Read Пәймана Ну (Инщил) Филипи 1 Bible Online

Филипи 1 - Пәймана Ну (Инщил) bible

Филипи 1

¹Жь Паԝлос у Тимотʼейойе хӧламед Мәсиһ Иса, тʼәмамийа щьмәʼта Хԝәдерʼа, йед кӧ пʼара Мәсиһ Иса нә у ль алийед Филипйайе дьминьн, тʼәвайийа бәрпьрсийар у бәрдәстийед щьвинева:

²Дә бьра кʼәрәм у әʼдьлайийа Хԝәдейе Баве мә у Хӧдан Иса Мәсиһ ль ԝә бә.

³Әз шькьрийа хԝә Хԝәдейе хԝә тиньм гава һәр гав ԝә бир тиньм,

⁴тʼьме нава һʼәму дӧайед хԝәда, бона ԝә һʼәмуйа бь дьле ша дӧа дькьм,

⁵чьмки һун рʼожа пешьнда һʼәта иро тʼәви шьхӧле Мьзгинидайине бунә.

⁶У әз ве йәкеда гӧман ьм, Әԝе кӧ дьле ԝәда дәст бь шьхӧле Хԝәйи ԛәнщ кьрийә, ԝе һʼәта Рʼожа һатьна Мәсиһ Иса жи бьгьһинә сери.

⁷Һун дьле мьнда нә у һәԛ ә жи кӧ әз бона ԝә һʼәмуйа аһа бьфькьрьм. Чьмки һун һʼәму жи тʼәви ԝе кʼәрәме бунә, йа кӧ жь Хԝәдеда мьнрʼа һатийә дайине, чаԝа әз ньһа ԛәйдада мә, ӧса жи бона Мьзгинийе сәкьни бум у мьн әԝ дьда маккьрьне.

⁸Хԝәде шәʼде мьн ә, кӧ әз бь һʼӧба Мәсиһ Иса чьԛаси һʼәйра ԝә һʼәмуйада мә.

⁹У әз ве дӧайе дькьм, кӧ һʼьзкьрьна ԝә һе-һе бь занәбун у сәрԝахтийа гьһиштива зедә бә,

¹⁰ԝәки кʼижан һәрә ԛәнщ ә, һун ԝе бьбьжерьн. Һьнге һуне Рʼожа һатьна Мәсиһда ширһʼәлал у беләкʼә бьн

¹¹у бь сайа Иса Мәсиһ бь бәред һәԛийева тʼьжибуйи бьн, бона рʼумәт у пәсьне Хԝәде.

¹²Әз дьхԝазьм кӧ һун бьзаньбьн хушк-бьрано, ԝәки чь кӧ һатә сәре мьн, әԝе һе кʼар да пешдачуйина Мьзгинийе.

¹³Аԝа тʼәвайийа кʼома кʼочʼьксәрева, ӧса жи һʼәмуйед майинва әʼйан ә кӧ әз бона наве Мәсиһ нава ван ԛәйдада мә.

¹⁴У дьле пʼьрʼанийа баԝәрмәнда жи бь ван ԛәйдед мьн йәктийа Хӧданда шьдийан, кӧ һе бь меркʼими хәбәра Хԝәде бе хоф у тьрс бежьн.

¹⁵Рʼаст ә һьнәк жь һʼәвсудийе у мьхәнәтийе Мәсиһ даннасин дькьн, ле һьнәк жи жь нета ԛәнщийе.

¹⁶Әвана жь һʼьзкьрьне даннасин дькьн, чьмки әԝ заньн кӧ әз сәр ви ԛӧльхи һатьмә данине, кӧ пьштгьрийе Мьзгинийе бькьм.

¹⁷Ле йед майин бона һәврʼькʼийе Мәсиһ даннасин дькьн, нә бь дьле рʼаст. Әԝ дьфькьрьн, кӧ тәнгасийе сәр ԛәйдед мьнда зедә кьн.

¹⁸Ле фьрԛи тʼӧнә! Чаԝа жи бьбә, һәгәр әԝана бь ԛәлпийе йан бь рʼастийе Мәсиһ даннасин дькьн, әз бь ве йәке ша мә. Бәле әзе ша бьм жи,

¹⁹чьмки әз заньм кӧ әв йәк ԝе ахьрийе ль бәр азабуна мьн кʼәвә, бь дӧайед ԝә у аликʼарийа Рʼӧһʼе Иса Мәсиһ.

²⁰Әз гӧман у чʼәʼвньһерʼийа ве йәке мә, кӧ тʼӧ тьштива әзе шәрми нәминьм, ле бәле һе меркʼими бьм, чаԝа һәр гав ӧса жи ньһа пәсьне Мәсиһ бь ԛальбе мьн бе дайине, һәгәр бь мьрьна мьн бә, йан жи бь жийина мьн бә.

²¹Чьмки бона мьн жийин Мәсиһ ә у мьрьн жи кʼар ә.

²²Һәгәр жийина ви ԛальбида һе кʼаре дьдә шьхӧле мьн, әз ньзаньм кʼижани бьбьжерьм.

²³Кʼәтьмә нава дӧ кәвьра: Әз һʼьзрәт ьм кӧ жь ви ԛальби дәрем, һәрʼьмә щәм Мәсиһ, мьнрʼа әва һе гәләки ԛәнщ ә,

²⁴ле майина мьнә ви ԛальбида һе бона кʼара ԝә йә.

²⁵Әз ве йәке кӧ бе шьк баԝәр дькьм, ләма жи заньм кӧ әзе бьминьм, тʼәви ԝә һʼәмуйа бьм, ԝәки һун һе пешда һәрʼьн у баԝәрийеда ша бьн.

²⁶Аԝа гава әз диса бемә щәм ԝә, һун пе мьн бь сайа Мәсиһ Иса һе фьрʼнаԛ бьн.

²⁷Ле тʼәне чаԝа лайиԛи Мьзгинийа Мәсиһ ә, һун хԝә ӧса хԝәй кьн, кӧ һәгәр сәр ԝәда бем у ԝә бьбиньм йан дурва бьбьһем бьзаньбьм кӧ ԝә бь рʼӧһʼ у дьләки пьшт дайә пьшта һәв, бона шәрʼкʼарийа баԝәрийа Мьзгинийе сәкьни нә.

²⁸Тʼӧ алийава жь пәйкʼәтийед хԝә вәнәкʼьшьн. Әв йәк нишанәкә ӧндабуна ԝан у хьлазбуна ԝә йә у әв жи жь Хԝәде йә.

²⁹Әва кʼәрәма Хԝәде бона хатьре Мәсиһ дайә ԝә, ԝәки нә кӧ тʼәне һун баԝәрийа хԝә Ԝи биньн, ле бона Ԝи щәфе жи бькʼьшиньн.

³⁰Ньһа жи һун нава ԝи шәрʼида нә, кʼижан кӧ ԝә сәр мьн дит у ньһа бона мьн дьбьһен[1].