Read Пәймана Ну (Инщил) Галати 3 Bible Online

Галати 3 - Пәймана Ну (Инщил) bible

Галати 3

¹Гәли галатийед беһʼьш! Кʼе сәре ԝә тʼьжи кьр?[10] Нә ахьр Иса Мәсиһ ль бәр чʼәʼве ԝә хачбуйи һатә дийаркьрьне?

²Әз тʼәне ве йәке дьхԝазьм жь ԝә бьзаньбьм: Ԝә Рʼӧһʼе Хԝәде бь Ԛанун ԛәдандьне станд, йан бь Мьзгини бьһистьне у баԝәрийа хԝә же анине?

³Чьма һун һаԛас беһʼьш ьн, кӧ ԝә бь Рʼӧһʼе Хԝәде дәстпекьр у ньһа бь мәрьвайи хьлаз дькьн?

⁴Һаԛас тьшт бадиһәԝа һатьнә сәре ԝә? Наԛәԝьмә кӧ бадиһәԝа бьн!

⁵Чьма әԝ Хԝәдейе кӧ Рʼӧһʼе Хԝә пʼешкʼеши ԝә дькә у нава ԝәда кʼәрәмәта дькә, бона Ԛанун ԛәдандьна ԝә дькә, йан бона кӧ ԝә Мьзгини бьһист у баԝәрийа хԝә же ани?

⁶Мәсәлә, бона Бьраһим аһа ньвисар ә: «Бьраһим Хԝәде баԝәр кьр у әԝ йәк жерʼа рʼасти һатә һʼәсабе»[11].

⁷Аԝа заньбьн, йед кӧ баԝәр дькьн әԝ ьн зарʼед Бьраһим[12].

⁸Ньвисаре һе пешда дабу кʼьфше, кӧ Хԝәде нәщьһу бь баԝәрийе ԝе рʼаст һʼәсаб бькьрана у зува Мьзгини дабу Бьраһим кӧ: «Бь тә дӧайе һʼәму мьләта бьбә»[13].

⁹Аԝа әԝед кӧ баԝәр дькьн, тʼәви Бьраһиме баԝәрмәнд дӧа ль ԝан те кьрьне.

¹⁰Әԝед кӧ хԝә спартьнә кьред Ԛануне, әԝ бьне ньфьрʼеда нә, чьмки ньвисар ә: «Ньфьрʼ ль һәр кәси йә, йе кӧ нава һʼәму ньвисаред кʼьтеба Ԛанунеда наминә у наԛәдинә»[14].

¹¹Әʼйан ә тʼӧ кәс бь Ԛануне нькарә ль бәр Хԝәде рʼаст бе һʼәсабе, чьмки ньвисар ә: «Йе рʼаст ԝе бьжи, чьмки баԝәр дькә»[15].

¹²Ле Ԛанун бь баԝәрийе нинә, ле бәле чаԝа ньвисар дьбежә: «Кʼи кӧ тʼәмийед Ԛануне бьԛәдинә бь ԝан ԝе бьжи»[16].

¹³Мәсиһ әм жь ԝе ньфьрʼа Ԛануне кʼьрʼин, әԝ дәԝса мә кʼәтә бьн ԝе ньфьрʼе, чьмки ньвисар ә: «Ньфьрʼ сәр йе дарва дардакьри йә»[17].

¹⁴Әв йәк бу, ԝәки бь Мәсиһ Иса дӧайе Бьраһим бе сәр нәщьһуйа, кӧ бь баԝәрийе әм Рʼӧһʼе создайи бьстиньн.

¹⁵Хушк-бьрано! Әз тиньмә сәр әʼдәте дьне. Һәгәр йәки ԝәсийәтәк тʼәстиԛ кьрьбә, тʼӧ кәс нькарә ԝе бәтал кә, йан жи тьштәки дьн сәрда зедә кә.

¹⁶Аԝа әԝ соз Бьраһим у зӧрʼәта ԝирʼа һатьнә дайине. Ньвисареда найе готьне: «Зӧрʼәтед тә» чаԝа бона гәләка, ле бона йәки: «Зӧрʼәта тә»[18] у әԝ зӧрʼәт Мәсиһ ә.

¹⁷Аԝа готи әз ве йәке дьбежьм, әԝ ԝәсийәта кӧ пешда жь Хԝәдеда һатьбу тʼәстиԛкьрьне, Ԛануна кӧ чарсьд си сали шунда дәркʼәт, нькарә ӧса бькә, ԝәки ԝәсийәта создайи ԛәԝата хԝә ӧнда кә[19].

¹⁸Чьмки һәгәр ԝарти Ԛанунева гьредайи буйа, ԝе создайинева гьредайи нибуйа, ле Хԝәде бь соз пʼешкʼеши Бьраһим кьр[20].

¹⁹Иди мәрәме Ԛануне чь бу? Ԛанун сәрда зедә бу кӧ нәһәԛи бе наскьрьне у гәрәке әԝ бьма һʼәта һатьна Зӧрʼәта ԝи, кʼижанирʼа соз дабу. Ԛанун жь алийе мьлйакʼәтада, бь дәсте навчетийа йәки[21] һатә дайине[22].

²⁰Бона ԝәсийәткьрьне навчети нә лазьм ә гава ԝәсийәт бь дәсте йәки те кьрьне у ль вьр әԝ йәк тʼәне Хԝәде йә.

²¹Аԝа Ԛанун мьԛабьли созед Хԝәде йә? Тʼӧ щар! Бәле һәгәр ԛанунәк һәбуйа, кӧ бькарьбуйа жийин бьда, һьнге әʼсәйи рʼастһʼәсаббун ԝе бь ԛануне бьбуйа.

²²Ле ньвисар һʼәмуйа бьн һесиртийа гӧнәда дьдә кʼьфше, ԝәки чь кӧ бь Иса Мәсиһ баԝәркьрьне һатьбунә создайине, баԝәрмәндарʼа бенә дайине.

²³Бәри һатьна баԝәрийе, әм бьн дәсте Ԛанунеда чаԝа гьрти дьһатьнә хԝәйикьрьне, һʼәта хӧйабуна ԝе баԝәрийе кӧ ԝе бьһата.

²⁴Бь ви аԝайи Ԛанун бу тʼәрбәтдаре мә у әм бәрбьрʼи Мәсиһ анин[23], кӧ әм бь баԝәрийе рʼаст бенә һʼәсабе.

²⁵Ле ньһа кӧ баԝәри һат, әм иди нә бьн дәсте тʼәрбәтдаре Ԛанунеда нә.

²⁶Бь баԝәрийе һун һʼәму йәктийа Мәсиһ Исада лаԝед Хԝәде нә[24].

²⁷Һун һʼәму кӧ йәктийа Мәсиһда һатьнә ньхӧмандьне, ԝә Мәсиһ сәр хԝә ԝәргьртийә.

²⁸Иди фьрԛи нә нава щьһу у нәщьһуйада һәйә, нә нава хӧлам у азайада, нә жи нава мера у жьнада, чьмки һун һʼәму жи йәк ьн йәктийа Мәсиһ Исада.

²⁹У һәгәр һун пʼара Мәсиһ ьн, ԝәки ӧса йә зӧрʼәта Бьраһим ьн у ԝаред ԝи сози нә[25].