Read Пәймана Ну (Инщил) Корьнтʼи II 10 Bible Online

Корьнтʼи II 10 - Пәймана Ну (Инщил) bible

Корьнтʼи II 10

¹Әз, Паԝлос хԝәха һиви жь ԝә дькьм, бь мьлукти у ширьнайийа Мәсиһ, чаԝа те готьне кӧ әз рʼу бь рʼу нава ԝәда мина бәрхәки мә, ле дурва һьндава ԝәда мина шерәки мә.

²Әз рʼәща дькьм, ӧса нәкьн кӧ гава бем жи бьбьмә шер, чьмки әз әʼсәйи заньм кӧ әз дькарьм тӧрӧш кьм һьндава ԝанда жи һʼьшк бьм, йед кӧ бона мә ӧса дьфькьрьн, йанчийә әм бь мәрьвайи дькьн.

³Бәле рʼаст ә әм мәрьв ьн, ле бь мәрьвайи әскәрийе накьн.

⁴Чʼәкед әскәрийа мә, нә йе мәрьвайи нә, ле йед ԛәԝатә жь Хԝәде нә, бона ԝеранкьрьна тʼәʼбийа.

⁵Әм ԝан шеԝьра у һʼәму бьльндщийед кʼӧбарийейә мьԛабьли занәбуна Хԝәде бәтал дькьн у һʼәму фькьра дькьнә һесир, ельми Мәсиһ дькьн.

⁶Әм һазьр ьн щәза бьдьнә һʼәму нәгӧһдара, гава гӧһдарийа ԝә тʼам бә.

⁷Һун рʼәнг-рʼуйа дьньһерʼьн. Кʼи хԝәда гӧман ә, кӧ әԝ пʼара Мәсиһ ә? Бьра ве жи бьфькьрә, кӧ чаԝа әԝ пʼара Мәсиһ ә, ӧса жи әм ьн.

⁸Чьмки һәгәр әз һьнәки жи зедә дьфьрʼьм, бона ԝе һʼӧкӧмдарийа кӧ Хӧдан да мә, тьштәки шәрмийе теда тʼӧнә, әԝ бона авабуна баԝәрийа ԝә йә, нә кӧ хьраббуне.

⁹Аԝа әз дькьм кӧ ӧса кʼьфш нәбә, йане әз бь нәʼмәйед хԝә ԝә дьтьрсиньм.

¹⁰Чаԝа һьнәк дьбежьн: «Нәʼмәйед ԝи һʼьшк ьн у бь ԛәԝат ьн, ле әԝ диндара хԝәва бәләнгазәк ә у хәбәрданеда жи йәки пенәбуйи йә».

¹¹Йед ӧса бьра фәʼм бькьн, әм дурва бь хәбәр у нәʼмәйед хԝәва чаԝа нә, незик кьред хԝәда жи ӧса нә.

¹²Рʼаст әм нәԝерьн, хԝә сәр мезине бькʼьшиньн у һьмбәри ԝан кьн, йед кӧ хԝәха пәсьне хԝә дьдьн. Әԝана надьнә бәр һʼьше хԝә, гава нава хԝәда хԝә пе һәв чап дькьн у хԝә дьдьнә бәр һәв.

¹³Ле чь жь пʼәйдайина мә дькʼәвә, әм ньге хԝә жь бәрʼа хԝә дьрежтьр накьн, ле ԝәкә ԝи синоре дайи, чьԛас Хԝәде кьрә пʼара мә, кӧ дьгьһижә һʼәта щәм ԝә.

¹⁴Әм жь синор дәр гавәкә хԝә навежьн, чаԝа һе нәгьһиштьбьнә щәм ԝә, чьмки гава рʼастийе кʼәвә әм бь Мьзгинидайина Мәсиһ иди гьһиштьнә һʼәта щәм ԝә.

¹⁵Әм жь синор дәрнайен у пе хәбата һьнәкед дьн нафьрʼьн. Ле әм ԝе гӧмане нә, кӧ баԝәрийа ԝә бьгьһижә, ԝәкә ԝе дайина кӧ мә стандийә, хәбата мә жи нава ԝәда һе зедә бәрфьрә бә.

¹⁶Әм дьхԝазьн кӧ жь ԝә ԝедатьр дәрбаз бьн, Мьзгинийе щийед дьн жи даннасин кьн, нә кӧ әм бь кьре йәки дьн бьфьрʼьн, йе кӧ синоре хԝәда кьрийә.

¹⁷Ле чаԝа ньвисар ә: «Йе кӧ дьфьрʼә, бьра пе Хӧдан бьфьрʼә»[29].

¹⁸Чьмки нә кӧ әԝе пʼәйе хԝә дьдә, ль Хӧдан ԛәбул ә, ле йе кӧ Хӧдан пʼәйе ԝи дьдә.