Read Пәймана Ну (Инщил) Корьнтʼи I 4 Bible Online

Корьнтʼи I 4 - Пәймана Ну (Инщил) bible

Корьнтʼи I 4

¹Аԝа гәрәке мәрьв мә ӧса һʼәсаб кьн, чаԝа бәрдәстийед Мәсиһ у ԝәкʼилед сӧрʼед Хԝәде.

²Жь ԝәкʼил жи дькʼәвә кӧ әԝ амьн бә.

³Ле бона мьн әв йәк нә тʼӧ тьшт ә, кӧ фькьред ԝә йан йед диԝана мәрьвайе сәр мьн чь нә, әз хԝәха жи лома ль хԝә накьм.

⁴Исафа мьн рʼьһʼәт ә, нә кӧ бь ве йәке әз хԝә софи дькьм, ле һʼакьме мьн Хӧдан ә.

⁵Аԝа жь ԝәхт зутьр лома нәкьн, һʼәта һатьна Хӧдан. Әԝе тьштед тәʼрийеда вәшарти дәрхә рʼонайе у шеԝьред дьла бьдә әʼйанкьрьне. У һьнге һәр кәсе ԛимәте хԝә жь Хԝәде бьстинә.

⁶Әв йәкана хушк-бьрано, мьн бона ԝә анинә сәр хԝә у Аполо, ԝәки һун ве йәке жь мә һин бьн: «Жь ньвисаре дәрнәйен». Һьнге жь ԝә тʼӧ кәс ԝе йәк пе йәки нәфьрʼә.

⁷Кʼи тә жь хәлԛе фьрԛи дькә? Чи тә һәйә, кӧ тә пʼешкʼеш нәстандийә? Ле ԝәки тә стандийә, чьма пʼәйе хԝә дьди чаԝа тә нәстандьбә?

⁸Һун иди тʼер бунә, иди һʼьрʼ бунә! Бейи мә иди бунә пʼадша! Ах хԝәзи һун бьбуна пʼадша, әме жи тʼәви ԝә бьбуна пʼадша!

⁹Чьмки әз тʼәхмин дькьм, кӧ Хԝәде әм шанди авитьнә пашийа кʼочʼа, чаԝа жь мьрьнерʼа дайи. Әм дьнеда бунә итойин, һьн ль бәр мьлйакʼәта, һьн жи бәр мәрьва.

¹⁰Әм беһʼьш ьн бона Мәсиһ, ле һун сәрԝахт ьн йәктийа Мәсиһда! Әмә сьст ьн, ле һунә ԛәԝат! Һунә хԝәйирʼумәт ьн, ле әмә берʼумәт!

¹¹Һʼәта ньһа жи әм бьрʼчи дьминьн, тʼи дьминьн, бе сьтʼар дьбьн, тенә кʼӧтане у дәро-дәр дьбьн.

¹²Әм бь дәсте хԝә дьхәбьтьн, бь худана хԝә дьжин. Гава мә рʼәзил дькьн, әм дӧа ль ԝан дькьн, гава мә дьзериньн, әм сәбьр дькьн,

¹³гава наве мәрʼа дьлизьн, әм ль бәр ԝан дадьхьн. Әм бунә гәмара ве дьнйайе, һʼәта ньһа жи һәр тьштида бунә хԝәли!

¹⁴Әз ве йәке ԝәрʼа дьньвисьм, нә кӧ ԝә бьдьмә шәрме, ле ԝәки ԝә мина зарʼед хԝәйә дәлал ширәт кьм.

¹⁵Һәгәр ԝе жийина ԝәйә тʼәви Мәсиһда бь һʼәзара тʼәрбәтдаред ԝә һәбьн, ле тʼәне бавәки ԝә һәйә, чьмки ԝе жийина ԝәйә тʼәви Мәсиһ Исада һун жь мьн бь Мьзгинидайине дьне кʼәтьн.

¹⁶Аԝа һиви жь ԝә дькьм, чʼәʼв бьдьнә мьн[17].[18]

¹⁷Бона ве йәке мьн Тимотʼейо сәр ԝәда шанд, лаԝе хԝәйи дәлал у һьндава Хӧданда амьн. Әԝе ԝан рʼе-дьрбед мьнә Мәсиһ Исада гьрти бькә бира ԝә, кӧ әз чаԝа ль һәр дәра, һʼәму щьвина һин дькьм.

¹⁸Һьнәк жь ԝә бабах бунә, ԝан тʼьре әзе нәйемә щәм ԝә.

¹⁹Ле әзе зутьрәке сәр ԝәда бем, һәгәр Хӧдан һʼьз бькә у әзе нә кӧ ль готьнед бабаха бьньһерʼьм, ле һʼӧнӧред ԝан.

²⁰Чьмки Пʼадшатийа Хԝәде нә кӧ хәбәрданеда йә, ле һʼӧнӧрда йә.

²¹Һун чаԝа дьхԝазьн? Әз бь кʼӧлме сәр ԝәда бем, йан бь һʼьзкьрьне у бәрбьһерийе?