Әз ԝан ԛәнщ кьм›[149].

²⁸Аԝа бьра ԝәва әʼйан бә, ԝәки хьлазкьрьна Хԝәде нәщьһуйарʼа һатә шандьне у әԝе гӧһдарийа Ԝи бькьн»[150].

³⁰Паԝлос тʼам дӧ сала мала хԝәйә кʼьрекьрида ма, кʼи жи дьһатә щәм ԝи, һʼәму ԛәбул дькьрьн.

³¹Әԝи Пʼадшатийа Хԝәде бь меркʼими бе пешигьртьн даннасин дькьр у дәрһәԛа Хӧдан Иса Мәсиһда һин дькьр.