Read Пәймана Ну (Инщил) Рʼомайи 4 Bible Online

Рʼомайи 4 - Пәймана Ну (Инщил) bible

Рʼомайи 4

¹Әм иди чь бежьн бона Бьраһиме бавәʼшире хԝә, алийе бәдәнеда? Әԝи чь дит?

²Һәгәр Бьраһим бь кьред хԝә рʼаст һʼәсаб бьбуйа, һьнге дькарьбу бь кьред хԝә бьфьрʼийа, ле нә ль бәр Хԝәде.

³Ле кʼа ньвисар чь дьбежә? «Бьраһим Хԝәде баԝәр кьр у әԝ йәк жерʼа рʼасти һатә һʼәсабе»[21].

⁴Аԝа һәгәр йәк шьхӧләки дькә, маше ԝи жерʼа найе дайин чаԝа пʼешкʼеш, ле чаԝа дәйн.

⁵Ле һәгәр гӧмана йәки нә сәр шьхӧле ԝи йә, ле баԝәрийа хԝә Ԝи тинә, Йе кӧ нәпʼака бесущ дькә, бь ве баԝәрийе әԝ рʼаст һʼәсаб дьбә.

⁶Даԝьд жи аһа хԝәзийа хԝә ль ԝи мәрьви тинә, йе кӧ Хԝәде бейи кьра ԝи рʼаст һʼәсаб дькә.

⁷«Хԝәзи ль ԝан, кӧ нәһәԛийед ԝан һатьнә бахшандьне у гӧнед ԝан һатьнә ньхамтьне.

⁸Хԝәзи ль ԝи бәндәйи, кӧ Хӧдан ԝирʼа гӧнә һʼәсаб накә».[22]

⁹Гәло әва хԝәзийа ль сьнәтбуйийа те дайине, йан нәсьнәтбуйийа? Чаԝа мә гот, кӧ баԝәрийа Бьраһим жерʼа рʼасти һатә һʼәсабе[23].

¹⁰Ле бәле кʼәнге һатә һʼәсабе? Пәй сьнәтбунерʼа, йан бәри сьнәтбуне? Нә кӧ пәй сьнәтбунерʼа, ле бәри сьнәтбуне.

¹¹У паше әԝи сьнәтбун нишан станд, чаԝа мора рʼастһʼәсаббуне, бь ԝе баԝәрийа хԝәйә бәри сьнәтбуне. Бь ви аԝайи Бьраһим бу баве һʼәму баԝәрмәндед нәсьнәтбуйи, ԝәки әԝ жи рʼаст бенә һʼәсабе[24]

¹²у ӧса жи бу баве сьнәтбуйийа, нә кӧ тʼәне йе сьнәтбуйийа, ле йе ԝан жи, кʼижан пʼега ԝе баԝәрийеда дьчьн, йа кӧ Бьраһиме баве мә һе бәри сьнәтбуне баԝәр кьр.

¹³Әԝ созе Бьраһим у зӧрʼәта ԝирʼа һатә дайине кӧ дьнйайе ԝар бьн, нә кӧ бь кьред Ԛануне бу, ле бь ԝе йәке бу, кӧ ԝи баԝәр кьр у рʼаст һатә һʼәсабе[25].

¹⁴Һәгәр тʼәне әԝед жь кьред Ԛануне бьбуна хԝәйе ԝар, һьнге баԝәри ԝе пʼучʼ буйа у созе жи бәтал буйа[26].

¹⁵Чьмки Ԛанун һерсе рʼадькә. Дәра кӧ ԛанун тʼӧнә, ԛанунтʼәрʼьбандьн жи тʼӧнә.

¹⁶Бь ви аԝайи соз бь баԝәрийе те стандьне, ԝәки соз бона һʼәму зӧрʼәтед Бьраһим пʼешкʼешәкә әрекьри бә, нә кӧ тʼәне бона ԝанә йед кӧ ԛануне дьԛәдиньн, ле бона ԝан жи, йед кӧ мина Бьраһим баԝәр дькьн. Чьмки Бьраһим баве мә һʼәмуйа йә[27],

¹⁷чаԝа ньвисар ә: «Мьн тӧ кьри баве гәләк мьләта»[28]. Әԝ баве мә йә, ль бәр ԝи Хԝәдейе кӧ әԝи баԝәр кьр, ԝәки Әԝ мьрийа сах дькә у гази тьштед тʼӧнәнә дькә, чаԝа кӧ һәнә.

¹⁸Ԝи щийе кӧ гӧман нәмабу, Бьраһим бь гӧман баԝәр кьр, кӧ әԝе бьбә баве гәләк мьләта, чаԝа һатьбу готьне: «Зӧрʼәта тәйе жи ԝе һаԛаса бә»[29].

¹⁹У әԝ баԝәрийеда сьст нәбу, нә һʼале ԛальбе хԝәда ньһерʼи, ԝәки иди мина мьрийа бу, (чьмки әԝ незики сәд сали бу) у нә жи бәтʼьна Сәрайейә мьри ньһерʼи[30].

²⁰Ле баԝәрийа хԝә ль созе Хԝәде ани у дӧдьли нәбу, бь баԝәрийе сәр ԛәԝата хԝәда һат, шькьрийа хԝә Хԝәде ани

²¹у ԝе йәкеда баԝәр бу, кӧ Йе соз дайә ԝе бинә сери жи.

²²Бона ве баԝәрийе «жерʼа рʼасти һатә һʼәсабе»[31].

²³Ле әв готьн нә тʼәне бона Бьраһим һатә ньвисаре, кӧ Хԝәде әԝ рʼаст һʼәсаб кьр,

²⁴ле бәле әԝ бона мә жи ньвисар ә. Рʼастбуне мәрʼа жи бе һʼәсабе, кʼижанед кӧ баԝәрийа хԝә Ԝи тиньн, Йе кӧ Хӧдане мә Иса жь мьрьне рʼакьр.

²⁵Иса бона нәһәԛийед мә һатә кӧштьне у жь мьрьне рʼабу, кӧ әм рʼаст бенә һʼәсабе[32].