Read Пәймана Ну (Инщил) Кʼаред Шандийа 8 Bible Online

Кʼаред Шандийа 8 - Пәймана Ну (Инщил) bible

Кʼаред Шандийа 8

¹Шаԝул жи ԛайл бу, кӧ әԝ бе кӧштьне. Әԝе рʼоже мьԛабьли щьвина Оршәлимеда зерандьнәкә гьран дәстпебу. Пештьри шандийа һʼәмуйед баԝәрмәнд бәлайи тʼопрахед Щьһустане у Самәрйайе бун.

²Мәрьвед хԝәдехоф Стәйфан дәфьн кьрьн у шинәкә гьран сәр кьрьн.

³Ле Шаԝул гәләк зьрар дьда щьвине, мал-мал дьгәрʼийа жьн у мер кʼаши дәрва дькьрьн давитьнә кәле[65].

⁴Әԝед бәла-бәлайи бьбун дьгәрʼийан, Мьзгинийа хәбәре дьдан.

⁵Филипо жи бәржери бажарәки Самәрйайе бу, ԝанрʼа бона Мәсиһ даннасин дькьр.

⁶Әʼлаләте бь дьл гӧһдарийа готьнед Филипо дькьр, гава дьбьһистьн у дьдитьн әԝ кʼәрәмәтед кӧ ԝи дькьрьн.

⁷Жь гәләк щьнакʼәтийа рʼӧһʼед һʼәрам бь дәнге бьльнд дькьрьнә ԛирʼин дәрдькʼәтьн у гәләк шьлушәʼт, ньгада сәԛәт ԛәнщ дьбун.

⁸Һьнге шабунәкә мәзьн кʼәтә ԝи бажари.

⁹Мәрьвәк ԝи бажарида һәбу наве ԝи Шьмһʼун, әԝи һе зува сербази дькьр у самәри әʼщебмайи дькьрьн у хԝә жи данибу дәԝса йәки мәзьн.

¹⁰Тʼәмамийа щьмәʼте жь бьчʼука һʼәта мәзьна бь дьл гӧһ дьданә ԝи у дьготьн: «Әв ә әԝ ‹Ԛәԝата Хԝәдейә мәзьн› кӧ дьбежьн».

¹¹Бь дьл гӧһ дьданә ԝи, чьмки әԝи зува бь сербазийед хԝә әԝ әʼщебмайи кьрьбун.

¹²Ле гава әԝи әԝ мьзгинийа Филипо баԝәр кьр, йа кӧ бона Пʼадшатийа Хԝәде у наве Иса Мәсиһ дьда, һьн мер һьн жьн, һʼәму жи пе аве һатьнә ньхӧмандьне.

¹³Шьмһʼун хԝәха жи баԝәр кьр һатә ньхӧмандьне у тʼьме тʼәви Филипо бу. У гава әԝ нишан у кʼәрәмәтед зор кӧ дьбун дьдит, әʼщебмайи дьма.

¹⁴Шандийед Оршәлимеда гава бьһистьн, ԝәки Самәрйайе хәбәра Хԝәде ԛәбул кьрийә, Пәтрус у Йуһʼәнна шандьнә щәм ԝан.

¹⁵Әԝ кӧ бәржер бун, бона ԝан дӧа кьрьн кӧ Рʼӧһʼе Пироз бьстиньн,

¹⁶чьмки һʼәта һьнге һе Рʼӧһʼе Пироз нәһатьбу сәр жь ԝан тʼӧ кәси, тʼәне бь наве Хӧдан Иса һатьбунә ньхӧмандьне.

¹⁷Һьнге Пәтрус у Йуһʼәнна дәстед хԝә данинә сәр ԝан у ԝана Рʼӧһʼе Пироз станд.

¹⁸Гава Шьмһʼун дит, ԝәки бь дәст данина шандийа Рʼӧһʼе Пироз дьстиньн, пʼәрә дьрежи ԝан кьр

¹⁹у гот: «Әви һʼӧкӧми бьдьнә мьн жи, кӧ әз дәсте хԝә дайньмә сәр кʼе, Рʼӧһʼе Пироз бьстинә».

²⁰Ле Пәтрус ԝирʼа гот: «Зиве тә бьра тʼәви тә бьтʼәрʼьбә! Тә тʼьре пʼешкʼеша Хԝәде пʼәрәти те стандьне!

²¹Пʼара тә ве йәкеда тьштәк тʼӧнә, чьмки дьле тә ль бәр Хԝәде нә рʼаст ә.

²²Ньһа жь ԝе хьрабийа хԝә вәгәрʼә, рʼәща жь Хӧдан бькә, бәлки әв нета тәйә хьраб бе бахшандьне,

²³чьмки әз тә нава тәʼлайийа зьрав у ԛәйдед нәһәԛийеда дьбиньм».

²⁴Шьмһʼун ле вәгәрʼанд у гот: «Һун бона мьн һиви жь Хӧдан бькьн, ԝәки жь әԝ готьнед ԝә тʼӧ тьшт нәйе сәре мьн».

²⁵Гава ԝана шәʼдәти да у хәбәра Хӧдан хәбәр дан, пашда вәгәрʼийанә Оршәлиме у ль сәр рʼийа хԝә гәләк гӧндед Самәрйайеда жи Мьзгини дьдан.

²⁶Һьнге мьлйакʼәтәки Хӧдан Филипорʼа гот: «Рʼабә һәрʼә алийе башуре, сәр ԝе рʼийа кӧ жь Оршәлиме бәржери Газзайе дьбә», кӧ чол-бәстәк бу.

²⁷Әԝ жи рʼабу чу у дина хԝә дайе, ва йә нәмерәки жь Әтйупийе ԝәзире Кәндаке, аԝа готи пʼадша Әтйупийе, кӧ ԝәкʼиле тʼәмамийа хьзна ԝе бу, бона һʼәбандьне һатьбу Оршәлиме.

²⁸Әԝ жь ԝьр вәдьгәрʼийа у әʼрәба хԝәда кʼьтеба Ишайа пʼехәмбәр дьхԝәнд.

²⁹Рʼӧһʼ Филипорʼа гот: «Пешда һәрʼә у рʼәх әʼрәбева һәрә».

³⁰Филипо жи бәзи незик буйе, бьһист кӧ әԝ кʼьтеба Ишайа пʼехәмбәр дьхунә у же пьрси: «Чь кӧ тӧ дьхуни фәʼм дьки?»

³¹Әԝи готе: «Әзе чаԝа бькарьбьм фәʼм бькьм, һәгәр йәк мьнрʼа шьровәнәкә?» У һиви жь Филипо кьр кӧ рʼабә рʼәх ԝи рʼуне.

³²Әԝ щийе кӧ ԝи ньвисареда дьхԝәнд әв бу: «Мина пәза бона сәржекьрьне һатә бьрьне у чаԝа бәрха ль бәр ԛӧсесе хԝә накә кʼалин, дәве Хԝә вәнакә.

³³Әԝ ньмьз кьрьн у һәԛе Ԝи же стандьн. Дәрһәԛа зӧрʼәта Ԝида кʼе ԝе гьли кә? Чьмки әʼмьре Ԝи жь рʼубаре дьне һатә һьлдане»[66].

³⁴Нәмер жь Филипо пьрси у готе: «Әз һиви дькьм мьнрʼа бежә, пʼехәмбәр ван тьшта бона кʼе дьбежә? Бона хԝә йан бона йәки майин?»

³⁵Филипо рʼабу ԝе ньвисареда дәстпекьр дәрһәԛа Мьзгинийа Исада ԝирʼа шьровәкьр.

³⁶Гава рʼийа хԝәда дьчун, әԝ гьһиштьнә авәке у нәмер гот: «Ва йә ав, иди чь наһелә кӧ әз бемә ньхӧмандьне?»[67]

³⁸У нәмер әʼмьр кьр, кӧ әʼрәбе бьдьнә сәкьнандьне, һәр дӧ жи кʼәтьнә аве у Филипо нәмер ньхӧманд.

³⁹Гава әԝана жь аве дәркʼәтьн, Рʼӧһʼе Хӧдан Филипо һьлда, иди нәмер Филипо нәдит, әԝ әшԛ у ша рʼийа хԝәда чу.

⁴⁰Ле Филипо Ашдодеда хӧйа бу у дьгәрʼийа, Мьзгини дьда һәр бажари, һʼәта Ԛәйсәрийе жи һат.