Read Пәймана Ну (Инщил) Кʼаред Шандийа 7 Bible Online

Кʼаред Шандийа 7 - Пәймана Ну (Инщил) bible

Кʼаред Шандийа 7

¹Һьнге сәрәккʼаһин Стәйфанрʼа гот: «Әв йәк рʼаст ьн?»

²Әԝи гот: «Гәли бав у бьра, бьбьһен! Гава баве мә Бьраһим һе Мәсопотамйайеда дьма, кӧ һе нәчубу бажаре Һʼаране, Хԝәдейе рʼумәте ԝива хӧйа бу

³у жерʼа гот: ‹Жь ԝәлат у пьсмамед хԝә бьԛәтә у һәрʼә ԝи ԝәлате кӧ әзе нишани тә кьм›[36].

⁴Һьнге Бьраһим жь ԝәлате кʼьлданийа дәркʼәт ль Һʼаране ма. Пәй мьрьна баве ԝирʼа Хԝәде әԝ ԝаргӧһастә ви ԝәлате кӧ һун ньһа теда дьминьн.

⁵Ль ве дәре ԝаргәһ нәда ԝи, нә жи дәԝса ньгәки, ле соз да кӧ ви ԝәлати чаԝа мьлкʼ бьдә ԝи у пәй ԝирʼа жи бьдә зӧрʼәта ԝи, гава кӧ һе зарʼед ԝи тʼӧнәбун[37].

⁶Хԝәде ԝирʼа аһа гот: ‹Зӧрʼәта тәйе ԝәлате хәлԛеда хәрибийеда бә, ԝе ԝан бькьнә хӧлам у чарсьд сали бьдьнә щәфе.

⁷Ле диԝана ԝи мьләте кӧ ԝе жерʼа бьбьнә хӧлам› Хԝәде гот, ‹Әзе бькьм, пәй ԝе йәкерʼа әԝе дәрен, ль ви щийи Мьн бьһʼәбиньн›[38].

⁸Паше сьнәт чаԝа нишана пәймане да Бьраһим. Аԝа гава Исһаԛ жерʼа бу, рʼожа һʼәйшта әԝ сьнәт кьр у Исһаԛ жи Аԛуб ӧса кьр, Аԛуб жи һәр донздәһ кӧрʼед хԝәйә бавәʼширед мә ӧса кьрьн[39].

⁹Бавәʼшира жи жь һʼәвсудийе Усьв чаԝа хӧлам фьротьн, кӧ ԝи бьбьнә Мьсьре, ле Хԝәде тʼәви ԝи бу[40],

¹⁰әԝ жь һʼәму тәнгасийед ԝи хьлаз кьр. Гава әԝ бәр Фьрәԝьне пʼадше Мьсьре сәкьни, Хԝәде кʼәрәм у сәрԝахти дайе, пʼадше жи Усьв сәр Мьсьре у тʼәмамийа мала хԝә кьрә сәрԝер[41].

¹¹Һьнге тʼәмамийа ԝәлате Мьсьре у Кәнанеда бу хәлайи у кʼәтьнә охьрме гьран, кал-бавед мә нькарьбун хӧрәк дәстхьстана[42].

¹²Аԛуб кӧ бьһист ль Мьсьре гәньм дәст дькʼәвә, щара пешьн кал-бавед мә шандьн.

¹³Щара дӧда Усьв хԝә бьрайед хԝәва да наскьрьне у әʼсьле ԝи Фьрәԝьнва әʼйан бу.

¹⁴Һьнге Усьв шанд гази баве хԝә Аԛуб у тʼәмамийа мала ԝи кьр, кӧ сәрһәв һʼәфте пенщ нәфс бун.

¹⁵Аԛуб бәржери Мьсьре бу, әԝ у кал-бавед мә ԝьр мьрьн.

¹⁶Щьнйазед ԝан бьрьнә Шәхәме кьрьнә ԝи мәзәле кӧ Бьраһим бь ԛимәтәки зива жь кӧрʼед Һаморе Шәхәме кʼьрʼибу[43].

¹⁷Гава әԝ ԝәхте кӧ Хԝәде бь сонд Бьраһимрʼа соз дабу незик дьбу, щьмәʼт Мьсьреда гәләки зедә бьбу.

¹⁸Ԝи чахи пʼадшаки дьн Мьсьреда рʼабу, кӧ дәрһәԛа Усьвда тьштәк ньзаньбу[44].

¹⁹Әԝи һʼьләкʼари ль мьләте мә кьр у кал-бавед мә данә щәфе, пʼейи сәр ԝан кьр, кӧ әԝ зарʼокед хԝә бавежьнә дәрва, кӧ нәжин[45].

²⁰Ԝи чахи Муса жь дийа хԝә бу, әԝ йәки гәләки бәдәԝ бу у се мәһа мала баве хԝәда мәзьн бу[46].

²¹Гава әԝ һатә авитьне, ԛиза Фьрәԝьн әԝ һьлда бьр, чаԝа кӧрʼ хԝәрʼа мәзьн кьр.

²²Муса тʼәмамийа сәрԝахтийа мьсьрийа һин бу, хәбәрдан у шьхӧле хԝәда жи зор бу.

²³Гава чьл салийа ԝи тʼәмам бу, дьле ԝирʼа дәрбаз бу кӧ сәрики бьдә хушк-бьрайед хԝә зарʼед Исраел.

²⁴Әԝи йәки исраели дит кӧ йәки мьсьри нәһәԛи ле дькьр, чу пьшта ԝи, һʼәйф һьлда йе мьсьри кӧшт.

²⁵Муса тʼьре хушк-бьрайед ԝийе фәʼм бькьн, кӧ Хԝәде ԝе бь дәсте ԝи хьлазбуне бьдә ԝан, ле фәʼм нәкьрьн.

²⁶Рʼожа дьне рʼасти дӧ исраелийа һат кӧ шәрʼ дькьрьн, хԝәст кӧ ԝан ль һәв бинә у гот: ‹Әʼвдно! Һун бьра нә, чьма нәһәԛийе ль һәвдӧ дькьн?›

²⁷Ле әԝе кӧ нәһәԛи ль һәвале хԝә дькьр, әԝ дәʼф да у готе: ‹Кʼе тӧ сәр мә сәрԝер у һʼакьм кʼьфш кьри?

²⁸Йан тӧ дьхԝази мьн жи мина ԝи мьсьрийе дӧһӧ бькӧжи?›[47]

²⁹Гава Муса әв йәк бьһист, рʼәви ԝәлате Мьдйане хәрибийеда ма у ль ԝьр дӧ кӧрʼ жерʼа бун[48].

³⁰Пәй чьл салирʼа бәрʼийеда ль чʼийайе Синайе мьлйакʼәтәк нава алава агьре дьрʼийеда ԝива хӧйа бу[49].

³¹Муса кӧ дит, ль сәр ԝе йәке әʼщебмайи ма. Гава незик дьбуйе кӧ бьбинә, дәнге Хӧдан бьһист:

³²‹Әз Хԝәдейе кал-бавед тә, Хԝәдейе Бьраһим, Исһаԛ у Аԛуб ьм›. Муса дьләрьзи у нәԝерьбу бьньһерʼийа.

³³Һьнге Хӧдан готе: ‹Чарьхед ньгед хԝә бехә, чьмки әԝ щийе кӧ тӧ ле сәкьни йи әʼрде пироз ә.

³⁴Бәле Мьн щәфе щьмәʼта Хԝә Мьсьреда дит у заринийа ԝан бьһист, пәйа бум кӧ ԝан хьлаз кьм. Дә ньһа ԝәрә Әз тә бьшиньмә Мьсьре›.

³⁵Әԝ Мусайе кӧ тʼәхсир кьрьн у готьне: ‹Кʼе тӧ сәр мә сәрԝер у һʼакьм кʼьфш кьри?› Хԝәде бь дәсте ԝи мьлйакʼәте кӧ нав дьрʼийеда ԝива хӧйа бу, әԝ чаԝа сәрԝер у хьлазкьр шанд[50].

³⁶Әԝи әԝ жь Мьсьре дәрхьстьн, Мьсьре, бәʼра Сор у бәрʼийеда чьл сали нишан у кʼәрәмәт кьрьн[51].

³⁷Муса һәма әԝ бу, йе кӧ зарʼед Исраелрʼа гот: ‹Хԝәде ԝе жь нав бьрайед ԝәда пʼехәмбәрәки мина мьн бона ԝә рʼакә›[52].

³⁸Муса әԝ бу, йе кӧ бәрʼийеда нава щьмәʼте бу, ль сәре чʼийайе Синайе жи тʼәви ԝи мьлйакʼәти бу, кʼижани тʼәви ԝи кал-бавед мәрʼа хәбәр дьда. Әва әԝ бу, йе кӧ әԝ хәбәред жийине һьлдьдан кӧ бьдә мә[53].

³⁹Ле кал-бавед мә нәхԝәстьн гӧрʼа ԝи бькьн, әԝ тʼәхсир кьрьн, дьлед хԝәда вәгәрʼийанә Мьсьре

⁴⁰у Һарунрʼа готьн: ‹Мәрʼа хԝәдейа чекә, кӧ пешийа мә кʼәвьн, чьмки әԝ Мусайе кӧ әм жь ԝәлате Мьсьре дәрхьстьн, әм ньзаньн чь һатә сәре ԝи›[54].

⁴¹Һәма ԝан рʼожада пʼутәки мина голька чекьрьн, ԛӧрбан ԝи пʼутирʼа дан у бона шьхӧле дәсте хԝә кʼеф кьрьн[55].

⁴²Һьнге Хԝәде бәре Хԝә жь ԝан гӧһаст у һьшт кӧ әԝ стәйркед әʼзмен бьһʼәбиньн, чаԝа кʼьтеба пʼехәмбәрада ньвисар ә: ‹Гәло чьл сали ԛӧрбан у һʼәди ԝә бәрʼийеда Мьнрʼа дан, Мала Исраел?

⁴³На, ле ԝә коне Молох хԝәде у стәйрка Рʼәмфан хԝәдейе хԝә һьлдьдан, әв сурәт ьн, йед кӧ ԝә чекьрьн, ԝәки һун ԝан бьһʼәбиньн. Бона ве йәке Әзе ԝә бьгӧһезьмә ԝи алийе ԝәлате Бабилоне›[56].

⁴⁴Коне Шәʼдәтийе бәрʼийеда тʼәви кал-бавед мә бу. Әԝ ӧса һатә чекьрьне, чаԝа Әԝе кӧ Мусарʼа хәбәр да, әʼмьр кьр кӧ мина ԝи шькьле кӧ дитьбу чекә[57].

⁴⁵Паше кал-бавед мә жи әԝ коне кӧ жь пешийа ԝанрʼа мабу, һьлдан анинә ви ԝәлати, ԝи ԝәхте кӧ ԝан тʼәви Йешу жь ԝан мьләта зәфт кьрьбун у Хԝәде жь бәр кал-бавед мәва бәри ԝан мьләта дабу. Әԝ кон ль ԝьр ма һʼәта ԝәхте Даԝьд[58].

⁴⁶Даԝьд жи кʼәрәм жь Хԝәде станд, хԝәст кӧ ханәке бона Хԝәдейе Аԛуб чекә[59].

⁴⁷Ле Сьлеман бона Ԝи ханәк чекьр[60].

⁴⁸Ле бәле Йе Һәри Жорьн малед бь дәста чекьрида наминә, чаԝа пʼехәмбәр дьбежә:

⁴⁹‹Әʼзман кʼӧрсийа Мьн ә, әʼрд жи бьне пʼийед Мьн ә. Һуне чь мале Мьнрʼа чекьн? Хӧдан дьбежә. Йан жи чь щийи бона рʼьһʼәтийа Мьн?

⁵⁰Нә дәстед Мьн әв һәр тьшт чекьрьнә?[61]›

⁵¹Сәрһʼьшкно! Кʼафьр у гӧһада кәрʼно![62] Һун тʼьме мьԛабьли Рʼӧһʼе Пироз дьсәкьньн, кал-бавед ԝә чаԝа бунә, һун жи ӧса нә[63].

⁵²Кал-бавед ԝә жь пʼехәмбәра кʼижан нәзерандьн? Әԝед кӧ һе бәреда бона һатьна Йе Рʼаст дьготьн, дькӧштьн. У ва ньһа жи ԝә нәмамийа Ԝи кьр у кӧшт.

⁵³Ԝәрʼа Ԛанун бь дәсте мьлйакʼәта һатә дайине, ле ԝә хԝәй нәкьр!»

⁵⁴Гава әв тьшт дьбьһистьн, һәԝа ԝан дькʼәт у дьранед хԝә сәр ԝи дьчʼьрʼькандьн.

⁵⁵Ле Стәйфан бь Рʼӧһʼе Пироз тʼьжи бәре хԝә әʼзменда кьр, рʼумәта Хԝәде у Иса ль мьле Хԝәдейи рʼасте сәкьни дит

⁵⁶у гот: «Ва йә әз әʼзмана вәбуйи дьбиньм у Кӧрʼе Мерьв ль мьле Хԝәдейи рʼасте сәкьни!»

⁵⁷Ԝи чахи ԝана кьрә ԛирʼин у гӧһед хԝә гьртьн, һʼәму һәврʼа рʼаһьштьнә ԝи,

⁵⁸әԝ жь бажер дәрхьстьн, данә бәр кәвьра. Шәʼда жи кʼьнщед хԝә данинә бәр ньгед хортәки наве ԝи Шаԝул.

⁵⁹Гава кәвьр давитьне, Стәйфан дӧа кьр у гот: «Хӧдан Иса, рʼӧһʼе мьн бьстинә».

⁶⁰Һьнге ԝи чок да, бь дәнге бьльнд кьрә гази: «Хӧдан, ве йәке ванарʼа гӧнә һʼәсаб нәкә». Аһа кӧ гот, һеньжи[64].