Read Пәймана Ну (Инщил) Корьнтʼи I 16 Bible Online

Корьнтʼи I 16 - Пәймана Ну (Инщил) bible

Корьнтʼи I 16

¹Ле ньһа дәрһәԛа кʼомәктʼопкьрьна бона щьмәʼта Хԝәде, мьн чаԝа тʼәми да щьвинед Галатйайе, һун жи ӧса бькьн:

²Һәр йәкшәм, дәсте жь ԝә һәр кәсива чьԛас те, бьра тьштәки дәсте хԝәрʼа паш хә, нәбә кӧ гава әз бем, һьнге бе тʼопкьрьне.

³У гава әз бем, һун жи рʼе кʼижанарʼа дьбиньн, әзе пе дәсте ԝан, бь ньвисар пʼешкʼешед ԝә бьшиньмә Оршәлиме.

⁴У һәгәр мьнрʼа жи бькʼәвә, кӧ әз һәрʼьм, иди әԝе тʼәви мьн бен.

⁵Пәй чуйина ԛәза Мәкәдонйайерʼа, әзе сәрики ль ԝә хьм, чьмки әзе Мәкәдонйайерʼа дәрбаз бьм.

⁶Дьбә кӧ ль щәм ԝә бьминьм, йан жи зьвьстана хԝә ԝьр дәрбаз кьм у һьнге һун дькарьн мьн вәрʼекьн, әз кʼӧда кӧ һәрʼьм.

⁷Чьмки әз ньһа нахԝазьм кӧ ԝә сәр рʼийа хԝә бьбиньм һәрʼьм, ле әз гӧман ьм кӧ хеләке щәм ԝә бьминьм, һәгәр Хӧдан һʼьз бькә.

⁸Ле ньһа әзе һʼәта Рʼожа Пенщийә һʼәсаб, ль Әфәсе бьминьм,

⁹чьмки дәргәһәки херейи мәзьн ль бәр мьн вәбуйә у пәйкʼәтийед мьн гәләк ьн.

¹⁰Һәгәр Тимотʼейо бе щәм ԝә, ӧса бькьн кӧ әԝ жь ԝә вәнәкʼьшә, чьмки әԝ жи бона Хӧдан дьхәбьтә, чаԝа әз.

¹¹Ӧса бьра тӧ кәс ԝи беԛәдьр нәкә. Ԝи бь хер-сьламәт вәрʼекьн, ԝәки бе щәм мьн, чьмки әз һивийа ԝи у бьрайед тʼәви ԝи мә.

¹²Ле дәрһәԛа Аполойе бьрада, мьн гәләки лава же кьр, кӧ тʼәви бьра сәр ԝәда бьһата, ле нета ԝи һатьне ньһа ԛәт тʼӧнәбу, ле ԝе бе, гава мәщал бькʼәве.

¹³Һʼьшйар бьминьн, баԝәрийеда һʼимгьрти бьн, әʼгит бьн, бьшьдьн,

¹⁴бьра һәр кьрьнед ԝә бь һʼьзкьрьне бьн.

¹⁵Ньһа һун заньн кӧ Стефанас мала хԝәва баԝәрмәндед ԛәза Ахайайейә пешьн ә у ԝан хԝә данә хьзмәткʼарийа щьмәʼта Хԝәде. Иди әз һиви жь ԝә дькьм хушк-бьрано,

¹⁶кӧ һун гӧрʼа йед ӧсада бьн, ӧса жи гӧрʼа ԝан һʼәмуйада, йед кӧ тʼәви шьхӧле ве хәбате дьбьн.

¹⁷Әз бона һатьна Стефанас, Фортунато у Ахайико ша мә, баре дьле мьнда ԝана дәԝса ԝә гьрт,

¹⁸бь ԝе йәке дьле мьн у ԝә жи рʼьһʼәт кьрьн. Ԛәдьре йед ӧса бьгьрьн.

¹⁹Щьвинед ԛәза Асйайеда ль ԝә сьлав дькьн. Акила у Прьскила тʼәви щьвина мала хԝәда гәләки йәктийа Хӧданда ль ԝә сьлав дькьн.

²⁰Һʼәму хушк-бьрайед вьр ль ԝә сьлав дькьн. Бь рʼамусана шире һʼәлал ль һәвдӧ сьлав кьн.

²¹Әв сьлав, бь дәстньвисара мьн Паԝлос ә.

²²Һәгәр йәк Хӧдан һʼьз накә, бьра ньфьрʼ ль ԝи бә. «Маранатʼа[80]».

²³Кʼәрәма Хӧдан Иса ль ԝә бә.

²⁴Әз ԝә пʼара Мәсиһ Иса кʼәтийа һʼьз дькьм.