Read Пәймана Ну (Инщил) Рʼомайи 16 Bible Online

Рʼомайи 16 - Пәймана Ну (Инщил) bible

Рʼомайи 16

¹Әз тʼәмийа хушка Фойбе дьдьмә ԝә, йа кӧ бәрдәстийа щьвина Кәнхерйайе дькә.

²Һун ԝе бь наве Хӧдан ԛәбул кьн, чаԝа ль щьмәʼта Хԝәде дькʼәвә у гава дьбә һʼәԝще тьштәки, дәсте хԝә дьрежи ԝе кьн, чьмки әԝе жи хԝәйити гәләка кьрийә у ӧса жи мьн.

³Сьлаве бьдьнә Прьскилайе у Акила[105], һәвал-хәбатед мьнә шьхӧле Мәсиһ Исада.

⁴Ԝана бона мьн дәст жь әʼмьре хԝә кʼьшанд, нә кӧ тʼәне әз жь ԝан рʼази мә, ле тʼәмамийа щьвинед жь нәщьһуйа жи.

⁵У ль щьвина мала ԝанда жи сьлав кьн. Апенәтойе дәлале мьн жи сьлав кьн, кӧ Асйайеда баԝәрмәнде Мәсиһи пешьн ә.

⁶Сьлаве бьдьнә Мәрйәме, кӧ бона ԝә гәләк худан рʼетийә.

⁷Сьлаве бьдьнә Әндронико у Йунйасе пьсмам у һәвалед мьнә кәледа. Әԝ нава шандийада әʼйан ьн у бәри мьн баԝәрийа хԝә Мәсиһ анинә.

⁸Сьлаве бьдьнә Әмплийато, дәлале мьни жь Хӧдан.

⁹Сьлаве бьдьнә Урбано һәвал-хәбате мәйи шьхӧле Мәсиһда у Стахойе дәлале мьн.

¹⁰Сьлаве бьдьнә Апелис, кӧ бона Мәсиһ йәки кʼәти-рʼабуйи йә. Сьлаве бьдьнә мала Аристополо.

¹¹Сьлаве бьдьнә Һеродийоне пьсмаме мьн. Сьлаве бьдьнә ԝан, йед кӧ жь мала Нәркисо нә, нав баԝәрийа Хӧданда нә.

¹²Сьлаве бьдьнә Тьрифенайе у Тьрифосайе, кʼижан бона наве Хӧдан дьхәбьтьн. Сьлаве бьдьнә Пәрсисейа дәлал, кӧ гәләки худан рʼетийә бона Хӧдан.

¹³Сьлаве бьдьнә Рʼуфойе бьжартийе[106] Хӧдан у дийа ԝи у ӧса жи чаԝа дийа мьн.

¹⁴Сьлаве бьдьнә Асинкрито, Флегон, Һәрмес, Патробас, Һәрмас у хушк-бьрайед майинә тʼәви ԝан.

¹⁵Сьлаве бьдьнә Филолого у Йулийа, Неройис у хушка ԝи, ӧса жи Олимпас у тʼәмамийа щьмәʼта Хԝәдейә тʼәви ԝан.

¹⁶Сьлаве бьдьнә һәв бь рʼамусана шире һʼәлал. Һʼәму щьвинед Мәсиһ ль ԝә сьлав дькьн.

¹⁷Ньһа әз һиви жь ԝә дькьм хушк-бьрано, кӧ һун һʼәвза хԝә жь ԝан бькьн, йед кӧ жь ԝе һинбуне дәр, йа кӧ һун һин бунә, щӧдәбуне пешда тиньн у хәлԛе пʼьшк дькьн. Жь ԝан дур бьн.

¹⁸Чьмки йед ӧса хӧламтийе ль Хӧдане мә, Мәсиһ накьн, ле зьке хԝә дьчʼериньн. Бь заре хԝәш у һʼьләкʼарийе, йед сахьке дьле хԝә дьхапиньн.

¹⁹Гӧһдарийа ԝә нав һʼәмуйада бь нав у дәнг ә у әз бона ԝә ша мә, ле дьхԝазьм кӧ һун сәрԝахт бьн һьндава ԛәнщийеда у дьлсах бьн һьндава хьрабийеда.

²⁰У Хԝәдейе әʼдьлайийе зутьрәке ԝе сәре мирещьн бьне ньгед ԝәда бьпʼәлехә. Кʼәрәма Хӧдане мә Иса Мәсиһ тʼәви ԝә бә.

²¹Тимотʼейойе һәвал-хәбате мьн ль ԝә сьлав дькә, ӧса жи Лукйо, Йасон у Соспатройе пьсмамед мьн.

²²Әз Тәртийо жи бь наве Хӧдан ль ԝә сьлав дькьм, йе кӧ әв нәʼмә ньвиси.

²³Гайос ль ԝә сьлав дькә, ԛонахе мьн у йе тʼәмамийа щьвине. Ерастойе сәр хьзна бажер ль ԝә сьлав дькә у ӧса жи бьрайе Кьԝарто.

²⁴Кʼәрәма Хӧдане мә Иса Мәсиһ тʼәви ԝә һʼәмуйа бә. Амин[107].

²⁵Ньһа шькьр жь Ԝирʼа, Йе кӧ дькарә ԝә баԝәрийеда бьшьдинә, ԝәкә ԝе Мьзгинийа кӧ әз бона Иса Мәсиһ даннасин дькьм, ԝәкә ашкәрәбуна ԝе сӧрʼа кӧ һе дәԝред бәрейә бьһӧрида вәшарти мабу,

²⁶ле ньһа бь ньвисаред пʼехәмбәра әʼйан бу у бь әʼмьре Хԝәдейе һʼәта-һʼәтайе һатә наскьрьне, ԝәки һʼәму мьләт баԝәр бькьн у гӧһдар бьн.

²⁷Шькьр жь Хԝәдейе тʼәнейи сәрԝахтрʼа, бь сайа Иса Мәсиһ, һʼәта-һʼәтайе. Амин[108].