Read Пәймана Ну (Инщил) Корьнтʼи II 12 Bible Online

Корьнтʼи II 12 - Пәймана Ну (Инщил) bible

Корьнтʼи II 12

¹Мьн дькʼәвә әз пʼәйа бьдьмә хԝә, ле рʼасти кʼара ԝе тʼӧнә. Ле бәле әзе ньһа дәрбази сәр ԝан дитьн у әʼйантийа бьм, йед кӧ Хӧдан нишани мьн данә.

²Әз баԝәрмәндәки Мәсиһ нас дькьм, чардәһ сал пешда, (ньзаньм ԛальбда бу, ньзаньм бе ԛальб бу, әԝ Хԝәде занә), һʼәта әʼзмане сьсийа[36] һатә һьлатьне.

³У әз заньм кӧ әв мәрьва, (ԛальбда бу, бе ԛальб бу, әз ньзаньм, ԝе йәке Хԝәде занә),

⁴һʼәта бӧһьште һатә һьлатьне у тьштед найенә готьне бьһистьн кӧ жь мерьв накʼәвә бона ԝан тьшта хәбәр дә жи.

⁵Әзе бона йе һа пʼәйа бемә хԝә, ле бона хԝә пʼәйа надьмә хԝә, пештьри сәр һʼале сьстийед хԝә.

⁶Ле һәгәр әз бьхԝазьм жи пʼәйе хԝә бьдьм, әв нә беһʼьши йә, чьмки әз рʼастийе дьбежьм. Ле әз хԝә дьгьрьм, кӧ нәбә йәк сәр мьн тьштәки зедә бьфькьрә, пештьри тьште кӧ жь мьн дьбьһе йан дьбинә.

⁷У ԝәки нәбә әз бона гәләк әʼйантийед нәбәрһʼьша кʼӧбар бьм, бәлакә мина дәрзике ԛальбе мьнда мьнрʼа һатә дайине, мьлйакʼәтәки жь мирещьн, кӧ тʼәпа бе мьн, ԝәки әз кʼӧбар нәбьм.

⁸Бона ве йәке мьн се щара һиви жь Хӧдан кьр, кӧ ве йәке жь мьн дур хә,

⁹ле Әԝи мьнрʼа гот: «Кʼәрәма Мьн бәси тә йә, чьмки ԛәԝата Мьн сьстийада мийасәр дьбә». Аԝа әзе бь дьләки ша һʼале сьстийед хԝәда бьфьрʼьм, ԝәки ԛәԝата Мәсиһ нава мьнда бә.

¹⁰Ләма жи әз бона наве Мәсиһ сьстийа, ԛара, һесири-бәләнгазийа, зерандьна у тәʼли-тәнгийа бәгәм дькьм, чьмки гава әз сьст дьбьм, һьнге ԛәԝат дьбьм.

¹¹Рʼасти мьн беһʼьши кьр кӧ пʼәйе хԝә да, ле ԝә пʼейи сәр мьн кьр! Гәрәке ԝә пʼәйе мьн бьда. Әз тʼӧ тьштива жь ԝан шандийед ԝәйә әʼйан кемтьр нимә, ле әз хԝәха жи нә тʼӧ тьшт ьм.

¹²Нишанед шандитийа рʼаст, аԝа готи нишан, кʼәрәмәт у кьред ԛәԝат, нава ԝәда бь тʼәмамийа сәбьре һатьнә кьрьне.

¹³Мьн чь тьштива ԛәдьре ԝә жь ԛәдьре щьвинед майин кемтьр гьртийә, пештьри ԝе йәке кӧ мьн гьрани нәда ԝә? Бьбахшиньнә мьн ве нәһәԛийе!

¹⁴Әва се щар ә әз кʼаре хԝә дькьм, кӧ сәр ԝәда бем. У әз гьранийе надьмә ԝә. Чʼәʼве мьн нә ль һәбука ԝә йә, ле ль ԝә йә! Чьмки нә кӧ гәрәке зарʼ бона де-бава бькьн, ле де-бав бона зарʼа.

¹⁵Әзе бь дьләки ша, хԝә жи у мал-һʼале хԝә жи бона ԝә бьдьм. Һәгәр әз һе гәләки ԝә һʼьз бькьм, гәло һуне мьн һьндьки һʼьз бькьн?

¹⁶Әм һа һьлдьн, кӧ мьн гьрани нәдайә ԝә, ле бь йа һьнәка әзи һʼьләкʼар бумә у бь фелбазийа хԝә һун авитьнә тʼәләка хԝә.

¹⁷Гәло мьн бь дәсте әԝед кӧ мьн сәр ԝәда шандьн, һун кʼара хԝәрʼа данә хәбате?

¹⁸Мьн һиви жь Тито кьр у әԝ бьра тʼәви ԝи шанд. Гәло Тито һун кʼара хԝәрʼа данә хәбате? Мә бь рʼӧһʼәки нәдькьр? Әм рʼекеда нәдьчун?

¹⁹Дьбә кӧ һун тʼәмамийа ви ԝәхтида дьфькьрьн, кӧ әм дьхԝазьн хԝә ль бәр ԝә рʼуспи кьн? На! Ле ль бәр Хԝәде әм йәктийа Мәсиһда хәбәр дьдьн у һәр тьшти дәлално, бона кʼара ԝә дьбежьн.

²⁰Әз дьтьрсьм, гава әз бем, тӧԝәрә ԝә ӧса нәбиньм, чаԝа әз дьхԝазьм у һун жи мьн ӧса нәбиньн, чаԝа һун дьхԝазьн. Дьтьрсьм кӧ һе нава ԝәда шәрʼ-дәʼԝ һәбьн, һʼәвсуди, һерскʼәтьн, һәврʼькʼи[37], хәйб, бӧхдан, кʼӧбар-бабахи у бетʼәрбәти.

²¹Дьтьрсьм, кӧ гава әз диса сәр ԝәда бем, Хԝәдейе мьн сәре мьн ль бәр ԝә бәржер кә у бона гәләка шине бькьм, кʼижана пешда гӧнә кьрьнә у жь кьред һʼәрамийе, бенамусийе у толтийе тʼобә нәкьрьбьн.