Read Пәймана Ну (Инщил) Рʼомайи 10 Bible Online

Рʼомайи 10 - Пәймана Ну (Инщил) bible

Рʼомайи 10

¹Хушк-бьрано! Дӧа у хԝәстьна дьле мьн жь Хԝәде бона хьлазбуна Исраеле йә.

²Әз шәʼде ԝана мә, кӧ әԝ һьндава Хԝәдеда хԝәйихирәт ьн, ле әв йәк бе занәбун ә.

³Ԝана фәʼм нәкьр, кӧ Хԝәде чаԝа мерьв рʼаст һʼәсаб дькә, хԝәстьн бь щурʼе хԝә һʼиме һәԛийе дайньн у ль бәр һәԛийа Хԝәде та нәбун.

⁴Чьмки бь Мәсиһ Ԛанун сәр һәвда һат, кӧ һәр баԝәрмәнд бь ԝи рʼаст бе һʼәсабе.

⁵Бона ԝе рʼастһʼәсаббуна жь Ԛануне Муса аһа дьньвисә: «Мәрьве кӧ Ԛануне бьԛәдинә, бь ԝе жи әԝе бьжи»[63].

⁶Ле рʼастһʼәсаббуна кӧ жь баԝәрийе йә, аһа дьбежә: «Дьле хԝәда нәбежә: Кʼе ԝе рʼабә әʼзмен?»[64] (аԝа готи Мәсиһ жорда бинә),

⁷йан: «Кʼе ԝе һәрʼә дийаре мьрийа?»[65] (аԝа готи Мәсиһ жь нава мьрийа дәрхә).

⁸Ле бәле ньвисар чь дьбежә? «Хәбәра Хԝәде ль щәм тә йә, ль сәр заре тә йә у дьле тәда йә»[66], (аԝа готи әԝ хәбәра баԝәрийе, йа кӧ әм даннасин дькьн).

⁹Һәгәр тӧ бь дәве хԝә иԛрар бьки, кӧ Иса Хӧдан ә у дьле хԝәда баԝәр бьки, кӧ Хԝәде Әԝ жь нава мьрийа рʼакьрийә, те хьлаз би.

¹⁰Чьмки бь дьл йәк баԝәр дькә, рʼаст те һʼәсабе у бь дәв иԛрар дькә, хьлаз дьбә.

¹¹Чаԝа ньвисар дьбежә: «Һәр кәсе кӧ баԝәрийа хԝә Ԝи бинә, ԝе шәрми нәбә»[67].

¹²Ль вьр фьрԛи тʼӧнә нава щьһу у нәщьһуйада, чьмки Хӧдане һʼәмуйа йәк ә, һьндава ԝан һʼәмуйада жи мәрʼд ә, кʼижанед гази Ԝи дькьн.

¹³Чьмки ньвисар дьбежә: «Кʼи гази наве Хӧдан кә, ԝе хьлаз бә»[68].

¹⁴Ле ԝе чаԝа гази Ԝи кьн, һәгәр баԝәрийа хԝә Ԝи нәанинә? Йан ԝе чаԝа баԝәрийа хԝә Ԝи биньн, һәгәр бона Ԝи нәбьһистьнә? Йан ԝе чаԝа бьбьһен, һәгәр хәбәр даннасин нәбә?

¹⁵Йан ԝе чаԝа хәбәре даннасин кьн, һәгәр нәйенә шандьне? Чаԝа ньвисар ә: «Чьԛаси һʼәԝас ьн гавед йед мьзгинийа хере дьдьн!»[69]

¹⁶Ле һʼәмуйа гӧрʼа Мьзгинийе нәкьр, чьмки Ишайа дьбежә: «Хӧдан, кʼе әԝ готьна кӧ мә гот баԝәр кьр?»[70]

¹⁷Аԝа баԝәри жь бьһистьне те у бьһистьн жи жь готьнед бона Мәсиһ.

¹⁸Ле бәле әз дьпьрсьм: Гәло ԝана нә бьһист? Наԛәԝьмә. Чьмки ньвисар ә: «Дәнге ԝан тʼәмамийа әʼрде һьлда у хәбәра ԝан ль ԛӧлбед дьнйайе бәла бу»[71].

¹⁹Әз диса дьпьрсьм: Гәло Исраел пе нәһʼәсийа? Пешийе Муса дьбежә: «Әзе бь мьләте нә мьләт һелана бьдьмә ԝә у бь мьләтәки бефәʼм һерса ԝә рʼакьм»[72].

²⁰У Ишайа меркʼими дьбежә: «Әз ԝанва дәркʼәтьм, кʼижан ль Мьн нәдьгәрʼийан у Әз ԝанва әʼйан бум, кʼижана бона Мьн нәдьпьрсин»[73].

²¹Ле бәле бона Исраеле дьбежә: «Тʼәмамийа рʼоже Мьн дәсте Хԝә дьрежи мьләтәки сәрһʼьшк у хԝәсәрихԝә кьр»[74].