Read Пәймана Ну (Инщил) Рʼомайи 13 Bible Online

Рʼомайи 13 - Пәймана Ну (Инщил) bible

Рʼомайи 13

¹Һәр мәрьвәк бьра гӧрʼа ԝан һʼӧкӧмәтийада бә, кӧ сәр ԝирʼа нә, чьмки тʼӧ һʼӧкӧмәти бейи дәстура Хԝәде тʼӧнә у әԝе кӧ һәнә жи, жь Хԝәдеда нә.

²Аԝа кʼи кӧ бәр һʼӧкӧмәтийе рʼадьбә, әԝ бәр әʼмьре Хԝәде рʼадьбә у әԝе кӧ рʼадьбьн, диԝана Хԝәде сәр хԝәда тиньн.

³Чьмки сәрдар йед ԛәнщийе дькьн натьрсиньн, ле йед хьрабийе. Тӧ дьхԝази жь һʼӧкӧмәте нәтьрси? Хԝә ль ԛәнщийе бьгьрә, те бьби ширьне ԝе.

⁴Чьмки әԝ хьзмәткʼаре Хԝәде йә бона ԛәнщийед тә. Ле һәгәр хԝә ль хьрабийе бьгьри, же бьтьрсә, чьмки ԝи бадиһәԝа шур гьренәдайә. Әԝ хьзмәткʼаре Хԝәде йә, кӧ һерса Ԝи сәр ԝанда бьрʼежә, кʼижанед кӧ хьрабийе дькьн.

⁵Ләма әм гәрәке гӧра һʼӧкӧмәтада бьн, нә тʼәне ԝәки әм ль бәр һерсе нәкʼәвьн, ле бәле ԝәки исафа мә жи дьле мә рʼьһʼәт бьһелә.

⁶Бона ве йәке жи һун хәрщ жи дьдьн, чьмки әԝ хӧламед Хԝәде нә, борщдаред хәрщстандьне нә[93].

⁷Аԝа кʼерʼа чь дькʼәвә, ль ԝан вәгәрʼиньн, кʼерʼа хәрщ дькʼәвә, хәрщ бьдьне, кʼерʼа сәләф дькʼәвьн, сәләфа бьдьне, жь кʼе гәрәке бьтьрсьн, бьтьрсьн, кʼерʼа ԛәдьр дькʼәвә, ԛәдьре ԝи бьгьрьн.

⁸Тʼӧ тьштида дәйндаре тʼӧ кәси нәминьн, пештьри ль һәв һʼьзкьрьне, чьмки кʼи кӧ һәвале хԝә һʼьз дькә, тʼәмамийа Ԛануне дьԛәдинә.

⁹Әв тʼәмийед кӧ һәнә: «Зьнийе нәкә, нәкӧжә, нәдьзә, дьлһавьжийе нәкә»[94] у һәр чь тʼәмийед кӧ һәнә, дькʼәвьнә нава ве готьне: «Һәвале хԝә ԝәкә хԝә һʼьз бькә»[95].

¹⁰Һʼьзкьрьн хьрабийе ль һәвале хԝә накә. Аԝа һʼьзкьрьн сәре Ԛануне дьгьрә.

¹¹Ве йәке бькьн, чьмки һун заньн әв чь зәман ә. Ньһа иди ԝәхт ә һун жь хәԝе һʼьшйар бьн, чьмки ньһа хьлазбун һе незики мә йә, нә кӧ һьнге гава мә баԝәр кьр.

¹²Шәв гәләк чуйә, сьбәһ незик буйә, аԝа кьред тәʼристанийе әм жь хԝә дур хьн у чʼәкед рʼонайийе сәр хԝәва кьн.

¹³Ӧса бьжин чаԝа рʼонайа рʼоже, бе кучʼьксантийе, сәрхԝәшийе, бенамусийе, һʼәрамийе, шәрʼудийе у һʼәвсудийе.

¹⁴Ле Хӧдан Иса Мәсиһ ль хԝә бькьн мәртʼал у гӧһ нәдьнә ԝан хԝәстьнед бьнйатʼа хԝәйә мәрьвайи.