Read Пәймана Ну (Инщил) Кʼаред Шандийа 6 Bible Online

Кʼаред Шандийа 6 - Пәймана Ну (Инщил) bible

Кʼаред Шандийа 6

¹Ԝан рʼожада гава шагьрт зедә дьбун, щьһуйед кӧ йунани хәбәр дьдан һьндава щьһуйед ибранида[34] бина хԝә тәнг дькьрьн, чьмки хӧрәке кӧ һәр рʼож дьһатә бәлакьрьне нәдьгьһиштә жьнәбийед ԝан.

²Ԝи чахи һәр донздәһа гази кʼома шагьрта кьр у готьн: «Әв йәк нә рʼаст ә кӧ әм даннасинийа хәбәра Хԝәде бьһельн, хӧрәк бәлакьрьнева мьжул бьн.

³Ньһа гәли бьра, жь нава хԝәда һʼәфт мәрьвед бь шәʼдәтийа наве ԛәнщ бьбьжерьн, кӧ бь избати Рʼӧһʼе Пироз у сәрԝахтийева тʼьжи нә, ԝәки әм ԝан дайньнә сәр ви шьхӧли.

⁴Ле әме хԝә бьдьнә дӧа у даннасинийа хәбәре».

⁵Әва йәка һʼәму баԝәрмәнда хԝәш һат у әв мәрьвана бьжартьн: Стәйфан, мәрьвәки бь баԝәри у Рʼӧһʼе Пирозва тʼьжи, Филипо, Прокоро, Никанор, Тимон, Парменас у Николойе жь Әнтакйайе, кӧ жь пʼутпʼарьстийе һатьбу сәр баԝәрийа щьһуйа.

⁶Әвана бәр шандийа данә сәкьнандьне, шандийа жи дӧа кьрьн у дәстед хԝә данә сәр ԝан.

⁷У хәбәра Хԝәде пешда дьчу, әʼлаләта шагьрта Оршәлимеда гәләки зедә дьбу у жь кʼаһина жи гәләка баԝәри ԛәбул дькьрьн.

⁸Стәйфан, әԝ мәрьвәки бь кʼәрәм у ԛәԝата Хԝәдева тʼьжи бу, нав щьмәʼтеда кʼәрәмәт у нишанед мәзьн дькьрьн.

⁹Ле һьнәкед жь кʼьништа кӧ Азайи[35] дьһатә готьне, щьһуйед жь Курене у Скәндәрйайе у ӧса жи щьһуйед жь ԛәзайед Киликйайе у Асйайе рʼабун тʼәви Стәйфан кʼәтьнә дәʼԝе.

¹⁰Ле нькарьбун ль бәр ԝе сәрԝахтийе у ԝи Рʼӧһʼе кӧ пе хәбәр дьда бьсәкьнийана.

¹¹Ԝи чахи дьзива сәре чәнд мәрийа тʼьжи кьрьн кӧ бежьн: «Мә бьһист кӧ әва тьштед мьԛабьли Муса у Хԝәде дьбежә».

¹²Бь ви аԝайи щьмәʼт, рʼуспи у ԛанунзан тʼәвиһәв кьрьн, рʼаһьштьнә Стәйфан, әԝ гьртьн у кʼаши щьвина гьрәгьра кьрьн.

¹³Шәʼдед дәрәԝ анин данә сәкьнандьне у ԝан гот: «Әва тʼәрка хәбәрдана мьԛабьли ви щийе пироз у Ԛануна Муса накә.

¹⁴Мә жь дәве ԝи бьһист кӧ гот: ‹Исайе Ньсрәте ԝе ве Пʼарьстгәһе һьлшинә у әʼдәтед кӧ Муса данә мә бьгӧһезә›».

¹⁵Һʼәмуйед щьвина гьрәгьрада рʼуньшти гава ль ԝи ньһерʼин, дина хԝә дане рʼәнг-рʼуйе ԝи мина рʼәнг-рʼуйе мьлйакʼәта бу.