Read Пәймана Ну (Инщил) Корьнтʼи I 2 Bible Online

Корьнтʼи I 2 - Пәймана Ну (Инщил) bible

Корьнтʼи I 2

¹Әз жи гава һатьмә щәм ԝә хушк-бьрано, әз бь хәбәр йан сәрԝахтийа кʼәмалә гьран нәһатьм сӧрʼа[5] Хԝәде ԝәва әʼйан кьм.

²Чьмки гава әз нава ԝәда бум, мьн нета хԝәда данәни кӧ тьштәки дьн һин кьм[6], пештьри Иса Мәсиһ у Әԝ жи Йе хачбуйи.

³Әз хԝәха һʼаләки сьстда, бь хоф у тьрс нава ԝәда бум.

⁴У готьн у һинкьрьна мьн, нә кӧ бь хәбәред сәрԝахтийа мәрьвайийә зархԝәшийе бу, ле бь избатийа ԛәԝата Рʼӧһʼе Пироз бу[7].

⁵Әв йәк аһа бу, ԝәки баԝәрийа ԝә бь сәрԝахтийа мәрьвайе нибә, ле бь ԛәԝата Хԝәде бә.

⁶Ле бәле дәрһәԛа сәрԝахтийеда әм йед рʼӧһʼанийә гьһиштирʼа хәбәр дьдьн, ле нә сәрԝахтийа ве дьне у нә жи йа сәрԝеред ве дьне, кӧ һʼӧкӧме ԝан бәтал дьбә.

⁷Ле әм дәрһәԛа сәрԝахтийа Хԝәдейә сӧрʼә вәшартида хәбәр дьдьн, йа кӧ Хԝәде һе бәри әʼфьрандьна дьнйайе, бона рʼумәта мә ԛьрар кьр.

⁸Жь сәрԝеред ве дьнйайе тʼӧ кәси әв сәрԝахтийа фәʼм нәкьр, чьмки һәгәр фәʼм бькьрана, ԝе Хӧдане рʼумәте хач нәкьрана.

⁹Ле чаԝа ньвисар ә: «Әԝ тьштед кӧ чʼәʼва нәдитьнә у гӧһа нәбьһистьнә, дьле мерьврʼа дәрбаз нәбунә, Хԝәде бона ԝан һазьр кьрьнә, йед кӧ Ԝи һʼьз дькьн»[8].

¹⁰Ле бәле Хԝәде бь Рʼӧһʼе Хԝә әв йәк ль бәр мә вәкьр. Чьмки Рʼӧһʼ һәр тьшти әʼнәнә дькә, һʼәта нет-мәрәмед Хԝәдейә кʼур жи.

¹¹Кʼи һаш жь кел-мәʼнийед мерьв һәйә, пештьри ԝи рʼӧһʼе нава ԝида? Ӧса жи кәс һаш жь йа Хԝәде тʼӧнә, пештьри Рʼӧһʼе Хԝәде.

¹²Мә нә кӧ рʼӧһʼе ве дьнйайе стандийә, ле әԝ Рʼӧһʼе жь Хԝәде, ԝәки әм ԝан тьштед жь Хԝәдеда мәрʼа дайи фәʼм бькьн.

¹³Әм бона ван тьшта бь готьнед жь сәрԝахтийа мәрьвайе һинбуйи хәбәр надьн, ле бь готьнед һинкьрьна жь Рʼӧһʼе Хԝәде хәбәр дьдьн, тьштед рʼӧһʼани ԝанрʼа шьровәдькьн, йед кӧ хԝәйи-Рʼӧһʼе Хԝәде нә[9].

¹⁴Ле мәрьве нәхԝәйи-Рʼӧһʼ ԝан тьштед Рʼӧһʼе Хԝәде ԛәбул накә, бь йа ԝи әв йәкана беһʼьши нә у нькарә жи фәʼм бькә, чьмки һʼале ԝан тьшта бь рʼӧһʼани тенә әʼнәнәкьрьне.

¹⁵Ле йе хԝәйи-Рʼӧһʼе Хԝәде һәр тьшти әʼнәнә дькә, ле бәле хԝәха жь кәсәки найе әʼнәнәкьрьне.

¹⁶Чаԝа ньвисар ә: «Кʼе нет-фькьра Хӧдан пе һʼәсийа, кӧ ширәтәке бьдә Ԝи?»[10] Ле нет-фькьра Мәсиһ сәре мәда йә.