Read Пәймана Ну (Инщил) Корьнтʼи I 13 Bible Online

Корьнтʼи I 13 - Пәймана Ну (Инщил) bible

Корьнтʼи I 13

¹Һәгәр әз бь зьманед мәрьва йан мьлйакʼәта хәбәр дьм, ле дьле мьнда һʼьзкьрьн тʼӧнәбә, әзе бьбьмә мина ԝи зәнгьле кӧ дькә зьнгин йан жи болмед сьфрә кӧ дькьнә шьнгин.

²Һәгәр пʼешкʼеша пʼехәмбәртийе мьнрʼа һәбә у сәр һʼәму сӧрʼа вәбьм, һʼәму занәбуне фәʼм бькьм у һәгәр баԝәрийа мьн жи һаԛас һәбә, һʼәта чʼийа жи жь щи бьгӧһезьм, ле һʼьзкьрьн дьле мьнда тʼӧнәбә, әз нә тʼӧ тьшт ьм[62].

³У һәгәр һәбука хԝә пева бәлайи бәләнгаза кьм у бәдәна хԝә жи бьдьмә дәр бона шәԝьтандьне, ле һʼьзкьрьн дьле мьнда тʼӧнәбә, тʼӧ кʼар нагьһижә мьн.

⁴Һʼьзкьрьн думькдьреж у ширьн ә, һʼьзкьрьн һʼәвсудийе накә, һʼьзкьрьн кʼӧбар набә, пʼьшька хԝәда наԝәрьмә,

⁵бепʼәргал нинә, йа хԝә нагәрʼә, зу һерс накʼәвә, кʼине нажо,

⁶дьле хԝә ль нәһәԛийе ша накә, ле рʼастийерʼа ша дьбә.

⁷Һʼьзкьрьн һәр гав дадьхә, һәр гав баԝәр дькә, һәр гав хԝәйигӧман ә, һәр гав сәбьр дькә.

⁸Һʼьзкьрьн тʼӧ щар кʼӧта набә. Һәгәр пʼехәмбәрти һәбьн, ԝе бәтал бьн, һәгәр зьманед хәриб һәбьн, ԝе дәнгед ԝан бенә бьрʼине, һәгәр занәбун һәбә, ԝе дәрбаз бә һәрʼә.

⁹Бәле әм жь пʼьрʼи-һьндьки заньн у жь пʼьрʼи-һьндьки пʼехәмбәртийе дькьн.

¹⁰Ле гава кʼамьлти бе, һьнге нәкʼамьлти ԝе дәрбаз бә һәрʼә.

¹¹Гава әз зарʼ бум, мьн мина зарʼа хәбәр дьда, мина зарʼа дьфькьрим, мина зарʼа дьда бәр һʼәсеб. Гава әз мәзьн бум, әԝ тьштед зарʼотийе мьн жь хԝә дур хьстьн.

¹²Ньһа әм чаԝа ԛәрәтʼуки нәйнькеда дьбиньн, ле һьнге әме рʼу бь рʼу бьбиньн. Ньһа әз жь пʼьрʼи-һьндьки заньм, ле һьнге әзе тʼам нас бькьм, чаԝа әз һатьмә наскьрьне.

¹³Аԝа ньһа әв һәрсек дьминьн: Баԝәри, гӧман у һʼьзкьрьн. Ле һʼьзкьрьн сәр ԝанрʼа йә.