Read Пәймана Ну (Инщил) Корьнтʼи II 11 Bible Online

Корьнтʼи II 11 - Пәймана Ну (Инщил) bible

Корьнтʼи II 11

¹Әз дьхԝазьм кӧ һун бькарьбьн һьнәки беһʼьшийа мьн бьбьһерьн! Ле бькьн кӧ бьбьһерьн жи!

²Әз кʼӧмрʼәшийе ԝә дькьм, бь ԝе кʼӧмрʼәшийа Хԝәде. Чьмки мьн һун йәкирʼа, аԝа готи Мәсиһрʼа нишан кьрьн, ԝәки ԝә мина ԛизәкә бькʼьр ль бәр Ԝи бьдьмә сәкьнандьне.

³Ле тʼәне әз дьтьрсьм, тӧԝәрә чаԝа мәʼр бь фелбазийа хԝә Һеԝа хапанд, ӧса жи әԝ һʼьше ԝә бьчәлԛинә у һун дәсте хԝә жь ширһʼәлали у дьлсахийа хԝәйә һьндава Мәсиһда бькьн[30].

⁴Гава йәк те у Исаки дьн даннасин дькә, кʼижан мә даннасин нәкьрийә, йан рʼӧһʼәки дьн һун дьстиньн, кʼижан ԝә жь мә нәстандийә, йан мьзгиникә дьн дьдә, кӧ мә нәдайә ԝә, һун ван тьшта рʼьнд дьбьн.

⁵Ле бь тʼәхмина мьн әз тʼӧ тьштива жь ԝан шандийед әʼйанә һа кемтьр ниньм!

⁶Дьбә әз хәбәрданеда нә сәр хԝә мә, ле нә алийе занәбунеда. Мә әв йәк һʼәму алийава һәр тьштида нишани ԝә дайә.

⁷Гәло мьн гӧнә кьр, кӧ Мьзгинийа Хԝәде бе һәԛ да ԝә, хԝә жи бәр ԝә шкенанд, кӧ һун бьльнд бьн?

⁸Мьн щьвинед майин тʼалан кьрьн жь бәр һәԛе хԝәва, ԝәки хьзмәткʼарийе ԝәрʼа бькьм.

⁹У гава әз ль щәм ԝә бумә һʼәԝще тьштәки, мьн гьрани нәда жь ԝә тʼӧ кәси, чьмки әԝ баԝәрмәндед кӧ жь Мәкәдонйайе һатьбун, чь кемасийед мьн һәбун, ԝана дәсте хԝә дьрежи мьн кьр. Бәле мьн һәр алийава кьрийә кӧ гьранийе нәдьмә ԝә у дькьм кӧ нәдьм жи[31].

¹⁰Бь ԝе рʼастийа Мәсиһ, йа кӧ нава мьнда йә, рʼуспитийа мьн ԝе дор-бәред ԛәза Ахайайеда жи бәтал дәрнәйе.

¹¹Чьма әз аһа дькьм? Әз ԝә һʼьз накьм? Ԝе йәке Хԝәде занә!

¹²У әз чаԝа дькьм, әзе ӧса жи бькьм, ԝәки рʼе нәкʼәвә ԝан, йед кӧ мәʼнийа дьгәрʼьн, ԝәки пʼәйе хԝә бьдьн, йанчийә әԝ жи мина мә дьхәбьтьн.

¹³Ле на, йед ӧса шандийед дәрәԝ ьн, пʼалед ԛәлп ьн, хԝә дькьнә дьлԛе шандийед Мәсиһә рʼаст.

¹⁴У әв йәк нә тьштәки әʼщебмайине йә! Мирещьн хԝәха жи хԝә дькә дьлԛе мьлйакʼәте рʼонайийе.

¹⁵Һьлбәт нә тьштәки мәзьн ә, кӧ хьзмәткʼаред ԝи жи бькʼәвьнә дьлԛе хьзмәткʼаред һәԛийе. Ахьрийа ԝане ԝәкә әʼмәлед ԝан бә.

¹⁶Диса дьбежьм, бьра тʼӧ кәс мьн беһʼьш һʼәсаб нәкә. Ле һәгәр һун дькьн жи, иди бьра мьн мина йәки беһʼьш ԛәбул кьн, кӧ әз жи һьнәки пʼәйа бемә хԝә.

¹⁷Чь кӧ дьбежьм, рʼаст ә ль Хӧдан хԝәш найе, ле чаԝа йәки бе һʼәмди хԝә, бәр байе наве хԝә кʼәти.

¹⁸Гәләк бь мәрьвайи пʼәйе хԝә дьдьн, әзе жи пʼәйа бемә хԝә.

¹⁹Һун мәрьвнә сәрԝахт ьн, ләма бь дьләки ша ль беһʼьша сәбьр дькьн!

²⁰Бәле, һун сәбьр дькьн, гава йәк ԝә дькә хӧлам, йан һәбука ԝә дьхԝә, йан ԝә кʼара хԝәрʼа дьдә хәбате, йан сәр ԝәрʼа кʼӧбар дьбә, йан рʼуйе ԝә дьхә.

²¹Әз бь шәрмийе дьбежьм, кӧ әм ԝе йәкеда пенәбуйи бун! Һәгәр йәк рʼуйе ԝи дьгьрә бь тьштәки бьфьрʼә, рʼуйе мьн жи дьгьрә, (әз ве йәке жь бефәʼмийа хԝә дьбежьм).

²²Әԝана ибрани нә? Әз жи. Исраели нә? Әз жи. Жь рʼькʼьнйата Бьраһим ьн? Әз жи.

²³Ԛӧльхкʼаред Мәсиһ ьн? (Беһʼьши хәбәр дьдьм), әз һе жь ԝан зедәтьр ьм! Жь ԝан зәʼфтьр хәбьтимә, жь ԝан зәʼфтьр кʼәтьмә кәла, жь ԝан зәʼфтьр ледан хԝарийә, гәләк щара һʼәта бәр дәре мьрьне жи чумә.

²⁴Бь дәсте щьһуйа пенщ щара, жь чьли йәк кем, бь ԛамчийа һатьмә ледане[32],

²⁵се щара бь дәсте рʼомийа бь шьва һатьмә ледане, щарәке әз дамә бәр кәвьра, се щара рʼасти гәмиԝәлгәрʼандьне һатьмә, шәв у рʼожәке бәʼреда мамә[33].

²⁶Гәләк рʼеԝитийед хԝәда нава щурʼә-щурʼә ԛәдә-бәлада бумә: Жь чʼәма, жь рʼебьрʼа, жь мьләте хԝә, жь нәщьһуйа, бажерда, чол-бәстада, сәр бәʼре, жь бьрайед дәрәԝ[34].

²⁷Дьхәбьтим, дьчәрчьрим, гәләк щара хәԝе шәва нәдькьр, тʼи-бьрʼчи, гәләк щара бе нан, сәрме у бесьтʼарийеда бум.

²⁸Пештьри тьштед майин, хәмед һʼәму щьвинайә һәр рʼож жи сәр мьн тʼоп дьбьн.

²⁹Гава йәк сәр һʼале хԝәда дьгьри, әз жи тʼәви ԝи дьгьрим! Гава йәк жь рʼе те дәрхьстьне, дьле мьн жи дьԛьлԛьлә!

³⁰Һәгәр лазьм бә әз пʼәйе хԝә бьдьм, әзе сәр һʼалед хԝәйә сьст пʼәйа бемә хԝә.

³¹Хԝәдейе Баве Хӧдан Иса, кӧ һʼәта-һʼәтайе һежайи шькьрийе йә, занә кӧ әз дәрәԝа накьм.

³²Бажаре Шамеда ԝәлийе бәрдәстийе Аретас пʼадша, бона кӧ мьн бьгьрә, нобәдар дабунә бәр дәргәһед бажер[35],

³³әз пе сәпәте пʼәнщәрәкерʼа сурева дахьстьмә хԝаре у жь дәсте ԝи рʼәвим.