Read Пәймана Ну (Инщил) Галати 2 Bible Online

Галати 2 - Пәймана Ну (Инщил) bible

Галати 2

¹Паше чардәһ сала шунда тʼәви Барнабас диса рʼабумә Оршәлиме, Тито жи мьн тʼәви хԝә бьр[5].

²Әз чум, чьмки Хԝәде бәр мьн вәкьр, кӧ һәрʼьм. У мьн әԝ Мьзгини ль ԝан да һʼәсандьне, йа кӧ әз нава нәщьһуйада даннасин дькьм, ле әв йәк мьн йед сәрәкәрʼа башԛә дьгот. Мьн нәхԝәст кӧ әз бадиһәԝа бьбәзьм йан бәзибьм.

³Ле һʼәта Титойе тʼәви мьн кӧ йунан бу, пʼейи сәр ԝи жи нәкьрьнә, кӧ бе сьнәткьрьне. Әв пьрс пешда һат,

⁴чьмки чәнд бьрайед дәрәԝ шулькинә нава мә, ԝәки щәʼсусийе азайийа мә бькьн, йа кӧ бь сайа Мәсиһ Иса мә дәст анийә. Ԝана дьхԝәст әм бькьрана бьндәст.

⁵Ле мә ԛәт дәԛәке жи гӧрʼа ԝан нәкьр, кӧ рʼастийа Мьзгинийе нава ԝәда һʼимгьрти бьминә.

⁶Ле бона ԝан жи, йед кӧ сәрәкә кʼьфш дьбун, (ԛәт хәма мьн нинә, кӧ әԝ бәре чь бунә, Хԝәде фьрԛийе накә нава мәрьва), ԝан сәрәка жи тʼӧ тьште ну мьнрʼа нәготьн.

⁷Ле сәрбара-сәрда дитьн кӧ ль мьн һатийә спартьне, ԝәки әз Мьзгинийе бьдьмә нәщьһуйа[6], чаԝа кӧ ль Пәтрус жи һатийә спартьне, ԝәки Мьзгинийе бьдә щьһуйа[7].

⁸Чьмки Хԝәдейе кӧ Пәтрус кьрә шандийе щьһуйа, һәма Ԝи жи әз кьрьмә шандийе нәщьһуйа.

⁹Гава Аԛуб, Пәтрус[8] у Йуһʼәннайе кӧ «Стун» дьһатьнә һʼәсабе, бона ԝе кʼәрәма кӧ мьнрʼа һатьбу дайине пе һʼәсийан, дәстед хԝәйә рʼасте чаԝа нишана тʼьфаԛийе данә мьн у Барнабас. Әԝ ԛайл бун, кӧ әм һәрʼьнә нава нәщьһуйа у әԝ жи һәрʼьнә нава щьһуйа.

¹⁰Тʼәне ԝан һиви кьр, кӧ әм бәләнгаза бир нәкьн, йа кӧ әз хԝәха жи дәмана ԝе йәкеда мә.

¹¹Ле гава Пәтрус һатә Әнтакйайе, әз ашкәрә мьԛабьли ԝи рʼабум, чьмки әԝи шаш бу.

¹²Бәри һатьна чәнд мәрьвед кӧ Аԛуб шандьбун, әԝи тʼәви нәщьһуйед баԝәрмәнд нан дьхԝар. Ле гава әԝана һатьн, әԝи хԝә дьда алики у вәдькʼьшийа, жь тьрса әԝед кӧ дьготьн, гәрәке нәщьһу бенә сьнәткьрьне.

¹³У щьһуйед баԝәрмәндә майин жи тʼәви ԝи дӧрʼути кьрьн, һʼәта кӧ Барнабас жи хальфи, кʼәтә нава ԝе дӧрʼутийа ԝан.

¹⁴Ле гава мьн дит кӧ әԝана нава рʼастийа Мьзгинийеда наминьн, һьнге ль бәр һʼәмуйа мьн готә Пәтрус: «Һәгәр тӧ щьһу йи, мина йәки нәщьһу дьжийи у нә мина щьһуйа, тӧ чаԝа дьки сәр нәщьһуйа, кӧ бьбьнә мина щьһуйа?»

¹⁵Әмә кӧ әʼсьле хԝәда щьһу нә у нә жь «нәщьһуйед гӧнәкʼар» ьн,

¹⁶заньн кӧ мәрьв бь кьред Ԛануне нькарә рʼаст бе һʼәсабе, ле тʼәне бь Иса Мәсиһ баԝәркьрьне. Мә жи Мәсиһ Иса баԝәр кьр, ԝәки бь Мәсиһ баԝәркьрьне әм рʼаст бенә һʼәсабе, нә кӧ бь кьред Ԛануне, чьмки тʼӧ ԛул-бәндә бь кьред Ԛануне нькарә рʼаст бе һʼәсабе[9].

¹⁷Аԝа һәгәр әм дькьн бь Мәсиһ рʼаст бенә һʼәсабе у ԝе гаве хӧйа бә, кӧ әм хԝәха жи мина ԝан гӧнәкʼар ьн, һьнге Мәсиһ бу ԝәкʼиле гӧна? Тʼӧ щар!

¹⁸Һәгәр әԝ тьштед мьн хьраб кьрьнә, диса дәстпедькьм чедькьм, әз нәһәԛийа хԝә дьдьмә избаткьрьне.

¹⁹Чьмки әз бь Ԛануни бона Ԛануне мьрьм, ԝәки бона Хԝәде бьжим. Әз тʼәви Мәсиһ хач бум,

²⁰жь вьр шунда нә кӧ әз дьжим, ле Мәсиһ ә кӧ нава мьнда дьжи. У ньһа кӧ әз ви ԛальбида дьжим, бь Кӧрʼе Хԝәде баԝәркьрьне дьжим, Йе кӧ әз һʼьз кьрьм у щанийа Хԝә бона мьн да дәр.

²¹Әз кʼәрәма Хԝәде тʼәхсир накьм, чьмки һәгәр рʼастһʼәсаббун бь Ԛануне буйа, кӧ ӧса йә Мәсиһ бадиһәԝа мьр.