Read Пәймана Ну (Инщил) Кʼаред Шандийа 3 Bible Online

Кʼаред Шандийа 3 - Пәймана Ну (Инщил) bible

Кʼаред Шандийа 3

¹Щарәке Пәтрус у Йуһʼәнна ԝәхте дӧайе сьһʼәта сьсийа һьлдькʼьшийанә пʼарьстгәһе.

²Мәрьвәки жь зькмакийеда ньгада сәԛәт һәбу, кӧ һәр рʼож данин бәр дәргәһе пʼарьстгәһейи кӧ Бәдәԝ дьһатә готьне даданин, кӧ жь йед дьһатьнә пʼарьстгәһе пʼарс кьра.

³Әви кӧ дит Пәтрус у Йуһʼәнна дькʼәвьнә пʼарьстгәһе, лава ԝан кьр кӧ пʼарсе бьдьне.

⁴Пәтрус тʼәви Йуһʼәнна ль ԝи ньһерʼи у готе: «Ль мә бьньһерʼә!»

⁵Әԝи жи ль ԝан ньһерʼи у чʼәʼве ԝи ле бу, кӧ ԝе тьштәки жь ԝан бьстинә.

⁶Һьнге Пәтрус готе: «Зерʼ у зиве мьн тʼӧнә, ле чи мьн һәйә әзе Ԝи бьдьмә тә. Бь наве Иса Мәсиһе Ньсрәте рʼабә бьгәрʼә».

⁷Дәсте ԝийи рʼасте гьрт рʼакьр, перʼа-перʼа ԛӧдуме чока у гузәкед ԝи шьдийан.

⁸Әԝи банзда сәр хԝә сәкьни, дәстпекьр гәрʼийа у тʼәви ԝан кʼәтә пʼарьстгәһе дьгәрʼийа, банздьда у шькьри дьда Хԝәде.

⁹Гава тʼәмамийа щьмәʼте дит кӧ әԝ дьгәрʼә у шькьрийе дьдә Хԝәде,

¹⁰нас кьрьн кӧ әԝ ә, йе кӧ бона пʼарсе бәр дәргәһе пʼарьстгәһейи Бәдәԝ рʼудьньшт у бона тьште кӧ тʼәви ԝи ԛәԝьми зәндәгьрти мабун у дьһʼәйирин.

¹¹Әви кӧ Пәтрус у Йуһʼәнна бәрʼнәдьдан, тʼәмамийа щьмәʼте әʼщебмайи бәрбьрʼи ԝан бәзи, һʼәта ԝи щийе кӧ жерʼа дьготьн һеԝангәһа Сьлеман.

¹²Пәтрус кӧ әв йәк дит, щьмәʼтерʼа гот: «Гәли исраелийа! Һун чьма бона ве йәке әʼщебмайи манә? Чьма тьһәрәки ль мә дьньһерʼьн? Те бежи ԛәй мә бь ԛәԝат йан хԝәдепʼарьстийа хԝә әԝ да гәрʼе?

¹³Хԝәдейе Бьраһим, Исһаԛ, Аԛуб у Хԝәдейе кал-бавед мә, Бәрдәстийе Хԝә Иса рʼумәт кьр[22]. Ԝә нәмамийа Ԝи кьр у бәр Пилато тʼәхсир кьр, гава әԝи ԛьрар кьрьбу кӧ Ԝи бәрʼдә.

¹⁴Ԝә йе Пироз у рʼаст тʼәхсир кьр у йе меркӧж хԝәст кӧ ԝәрʼа бе бәрʼдане[23].

¹⁵Ԝә Чʼәʼвканийе жийине кӧшт, ле Хԝәде Әԝ жь мьрьне рʼакьр у әм хԝәха шәʼдә нә.

¹⁶У ԛәԝата наве Ԝи әва мәрьва ԛәнщ кьр, кʼижани кӧ һун дьбиньн у нас дькьн. Бәле ԝе баԝәрийа бь наве Ԝи әва бәр чʼәʼве ԝә һʼәмуйа сах-сьламәт кьр.

¹⁷Ньһа гәли бьра, әз заньм кӧ ԝә жи мина сәрԝеред хԝә бь нәзанийа хԝә кьрийә.

¹⁸Ле Хԝәде чаԝа бәри ве йәке бь дәве һʼәму пʼехәмбәра бона щәфе Мәсиһе Хԝә готьбу, ӧса жи кьр.

¹⁹Аԝа тʼобә кьн у бәрбь Хԝәде вәгәрʼьн, кӧ гӧнед ԝә бенә рʼәситкьрьне.

²⁰Һьнге ԝәхтед жийиндарийе жь һʼьзурийа Хӧдан ԝе бен у Әԝе Иса бьшинә, ԝи Мәсиһе кӧ бәреда бона ԝә кʼьфш кьрийә.

²¹Лазьм ә Әԝ ль әʼзмен бьминә, һʼәта кӧ Хԝәде һәр тьшти ну чекә[24], чаԝа кӧ һе бәре пешда Хԝәде бь дәве пʼехәмбәред Хԝәйә пироз готьбу.

²²Бәле Муса гот: ‹Хӧдан Хԝәдейе ԝә ԝе жь нав бьрайед ԝәда Пʼехәмбәрәки мина мьн ԝәрʼа дәрхә. Һәр чь кӧ ԝәрʼа бежә, гәрәке һун гӧһдарийа Ԝи бькьн.

²³Һәр кʼи кӧ гӧһдарийа Ԝи пʼехәмбәри нәкә, жь нав щьмәʼте ԝе бе ԛәтандьн у ӧндакьрьне›[25].

²⁴У һʼәму пʼехәмбәра жи, жь Самуел гьрти у йед пәйрʼа чь кӧ готьнә, бона ван рʼожа хәбәр данә.

²⁵Һун миратʼхӧред пʼехәмбәра у ԝе пәймане нә, йа кӧ Хԝәде тʼәви кал-бавед ԝә[26] гьреда. Әԝи готә Бьраһим: ‹Бь зӧрʼәта тә әзе дӧа һʼәму мьләтед дьнйайе бькьм›[27].

²⁶Хԝәде Бәрдәстийе Хԝә Иса мьләтрʼа дәрхьст у пешийе шандә щәм ԝә, кӧ дӧа ԝә бькә у бь ви аԝайи ԝә һәр кәси жь хьрабийед ԝә вәгәрʼинә».