Read Пәймана Ну (Инщил) Әфәси 3 Bible Online

Әфәси 3 - Пәймана Ну (Инщил) bible

Әфәси 3

¹Бона ве йәке әз Паԝлос бона Мәсиһ Иса гьрти мә, бона ԝә нәщьһуйа…

²Гәрәке ԝә бьһистьбә, кӧ әв ԝәкʼилтийа кʼәрәма Хԝәде бона ԝә мьнрʼа һатийә дайине.

³Әв сӧрʼа бь дайинәке ль бәр мьн һатә вәкьрьне. Мьн ль жоре кьн ԝәрʼа ньвиси

⁴у гава һун бьхуньн, һуне бькарьбьн бьзаньбьн кӧ әз чаԝа сӧрʼа Мәсиһ фәʼм дькьм[12].

⁵Әва сӧрʼа дәԝред бьһӧрида ль бәр бәндед дьне вәнәбуйә, чаԝа ньһа бь Рʼӧһʼе Пироз ль бәр шанди у пʼехәмбәред Ԝийә пироз вәбуйә.

⁶Әва сӧрʼа вәбу, ԝәки нәщьһу пе Мьзгинийе тʼәви Исраеле ԝар бьн, бьбьнә бәдәнәк у хԝәйипʼаред созе Ԝи бьн, бь сайа Мәсиһ Иса.

⁷Әз бумә бәрдәстийе ве Мьзгинийе, анәгори дайина жь кʼәрәма Хԝәде, йа кӧ бь кьрьна ԛәԝата Ԝи мьнрʼа һатийә дайине.

⁸Бәле әз кӧ жь нава щьмәʼта Хԝәдеда жь йе һәри бьчʼук кемтьр ьм, ле әв кʼәрәм мьнрʼа һатийә дайине, кӧ нава нәщьһуйада дәԝләмәндтийа Мәсиһә нә ль бәр һʼьша даннасин кьм

⁹у ль бәр һʼәмуйа вәкьм, кӧ чаԝа тʼьвдира сӧрʼа Хԝәде те хәбате, йа кӧ һе дәԝред бәреда щәм Хԝәдейе кӧ һәр тьшт әʼфьрандийә, вәшарти мабу.

¹⁰Мәрәме Хԝәде әв бу, ԝәки ньһа сәрԝахтийа Хԝәйә щурʼә-щурʼә, бь дәсте щьвине ль сәрԝерти у һʼӧкӧмәтед дийаред әʼзманава әʼйан бькә,

¹¹анәгори ԛьрара Ԝийә һе дәԝред бәреда, йа кӧ Ԝи бь дәсте Мәсиһ Иса, Хӧдане мә кьр.

¹²Йәктийа Мәсиһда у пе ԝе баԝәрийа мәйә сәр Ԝи әм дькарьн бь меркʼими у рʼувәкьри незики Хԝәде бьн.

¹³Аԝа әз жь ԝә һиви дькьм, кӧ һун бәр хԝә нәкʼәвьн, бона ԝан щәфайед кӧ әз бона ԝә дькʼьшиньм. Әвана бона рʼумәта ԝә нә.

¹⁴Бона ве йәке әз ль бәр Бав чок дьдьм,

¹⁵жь кʼижани һәр ԛәбиләкә әʼрд у әʼзмана наве хԝә дьстинә.

¹⁶Дә бьра Әԝ ԝәкә дәԝләмәндтийа рʼумәта Хԝә ԛәԝате бь сайа Рʼӧһʼе Хԝә бьдә ԝә, кӧ һун кʼурайийа дьле хԝәда бьшьдьн,

¹⁷бь баԝәрийе Мәсиһ дьле ԝәда бьжи у һун һʼьзкьрьнеда рʼаԝ у рʼькʼьне хԝә бавежьн,

¹⁸кӧ тʼәви тʼәмамийа щьмәʼта Хԝәде бькарьбьн фәʼм бькьн, кӧ бәрайи, дьрежайи, бьльндайи у кʼурайийа һʼьзкьрьна Мәсиһ чь йә.

¹⁹Бәле бьра һун һʼьзкьрьна Мәсиһ нас кьн, йа кӧ жь һәр һʼьш-аԛьли зедәтьр ә, ԝәки һун тʼәмамийа Хԝәдева тʼьжи бьн.

²⁰Аԝа шькьр жь Ԝирʼа бә, Йе кӧ дькарә һәр тьшти һе зедә кә, нә чаԝа әм дьхԝазьн йан дьфькьрьн, бь ԝе ԛәԝата кӧ нава мәда дьхәбьтә,

²¹шькьр жь Ԝирʼа нава щьвинеда, бь сайа Мәсиһ Иса, һʼәму зәманида, һʼәта-һʼәтайе! Амин.