Read Пәймана Ну (Инщил) Корьнтʼи I 3 Bible Online

Корьнтʼи I 3 - Пәймана Ну (Инщил) bible

Корьнтʼи I 3

¹Ле мьн хушк-бьрано, нькарьбу тʼәви ԝә хәбәр да чаԝа тʼәви йед хԝәйи-Рʼӧһʼе Хԝәде, ле чаԝа тʼәви бәндед ве дьне, чаԝа тʼәви хьшимед баԝәрийа Мәсиһда.

²Мьн шир да ԝә, ле нә кӧ хԝарьна гьран, чьмки ԝә һе нькарьбу бьхԝара. У һун ньһа жи нькарьн бьхԝьн,

³чьмки һун һәла һе мина бәндед ве дьне нә. Һʼәта кӧ нава ԝәда һʼәвсуди у һәврʼькʼи[11] һәнә, гәло әв йәкана нә мәрьвайи нә? У һун мина бәндед ве дьне нажин?

⁴Мәсәлә кӧ гава йәк дьбежә: «Әз Паԝлоси мә» у йе дьн: «Әз Аполойи мә», һун нә мина бәндед ве дьне нә?

⁵Иди кʼи йә Аполо? Кʼи йә Паԝлос? Әԝ ԛӧльхкʼаред Хԝәде нә, бь кʼижана ԝә баԝәр кьр. Хӧдан чьԛас шьхӧл дайә ԝан һәр кәси, һаԛаси жи дькьн.

⁶Мьн дачʼьканд, Аполо авда, ле Хԝәде гиһанд[12].

⁷Аԝа нә йе дачʼьканд тьштәк ә, нә жи йе авда, ле йе гиһанд, кӧ Хԝәде йә.

⁸Йе дачʼьканд у йе авда йәк ьн у һәр кәсе һәԛе хԝә бьстинә, ԝәкә хәбата хԝә.

⁹Чьмки әм тʼәвайи бона Хԝәде дьхәбьтьн, һун жи зәвийа Хԝәде нә, авайийе Хԝәде нә.

¹⁰Мьн жи ԝәкә ԝе кʼәрәма кӧ Хԝәде да мьн, мина чирәдәстәки сәрԝахт һʼим авит, ле йәки дьн сәр чедькә. Ле бәле тʼәне бьра һәр кәс һаш жь хԝә һәбә, чаԝа чедькә.

¹¹Чьмки һʼимәки дьн кәсәк нькарә бавежә, пештьри йе авити, кӧ Иса Мәсиһ ә.

¹²Ль сәр ви һʼими йәк дькарә бь зерʼ, зив, кәвьред ԛимәт, дар, гиһе, йан кайе чекә,

¹³ле бь чь тьшти жи чекә, шьхӧле һәр кәси ԝе әʼйан бә, чьмки әԝ Рʼож ԝе бьдә кʼьфше, әԝе бь егьр әʼйан бә у кьре һәр кәси чь һʼалида бә, агьре бьщерʼьбинә.

¹⁴Һәгәр шьхӧле йәки сәр ви һʼиме чекьри бьминә, әԝе һәԛ бьстинә,

¹⁵ле һәгәр шьхӧле йәки бьшәԝьтә, әԝе зийане бькʼьшинә, ле хԝәха ԝе хьлаз бә, чаԝа йәки нава егьррʼа дәрбазбуйи.

¹⁶Чьма һун ньзаньн кӧ һун пʼарьстгәһа Хԝәде нә у Рʼӧһʼе Хԝәде нава ԝәда дьминә?[13]

¹⁷Һәгәр йәк пʼарьстгәһа Хԝәде ԝеран кә, Хԝәде жи ԝе ԝи ԝеран кә, чьмки пʼарьстгәһа Хԝәде пироз ә у һун ьн әԝ пʼарьстгәһ.

¹⁸Бьра тʼӧ кәс хԝә нәхапинә. Һәгәр йәк жь ԝә ль гора ԛәйдед ве дьнйайе хԝә сәрԝахт дьбинә, бьра бьбә беһʼьш, ԝәки бьбә сәрԝахт.

¹⁹Чьмки сәрԝахтийа ве дьнйайе ль бәр Хԝәде беһʼьши йә. Чаԝа ньвисар ә: «Әԝ сәрԝахта нава һʼьләкʼарийа ԝанда дьгьрә»[14]

²⁰у диса: «Хӧдан занә кӧ шеԝьред сәрԝахта пʼучʼ ьн»[15].

²¹Дә бьра иди тʼӧ кәс пе мәрьва нәфьрʼә! Бәле һәр тьшт жи пʼара ԝә нә.

²²Паԝлос, Аполо, Пәтрус[16], дьнйа, жийин, мьрьн, тьштед кӧ ньһа һәнә, йан йед ԝе бен, һәр тьшт пʼара ԝә нә,

²³һун жи пʼара Мәсиһ ьн у Мәсиһ жи пʼара Хԝәде йә!