Read Пәймана Ну (Инщил) Корьнтʼи II 3 Bible Online

Корьнтʼи II 3 - Пәймана Ну (Инщил) bible

Корьнтʼи II 3

¹Гәло әм диса вәдьгәрʼьн, хԝәха пәсьне хԝә бьдьн? Йан мина һьнәка мәрʼа лазьм ә әм шәʼдәнәʼма сәр ԝәда бьшиньн, йан жь ԝә бьстиньн?

²Нә һун ьн шәʼдәнәʼмед мә дьле мәда ньвисар, алийе һәр мәрьвида наскьри у хԝәнди?

³Кʼьфш ә кӧ һун нәʼма Мәсиһ ьн бь хьзмәткʼарийа мә ньвисар, нә кӧ бь һʼӧбьре, ле бь Рʼӧһʼе Хԝәдейе сах, нә кӧ сәр сәлед кәвьри, ле сәр тʼәхтед дьле хун у гошт[6].

⁴Әм ве йәке Хԝәдеда гӧман ьн бь сайа Мәсиһ.

⁵Нә кӧ әм жь хԝә һʼәсаб дькьн кӧ әм лайиԛи ве кьрьне нә, ле карина мә жь Хԝәде йә.

⁶Әԝи әԝ карин да мә, ԝәки әм бьбьнә ԛӧльхкʼаред пәймана ну, нә кӧ йе ньвисаре, ле йе Рʼӧһʼ, чьмки ԛануна ньвисар дькӧжә, ле Рʼӧһʼ дьдә жийине.

⁷Аԝа һәгәр әԝ ԛӧльхе кӧ сәр кәвьра бь һʼәрфа кʼолайи бу у ахьрийе мьрьне пешда тинә һаԛас хԝәйирʼумәт бу, ԝәки зарʼед Исраел нькарьбун рʼуйе Муса бьньһерʼийана, жь дәст ԝе шәԝԛа рʼуйе ԝийи кӧ диса ԝе дәрбаз буйа бьчуйа[7],

⁸ле бәле ԛӧльхе Рʼӧһʼ ԝе һе чьԛас хԝәйирʼумәт бә?

⁹Чьмки һәгәр әԝ ԛӧльхе кӧ ахьрийе диԝан сәр мәрьвада дани, һаԛас хԝәйирʼумәт бу, һе чьԛас зедә ԝе хԝәйирʼумәт бә әԝ ԛӧльхе кӧ мәрьв пе бесущ дьбьн.

¹⁰Бәле йе кӧ хԝәйирʼумәт бу, әԝ берʼумәт дәркʼәт жь бәр ԝе рʼумәта кӧ сәр ԝерʼа бу.

¹¹Һәгәр ԛӧльхе кӧ ԝе дәрбаз бьбуйа бьчуйа хԝәйирʼумәт бу, иди йе кӧ ԝе бьминә, һе чьԛас хԝәйирʼумәт ә!

¹²Аԝа әм хԝәйе ве гӧмане нә, ләма хәбәрдана хԝәда меркʼими нә.

¹³Әм нә мина Муса нә, чаԝа ԝи хели авитьбу сәр рʼуйе хԝә, ԝәки зарʼед Исраел һʼәта хьлазийе әԝ рʼумәта ԝе дәрбаз буйа нәдитана[8].

¹⁴Бәле әԝ сәԝдайе хԝәда фәʼмәкори бун у һʼәта иро жи гава пәймана кәвьн дьхуньн, хут әԝ хели сәр фәʼме ԝан дьминә. Әԝ һьнге те һьлдане, гава әԝ дьбьнә пʼара Мәсиһ.

¹⁵Бәле һʼәта иро жи, гава Ԛануна Муса дьхуньн, хели сәр фәʼме ԝан дьминә,

¹⁶ле гава йәк ль Хӧдан вәгәрʼә, һьнге «әԝ хели те һьлдане»[9].

¹⁷У әԝ Хӧдан Рʼӧһʼ ә у Рʼӧһʼе Хӧдан ль кʼӧ дәре бә, ль ԝе дәре жи азайи һәйә.

¹⁸Аԝа әм һʼәму жи рʼуки бехеликьри мина нәйньке шәԝԛа рʼумәта Хӧдан вәдьгәрʼиньн[10] у әм бь дәрәщед рʼумәт бь рʼумәте тенә гӧһастьне, дьбьнә хут әԝ сурәте Ԝи, әв йәк бь аликʼарийа Хӧдан ә, кӧ хԝәха Рʼӧһʼ ә.