Read Пәймана Ну (Инщил) Әфәси 4 Bible Online

Әфәси 4 - Пәймана Ну (Инщил) bible

Әфәси 4

¹Аԝа әзи гьртийе бона наве Хӧдан, һиви жь ԝә дькьм, кӧ һун ӧса бьжин, чаԝа лайиԛи ԝе газийе йә, кʼижанерʼа һун һатьнә газикьрьне.

²Һун бь тʼәмамийа мьлуктийе у шкәсти, бь сәбьре һʼьзкьрьнеда ль бәр һәв дахьн[13].

³Бьщәʼдиньн, кӧ йәктийа Рʼӧһʼ пе һәвгьредана әʼдьлайийе хԝәй кьн.

⁴Чаԝа бәдән йәк ә у Рʼӧһʼ йәк ә, һун жи гӧманәкерʼа һатьнә газикьрьне.

⁵Хӧдан йәк ә, баԝәри йәк ә, ньхӧмандьн йәк ә,

⁶Хԝәде йәк ә, Әԝ Баве һʼәмуйа йә, кӧ сәр һʼәмуйарʼа йә, бь һʼәмуйа йа Хԝә дькә у нава һʼәмуйада йә.

⁷Бәле жь мә һәр кәсирʼа жи кʼәрәм һатийә дайине, чаԝа Мәсиһ пʼарәвәкьр.

⁸Бона ве йәке те готьне: «Гава һьлкʼьшийа чу жоре, һесир тʼәви Хԝә бьрьн у пʼешкʼеш данә мәрьва»[14].

⁹Әв «һьлкʼьшийа» чь те һʼәсабе? Дьхԝазә бежә, кӧ Әԝ пешда бәржери ԝе дьнйа жерьн бу.

¹⁰Әԝе кӧ бәржер бу, һәма Әԝ ә, Йе кӧ Хԝә да феза һʼәму әʼзмана, ԝәки һәр тьшти һʼьзурийа Хԝәва тʼьжи кә.

¹¹Әва Әԝ бу, Йе кӧ пʼешкʼеш данә мәрьва, кӧ һьнәк бьбьнә шанди, һьнәк пʼехәмбәр, һьнәк мьзгиндар, һьнәк жи сәʼви у дәрсдар.

¹²Әԝи әв йәк кьр, ԝәки щьмәʼта Хԝәде шьхӧлед хьзмәткʼарийерʼа һазьр бә, бона авабуна бәдәна Мәсиһ,

¹³һʼәта кӧ әм һʼәму жи бьгьһижьнә ԝе йәке, кӧ баԝәрийе у Кӧрʼе Хԝәде наскьрьнеда тʼьфаԛ бьн, бьбьнә мәрьвед гьһишти, тʼам ԝәкә бәжьн-бала Мәсиһ.

¹⁴Ԝәки ӧса йә жь вьр шунда әм нәбьнә мина зарʼока кӧ жь пела вьрда-ԝеда дькʼәвьн у бь дәрәԝед мәрьва бәр байе һәр һинкьрьнәке дькʼәвьн, йед кӧ бь фелбазийа дьхапиньн у дьхальфиньн.

¹⁵Ле рʼастийе пе һʼьзкьрьне бежьн[15], һәр алийада бьгьһижьнә сери, кӧ Мәсиһ ә.

¹⁶Жь Ԝи тʼәмамийа бәдәне һәвва нә у һʼәму жи бь аликʼарийа һәр севькәке һәвва гьредайи йә. У гава һәр пʼарәкә бәдәне шьхӧле хԝә дькә, һʼьзкьрьнеда хԝәха дьгьһижә у мәзьн дьбә[16].

¹⁷Аԝа әз ве йәке меркʼими дьбежьм у бь наве Хӧдан тʼәми ль ԝә дькьм, кӧ һун иди тʼӧ щара ԝе рʼеда нәчьн, чаԝа пʼутпʼарьст бь фькьред хԝәйә пʼучʼ дьчьн.

¹⁸Әԝана фәʼмед хԝәда шуна рʼәшва чун у жь жийина Хԝәде дур кʼәтьнә, жь дәст нәзанийа нава хԝә у сәрһʼьшкийа хԝә.

¹⁹Шәрма рʼуйе хԝә ӧнда кьрьнә у ӧса хԝә данә дохине, һʼәта кӧ һәр щурʼә кьрьнед һʼәрам дькьн у тʼер набьн.

²⁰Ле ԝә Мәсиһ ӧса нас нәкьр!

²¹Бәле ԝә бона Ԝи бьһистийә жи у чаԝа йед пʼара Иса, һун ԝе рʼастийа нава Ԝида һин бунә.

²²Дә һун хәйсәте хԝәйи бәре жь хԝә дур хьн, ԝи мәрьве кәвьни кӧ бь һавьжийед һʼьләкʼарва дерьсбуйи йә[17]

²³у бь рʼӧһʼ у фькьред хԝәда нуйәжийин бьн,

²⁴мәрьве ну ль сәр хԝә ԝәргьрьн, кӧ кьрасе Хԝәдеда бь һәԛи у һʼәлалийа бе ԛәлпи хӧльԛи йә[18].

²⁵Аԝа дәрәԝа жь хԝә дур хьн, жь ԝә һәр йәк һәвале хԝәрʼа рʼаст хәбәр дә[19], чьмки әм бь һәврʼа әндәмед Бәдәна Мәсиһ нә.

²⁶Һәгәр һун һерс кʼәвьн, гӧна нәкьн[20], бьра рʼо сәр һерса ԝәрʼа нәчә ава

²⁷у щи нәдьнә мирещьн.

²⁸Әԝе кӧ дьзийе дькә, бьра иди нәдьзә, ле бь худана хԝәйә һʼәлал бь дәстед хԝә бьхәбьтә, кӧ бькарьбә дәст бавежә кʼәтийа жи.

²⁹Бьра жь дәве ԝә ԛәт хәбәрәкә хьраб дәрнәйе, пештьри тьштед кӧ кери гӧһдара тен у кʼаре дьдьнә ԝан.

³⁰У Рʼӧһʼе Хԝәдейи Пироз нәешиньн, бь Кʼижани һун бона Рʼожа Азайийе һатьнә моркьрьне.

³¹Дә бьра һәр тәʼлайи, һерс, бәрзәԛи, ԛарʼә-ԛарʼ у готьнед нәрʼеда жь ԝә дур бьн тʼәви һәр щурʼә кʼин-бохийева.

³²У һәврʼа ширьн у дьлшәԝат бьн, ль һәв бьбахшиньн, чаԝа Хԝәде бь Мәсиһ бахшандә ԝә.