Read Пәймана Ну (Инщил) Рʼомайи 12 Bible Online

Рʼомайи 12 - Пәймана Ну (Инщил) bible

Рʼомайи 12

¹Аԝа әз һиви жь ԝә дькьм хушк-бьрано, бона ԝе дьлшәԝатийа Хԝәде, ԛальбе хԝә дийари Хԝәде кьн, чаԝа ԛӧрбанәкә сахә дӧрӧфкьри, ль Ԝи ԛәбул, йа кӧ һʼәбандьна ԝәйә рʼӧһʼани[86] йә.

²У нәкʼәвьнә кьрасе бәнде ве дьнйайе, ле бь нубуйина һʼьше хԝә ԝәрьнә гӧһастьне, ԝәки бьзаньбьн чь йә ԛьрара Хԝәде, кӧ ԛәнщи, хԝәши у кʼамьли йә.

³Әз бь ԝе кʼәрәма кӧ Хԝәде да мьн, ԝә һәр кәсирʼа дьбежьм: Чьԛас жь ԝә дькʼәвә, жь ԝе зедәтьр нәфькьрьн, ле сәр хԝә бьн, бьра һәр кәс ԝәкә ԝе баԝәрийа кӧ Хԝәде пʼарәвәкьр, бьфькьрә.

⁴Чаԝа ԛальбе мәда гәләк әндәм һәнә у һʼәму әндәм кьрәки накьн[87],

⁵ӧса жи әм гәләк ьн, ле йәктийа Мәсиһда әм бәдәнәк ьн у һәр кәс жь мә әндәмед һәв ьн.

⁶Аԝа анәгори ԝе кʼәрәма мәрʼа һатийә дайине, пʼешкʼешед хԝәйә щурʼә-щурʼә бьдьнә хәбате. Һәгәр пʼешкʼеша пʼехәмбәртийе йә, бьра ԝәкә ԝе чапа баԝәрийе бьдьнә хәбате,

⁷һәгәр хьзмәткʼари йә, бьра нава хьзмәткʼарийеда бьн, һәгәр һинкьрьн ә, бьра пәй һинкьрьне бьн,

⁸йе дьл дьдә мерьв, бьра ль пәй ԝе йәке бә, әԝе пʼарәвәдькә, бьра бь мәрʼдани бькә, әԝе сәрԝер ә, бьра хирәт бә, әԝе ԛәнщийе дькә, бьра бь әшԛ у ша бькә.

⁹Һʼьзкьрьна ԝә һʼьләкʼари нибә, жь хьрабийе зьвер бьн, хԝә ль ԛәнщийе бьгьрьн.

¹⁰Һʼьзкьрьнеда чаԝа хушк-бьра сәр һәв шәԝат бьн, ԛәдьркьрьнеда жь һәвдӧ дәрбазтьр бьн,

¹¹хирәтеда хԝәрʼанәдити нибьн, рʼӧһʼе хԝәда[88] алав дьн, хьзмәткʼарийа Хӧдан бькьн,

¹²бь гӧмане ша бьн, тәнгасийада сәбьр кьн, һәр гав дӧа бькьн,

¹³дәсте хԝә дьрежи щьмәʼта Хԝәдейә дәсттәнг кьн, пәй меванһʼьзийе бьн.

¹⁴Йе ԝә дьзериньн һун дӧа ԝан бькьн, бәле дӧа бькьн у ньфьрʼа ль ԝан нәкьн[89].

¹⁵Тʼәви йед ша дьбьн ша бьн у тʼәви йед дьгьрин бьгьрин.

¹⁶Фькьра ԝә һәр кәси һьндава һәвда йәк бә, кʼӧбар-бабах нибьн, ле тʼәви пʼәришана ньмьз бьн, хԝә дәԝса зана данәйньн[90].

¹⁷Жь бәр хьрабийева хьрабийе ль тʼӧ кәси нәкьн. Чь ль бәр чʼәʼве һʼәму мәрьва ԛәнщ ә, ԝе бькьн.

¹⁸Чьԛас жь дәст ԝә те, тʼәви һʼәму мәрьва әʼдьлайийеда бьн.

¹⁹Һʼәйфе һьлнәдьн, дәлално, ле щи бьдьнә һерса Хԝәде, чьмки ньвисар ә: «Һʼәйфһьлдан дәсте Мьн ә, Әзе һʼәйфе һьлиньм, Хӧдан дьбежә»[91].

²⁰Ле бәле әв жи һәйә: «Һәгәр дьжмьне тә бьрʼчи йә, нен бьде у һәгәр тʼи йә, аве бьде, чьмки тӧ бь ве йәке пьриске егьр сәр сәре ԝи тʼоп дьки»[92].

²¹Нәһелә хьраби сәр тә кʼәвә, ле бь ԛәнщийе тӧ сәр хьрабийе кʼәвә.