Read Пәймана Ну (Инщил) Кʼаред Шандийа 5 Bible Online

Кʼаред Шандийа 5 - Пәймана Ну (Инщил) bible

Кʼаред Шандийа 5

¹Ле мәрьвәки наве ԝи Һананийа тʼәви жьна хԝә Саферийайе мьлкʼәк фьрот,

²жь ԛимәте ԝе һьнәк вәшарт, кӧ жьн жи һаш пе һәбу, һьнәк жи ани ль бәр пʼийед шандийа дани.

³Һьнге Пәтрус ԝирʼа гот: «Һананийа! Әв чаԝа бу кӧ мирещьн ԛәлпе хьраб кьрә дьле тә, кӧ тӧ Рʼӧһʼе Пирозрʼа дәрәԝа бьки у жь ԛимәте әʼрде һьнәки вәшери?

⁴Бәри фьротане нә әԝ йа тә бу? У пәй фьротанерʼа жи ԛимәте ԝе дәсте тәда нибу? Тә чьма әв йәк кьрә дьле хԝә? Тә нә кӧ мәрьварʼа дәрәԝ кьр, ле Хԝәдерʼа».

⁵Гава Һананийа әв хәбәр бьһистьн, кʼәт рʼӧһʼе хԝә да у тьрсәкә мәзьн һʼәмуйед кӧ бьһистьн гьрт.

⁶Хорт жи рʼабун әԝ кʼәфән кьрьн у бьрьнә дәрва дәфьн кьрьн.

⁷Ԝәкә се сьһʼәта дәрбаз бу, жьна ԝи кӧ ньзаньбу чь ԛәԝьмийә, кʼәтә һьндӧрʼ.

⁸Пәтрус же пьрси гот: «Мьнрʼа бежә, ԝә һәбука хԝә һәма һаԛаси фьрот?» Әԝе гот: «Бәле, һәма һаԛаси».

⁹Һьнге Пәтрус ԝерʼа гот: «Һун чьма бунә йәк кӧ Рʼӧһʼе Хӧдан бьщерʼьбиньн? Ва нә дәнге ньгед ԝан мәрьвед кӧ мере тә дәфьн кьрьнә жь пьшт дери тен, ԝе тә жи дәрхьнә дәрва».

¹⁰Перʼа-перʼа әԝ кʼӧлфәт кʼәтә бәр ньгед ԝи у рʼӧһʼе хԝә да. Һьнге хорт кʼәтьнә һьндӧрʼ, әԝа мьрити дитьн, һьлдан бьрьн кʼеләка мере ԝе дәфьн кьрьн.

¹¹Тьрсәкә мәзьн кʼәтә сәр тʼәмамийа щьвине у һʼәмуйед кӧ әв йәк бьһистьн.

¹²Бь дәсте шандийа гәләк нишан у кʼәрәмәт нав щьмәʼтеда дьбун. (Һʼәму баԝәрмәнд һәврʼа һеԝангәһа Сьлеманда дьщьвийан.

¹³Тʼӧ кәси жь йед майин нәԝерьбу незики ԝан буйа, ле бәле щьмәʼте жи ԛәдьре ԝан дьгьрт.

¹⁴Ле диса әʼлаләта жьна у мера һе-һе зедә дьбун, йед кӧ баԝәрийа хԝә Хӧдан данин.)

¹⁵Бона ве йәке хәлԛе нәхԝәш дәрдьхьстьнә сәре рʼийа, даданинә сәр дарбәста у бәрʼа, ԝәки гава Пәтрус дәрбаз бә, тʼәне сийа ԝи бькʼәвә сәр жь ԝан һьнәка.

¹⁶Әʼлаләт жи жь бажаред дор-бәра дьһатьнә Оршәлиме, тʼәви хԝә нәхԝәш у йед кӧ жь рʼӧһʼед һʼәрам щәфа дькʼьшандьн данин у һʼәму жи ԛәнщ дьбун.

¹⁷Сәрәккʼаһин у һʼәмуйед тʼәви ԝи, кӧ жь кʼомәла садуԛийа бун, һʼәвсудийева дагьрти рʼабун

¹⁸дәст авитьнә шандийа, авитьнә кәла щьмәʼтийе.

¹⁹Ле мьлйакʼәтәки Хӧдан ԝе шәве дәргәһед кәле вәкьрьн, әԝ дәрхьстьнә дәрва у готә ԝан:

²⁰«Һәрʼьн пʼарьстгәһеда бьсәкьньн у щьмәʼтерʼа ван һʼәму готьнед ве жийине бежьн».

²¹Ԝана жи гӧһдари кьр, сьбәһе зу кʼәтьнә пʼарьстгәһе, дәстпекьрьн һин кьрьн. Һьнге сәрәккʼаһин кʼома хԝәва һат, тʼәви тʼәмамийа кʼома рʼуспийед Исраеле, щьвина гьрәгьра щьванд у шандьнә кәле кӧ шандийа биньн.

²²Ле гава бәрдәсти чун, әԝ кәледа нәдитьн, вәгәрʼийан һатьн у готьн:

²³«Кәла жь һәр алийава дадайи бу у нобәдар жи ль бәр дәргәһа бун, ле гава мә вәкьр, мә һьндӧрʼда тʼӧ кәс нәдит».

²⁴Гава сәрԝере нобәдаред пʼарьстгәһе у сәрәкед кʼаһина әв хәбәр бьһистьн, сәр ԝан әʼщебмайи ман дьготьн: «Гәло чь ԛәԝьмийә?»

²⁵Ԝе дәме йәки һат ԝанрʼа гот: «Ва әԝ мәрьвед ԝә авитьбунә кәле, пʼарьстгәһеда сәкьни нә у щьмәʼте һин дькьн!»

²⁶Ԝи чахи сәрԝере нобәдара бәрдәстийава тʼәвайи чун әԝ анин, ле нә бь зорбәтийе, чьмки жь щьмәʼте дьтьрсийан, кӧ ԝан нәдьнә бәр кәвьра.

²⁷Әԝ бьрьн бәр щьвина гьрәгьра данә сәкьнандьне, сәрәккʼаһин жь ԝан пьрси

²⁸у гот: «Мә һʼьшк тʼәми ль ԝә нәкьр, кӧ бь Ԝи Нави һин нәкьн? Ле ва ԝә Оршәлим бь һинкьрьна хԝәва тʼьжи кьрийә, һун дьхԝазьн щабдарийа хуна Ԝи Мәрьви бькьнә стуйе мә»[33].

²⁹Пәтрус у шандийед майинва щаб дан у готьн: «Әм гәрәке гӧрʼа Хԝәде бькьн, нә кӧ йа мәрьва.

³⁰Хԝәдейе кал-бавед мә Иса жь мьрьне рʼакьр, Әԝе кӧ ԝә дарва дардакьр кӧшт.

³¹Хԝәде Әԝ бьльнд кьр дани ль мьле Хԝәйи рʼасте, кӧ бьбә Рʼебәр у Хьлазкьр, ԝәки мәщала тʼобәйе у бахшандьна гӧна бьдә Исраеле.

³²Әм шәʼде ван тьшта нә, ӧса жи Рʼӧһʼе Пироз, кʼижан Хԝәде да ԝан, йед кӧ гӧрʼа Ԝида нә».

³³Гава ԝана әв йәк бьһист, гәләки һерс кʼәтьн у дьхԝәстьн ԝан бькӧжьн.

³⁴Ле ферьсики дәрсдаре Ԛануне һәбу, наве ԝи Гамалйел у нава тʼәмамийа щьмәʼтеда жи хԝәйиԛәдьр бу. Әва щьвина гьрәгьрада рʼабу сәкьни әʼмьр кьр кӧ шандийа хеләке дәрхьнә дәрва

³⁵у ԝанрʼа гот: «Гәли исраелийа! Һьндава ванда һаш жь хԝә һәбьн кӧ һуне чь бькьн.

³⁶Ԝәхтәке Тʼәԝдас пешда һат, кӧ хԝә данибу дәԝса йәки мәзьн у ԝәкә чарсьд мәрьви жи хԝә ле гьртьбун, әԝ һатә кӧштьне, һʼәму пәйчуйед ԝи жи тʼурʼ-тʼурʼи бун у кәс нәма.

³⁷Пәй ԝирʼа Щьһудайе Щәлиле жи рʼожед навньвисареда рʼабу әʼлаләтәкә гьран ль пәй хԝә бьр, ле әԝ һатә кӧштьне у һʼәмуйед пәй ԝи дьчун жи бәла-бәлайи бун.

³⁸У ньһа әз ви һʼалида ԝәрʼа дьбежьм, жь ван мәрьва вәгәрʼьн у ԝан бәрʼдьн. Һәгәр әԝ шеԝьр йан шьхӧл мәрьвати бә, ԝе бәтал бә,

³⁹ле һәгәр жь Хԝәдеда йә, һун нькарьн бәтал кьн. Мьԛати хԝә бьн нәбә кӧ һун рʼабьнә бәр Хԝәде». Щьвина гьрәгьра гӧрʼа ԝи кьр,

⁴⁰гази шандийа кьрьн, әԝ данә бәр ԛамчийа, әʼмьри сәр ԝан кьрьн, кӧ иди бь наве Иса хәбәр нәдьн у бәрʼдан.

⁴¹Әвана жи жь щьвина гьрәгьра чун, ша дьбун кӧ бона наве Иса һежайи рʼәзилкьрьне бунә.

⁴²Һәр рʼож ль пʼарьстгәһе у малада тʼьме Мьзгини дьдан у һин дькьрьн кӧ Мәсиһ, Иса йә.