Read Пәймана Ну (Инщил) Корьнтʼи II 8 Bible Online

Корьнтʼи II 8 - Пәймана Ну (Инщил) bible

Корьнтʼи II 8

¹Ижар хушк-бьрано, әм ԝе кʼәрәма Хԝәде ԝәва дьдьнә һʼәсандьне, йа кӧ щьвинед Мәкәдонйайерʼа һатийә дайине[23].

²Нава ԝе һесири-бәләнгазийа кӧ пе һатьнә щерʼьбандьне у нава кʼәсибийа хԝәйә гьранда жи, шабуна ԝан һе зедә бу у һе хԝә данә мәрʼданийе.

³Әз шәʼдә мә, кӧ ԝана ԝәкә ԛәԝата хԝә у жь ԛәԝата хԝә зедәтьр жи бь рʼәзәдьли дьдан,

⁴гәләки һиви жи дькьрьн, кӧ әм ԛәдьре ԝан бьгьрьн, бьһельн кӧ әԝ тʼәви ве кʼомәкдайина бона щьмәʼта Хԝәде бьн.

⁵У нә һаԛас чьԛас кӧ гӧмана мә һәбу, ле щанийа хԝә пева пешийе данә Хӧдан у паше мә, бь әʼмьре Хԝәде.

⁶Иди һьнге мә жь Тито һиви кьр, кӧ әԝ ԝи шьхӧле ԛәнщи кӧ нава ԝәда дәстпекьр, хьлаз кә жи.

⁷Чаԝа һун һәр тьштида тʼерә-тʼьжи нә, баԝәрийе, хәбәрдане, занәбуне, тʼәмамийа хирәтеда у ԝе һʼьзкьрьна хԝәйә һьндава мәда, ӧса жи ви шьхӧле ԛәнщда тʼер-тʼьжи бьн.

⁸Әз ве хәбәрданеда әʼмьри сәр ԝә накьм, ле ԝәки һун чʼәʼв бьдьнә хирәта һьнәкед дьн бона кʼомәкдайине, дьхԝазьм ԝә бьщерʼьбиньм, кʼа һун һʼьзкьрьнеда чьԛас ширһʼәлал ьн.

⁹Чьмки һун кʼәрәма Хӧдане мә Иса Мәсиһ заньн: Рʼаст ә Әԝ йәки дәԝләти бу, ле бона ԝә кʼәсиб бу, ԝәки һун бь кʼәсиббуна Ԝи дәԝләти бьн.

¹⁰Әз ве йәкеда фькьра хԝә ԝәрʼа дьбежьм: Әв йәк бона кʼара ԝә йә, чьмки һе сала парва нә кӧ тʼәне ԝә пешийе дәстпекьр ԝе йәке бькьн, ле ӧса жи һун пешийе ԝе йәкерʼа рʼази бун.

¹¹Дә ижар ве кьрьна хԝә биньнә сери, ԝәки рʼәзәдьлийа хԝәда чьԛас хирәт дькьн, һаԛас жи биньнә сери, ԝәкә ԛәԝата хԝә.

¹²Чьмки һәгәр һун бь рʼәзәдьли кʼомәке бьдьн, әԝ ԝәкә ԝе йәке ԛәбул ә, чьԛас дәсте кʼева те, ле нә ԝәкә ԝе йәке, кӧ дестда тʼӧнә.

¹³Әз нә кӧ фьреԛәтийа һьнәка дьхԝазьм у тәнгасийа ԝә, ле ԝәки һәр тьшт ԝәкә һәв бә.

¹⁴Ньһа зедәйа ԝә дькарә кемасийа ԝан тʼьжи кә у рʼожәке жи зедәйа ԝане кемасийа ԝә тʼьжи кә. Бь ви аԝайи ԝе ԝәкә һәв дәре,

¹⁵чаԝа ньвисар ә: «Кʼе гәләк тʼоп кьр, зедә нәбу у кʼе һьндьк тʼоп кьр, кем нәбу»[24].

¹⁶Шькьр жь Хԝәде кӧ әԝ хирәт да Тито жи, кӧ али ԝә бькә.

¹⁷Әԝ нә кӧ тʼәне һивикьрьна мәрʼа рʼази бу, ле хирәта ԝи жи ԛәбул нәкьр, хԝәст бь рʼәзәдьли бе щәм ԝә.

¹⁸Тʼәви ԝи әм ԝи бьрайи дьшиньн, йе кӧ һʼәму щьвинада бона Мьзгинидайине пәсьне ԝи дьдьн

¹⁹у нә кӧ тʼәне һаԛас, ле ӧса жи жь алийе щьвинада һатә бьжартьне, кӧ бьбә һәвале ԝе рʼеԝитийа кӧ әм кʼомәкдайинерʼа ԛӧльх дькьн, бона рʼумәта Хӧдан у ԝәки әм дьлхԝәстьна хԝә жи ве йәкеда бьдьнә кʼьфше.

²⁰Әм һʼәвза хԝә жь ве йәке жи дькьн, кӧ нәбә йәк ви ԛӧльхе мәйи мәрʼддайинеда мә ломәкʼар кә.

²¹Чьмки әм дькьн рʼаст дәрен, нә кӧ тʼәне ль бәр Хӧдан, ле ль бәр мәрьва жи.

²²Әм тʼәви ԝан һәр дӧ бьра, бьраки хԝәйи дьн жи дьшиньн, йе кӧ мә гәләк тьштида әԝ щерʼьбандийә у тʼьме жи хирәткʼеш дитийә у ньһа жи һе хирәткʼеш ә һьндава ԝәда, чьмки әԝ гәләки ԝәда гӧман ә.

²³Һәгәр пьрс бе сәр Тито, әԝ һәвал у хәбаткʼаре тʼәви мьн ә бона ԝә. Ле һәгәр бе сәр ԝан һәр дӧ бьрайед мә, әԝана жь алийе щьвинеда шанди нә, бона рʼумәта Мәсиһ дьхәбьтьн.

²⁴Аԝа һʼьзкьрьна хԝә у әԝ пәсьне кӧ мә бона ԝә дайә, ԝанрʼа бьдьнә избаткьрьне, ԝәки һʼәму щьвин ԝе йәке бьбиньн.