Read Пәймана Ну (Инщил) Корьнтʼи II 5 Bible Online

Корьнтʼи II 5 - Пәймана Ну (Инщил) bible

Корьнтʼи II 5

¹Чьмки әм заньн, һәгәр ԛальбе мәйи ахин мина коне фьрари хьраб бә, маләкә мәйә һʼәта-һʼәтайе ль әʼзмана һәйә, йа кӧ бе дәст жь Хԝәдеда чекьри йә.

²У бәле әм ви конида дьнәʼльн, һʼәйра ԝе йәкеда нә, кӧ мала хԝәйә әʼзмани ль хԝә ԝәргьрьн,

³ԝәки, гава әм ԝе хԝә ԝәргьрьн, бе сьтʼар кʼьфш нәбьн.

⁴Бәле һʼәта кӧ әм ви конида дьминьн, бьн баре гьранда дьнәʼльн, нә кӧ әм дьхԝазьн ви жь хԝә бехьн, ле йа әʼзмани сәр хԝә ԝәргьрьн, ԝәки йе хԝәйимьрьн ԝе жийинеда бәтавәбә һәрә.

⁵Хԝәде Хԝәха әм ве йәкерʼа һазьр кьрьнә у Рʼӧһʼе Хԝә чаԝа бьһе жь бәр созе Хԝәва да мә.

⁶Аԝа әм һәр гав ве йәкеда әʼсәйи гӧман ьн. Әм заньн һʼәта әм ви ԛальбида дьминьн жь Хӧдан дур ьн,

⁷чьмки әм бь баԝәрийе дьжин, нә кӧ бь дитьна чʼәʼва.

⁸У гӧмана мәйә әʼсәйи һәйә у һе дьхԝазьн жь ви ԛальби дәрен ль щәм Хӧдан бьһеԝьрьн.

⁹Бона ве йәке әм дьщәʼдиньн, кӧ һәгәр әм бьминьн йан дәрен, тʼәне ль Ԝи хԝәш бен.

¹⁰Чьмки гәрәке әм һʼәму жи ль бәр диԝана Мәсиһ бьсәкьньн, ԝәки һәр кәс ԝәкә ԝан әʼмәлед ԛальбе хԝәда кьри бьстинә, чь кӧ кьрьбә, ԛәнщи йан хьраби[13].

¹¹Аԝа әм кӧ һаш жь хофа Хӧдан һәнә, дькьн кӧ мәрьва биньнә рʼайе. У әм Хԝәдева жи әʼйан ьн, гӧман һәйә, кӧ әм исафа ԝәва жи әʼйан ьн.

¹²Нә кӧ әм бәр ԝә диса пәсьне хԝә дьдьн, ле мәщале дьдьнә ԝә, кӧ һун бь мә бьфьрʼьн, ԝәки тьштәки ԝәйи готьне ԝанрʼа һәбә, йед кӧ бь дитьна чʼәʼва дьфьрʼьн, нә кӧ бь йа дьлада.

¹³Һәгәр мә һʼьше хԝә ӧнда кьрийә, әԝ бона Хԝәде йә, ле һәгәр әм сәр һʼьше хԝә нә, әԝ бона ԝә йә.

¹⁴Һʼьзкьрьна Мәсиһә һьндава мәда пʼейи сәр мә дькә, чьмки әм фәʼм дькьн, кӧ йәк бона һʼәмуйа мьрийә, кӧ ӧса йә һʼәму жи мьрьнә.

¹⁵Мәсиһ бона һʼәмуйа мьр, ԝәки әԝед сах бона хԝә сах нибьн, ле бона Ԝи, Йе кӧ бона ԝан мьр у жь мьрьне рʼабу.

¹⁶Чь ль мә дькʼәвә, әм иди ньһа кәсәки бь тьһәре мәрьвайи наньһерʼьн. Рʼаст ә ԝәхтәке мә бь тьһәре мәрьвайи Мәсиһ ньһерʼи, ле ньһа иди әм ӧса наньһерʼьн.

¹⁷Аԝа һәгәр йәк йәктийа Мәсиһда йә, әԝ әʼфьринәки ну йә, тьштед кәвьн дәрбаз бун чун у ва йед ну[14] һатьн.

¹⁸Әв һәр тьшт жь Хԝәдеда нә, кӧ әм бь Мәсиһ тʼәви Хԝә ль һәв анин у ԛӧльхе льһәванине да мә.

¹⁹Аԝа готи Хԝәде бь Мәсиһ дьнйа тʼәви Хԝә ль һәв ани, нәһәԛийед ԝан ԝанрʼа нәһәԛи һʼәсаб нәкьрьн у готьна льһәванине спартә мә.

²⁰Аԝа әм жь алийе Мәсиһда ԛасьдийе дькьн, чаԝа кӧ Хԝәде бь мә һиви жь ԝә дькә: Әм алийе Мәсиһда рʼәща жь ԝә дькьн, тʼәви Хԝәде ль һәв ԝәрьн!

²¹Әԝи кӧ һәләԛәтийа Ԝи тʼәви гӧна тʼӧнәбу, Хԝәде Әԝ бона мә кьрә һәвал-пʼаре гӧна[15], ԝәки әм йәктийа Ԝида бьбьнә һәвал-пʼаред рʼастийа Хԝәде.