Read Пәймана Ну (Инщил) Колоси 3 Bible Online

Колоси 3 - Пәймана Ну (Инщил) bible

Колоси 3

¹Аԝа кӧ һун тʼәви Мәсиһ жь мьрьне рʼабунә, кӧ ӧса йә ль тьштед жорьн бьгәрʼьн, ԝе дәра кʼӧ Мәсиһ ль мьле Хԝәдейи рʼасте рʼуньшти йә[18].

²Сәр тьштед жорьн бьфькьрьн, нә кӧ сәр тьштед ве дьнйайе.

³Чьмки һун мьрьнә у әʼмьре ԝә тʼәви Мәсиһ щәм Хԝәде вәшарти йә.

⁴Гава Мәсиһ, кӧ әʼмьре ԝә йә хӧйа бә, һуне жи һьнге тʼәви Ԝи бь рʼумәта Ԝи хӧйа бьн.

⁵Аԝа хԝәстьнед дьле хԝәйә ве дьне бькӧжьн: Бенамусийе, һʼәрамийе, тәме хьраб, дьлһавьжийа хьраб у тьмайе, кӧ пʼутпʼарьсти йә.

⁶Әв ьн сәбәб кӧ хәзәба Хԝәде ԝе сәр ԝан мәрьвед кӧ нә гӧрʼа Ԝида нә бе.

⁷Ԝә жи ԝәхтәке әԝ тьшт дькьрьн, гава ԝә нава ԝан кьред хьрабда дьжит.

⁸Ле ньһа һун ван һʼәмуйа жь хԝә дур хьн: Һерсе, бәрзәԛийе, хьрабийе, тьштед нәбуйи у хәбәред нәщайиз жь дәве хԝә.

⁹Һәвдӧрʼа дәрәԝа нәкьн, чьмки ԝә мәрьве кәвьн кьред ԝива жь сәр хԝә ехьстийә[19]

¹⁰у әԝи ну ль хԝә кьрийә. Әԝ мәрьве ну рʼож бь рʼож анәгори сурәте Әʼфьрандаре хԝә те нукьрьне, ԝәки Хԝәде тʼам нас кә[20].

¹¹Иди фьрԛи нә нава щьһу у нәщьһуйада[21] һәйә, нә нава сьнәткьри у нәсьнәткьрийада, нә барбар у бәйанийада[22] у нә жи хӧлам у азайада, ле сәри Мәсиһ ә у Мәсиһ ә нава һәр баԝәрмәндида.

¹²Аԝа чаԝа щьмәʼта Хԝәдейә бьжартийә пироз у һʼьзкьри, дьлшәԝатийе, ԛәнщийе, мьлуктийе, бәрбьһерийе у сәбьре ль хԝә ԝәргьрьн[23].

¹³Ль һәв сәбьр кьн у ль һәв бьбахшиньн, һәгәр газьне йәки ль һьндава йәкида һәбә. Чаԝа Хӧдан[24] бахшандә ԝә, һун жи ӧса бьбахшиньнә һәв[25].

¹⁴У сәр ван һʼәмуйада һʼьзкьрьне ль хԝә кьн, йа кӧ ван һʼәмуйа бь йәктийа тʼам һәвва гьредьдә.

¹⁵Бьра әʼдьлайийа Мәсиһ сәрԝертийе нет-фькьред ԝә бькә. Бона ԝе әʼдьлайийе һун һатьнә газикьрьне, кӧ бьбьнә мина бәдәнәке. У шекьрдар бьн.

¹⁶Бьра хәбәра Мәсиһ бь дәԝләмәндтийа хԝәва нава ԝәда бьминә. Бь һʼәму сәрԝахтийе ль һәв һин кьн у ширәт кьн, зәбура у һәр щурʼә стьранед рʼӧһʼани бь шькьрдари дьле хԝәда бона Хԝәде бьстьрен[26].

¹⁷У чь жи кӧ һун бь хәбәра йан кьра бькьн, һәр тьшти бь сайа наве Хӧдан Иса бькьн, бь дәсте Ԝи шькьрийе бьдьнә Бав Хԝәде.

¹⁸Кʼӧлфәтно, гӧрʼа меред хԝәда бьн, чаԝа кӧ ль йәктийа Хӧдан дькʼәвә[27].

¹⁹Мерно, кʼӧлфәтед хԝә һʼьз бькьн, дьле ԝан нәешиньн[28].

²⁰Зарʼно, һәр тьштида гӧрʼа де у баве хԝәда бьн, чьмки әԝ йәк ль Хӧдан хԝәш те[29].

²¹Бавно, һерса зарʼед хԝә рʼанәкьн, ԝәки әԝ бәр хԝә нәкʼәвьн[30].

²²Хӧламно, һәр тьштида гӧрʼа хԝәйийед хԝәйә ве дьнеда бьн, нә кӧ бь һʼьләкʼарийе хԝә бькьнә дьле мәрьва кӧ бенә кʼьфше, ле бь дьле сах у хофа Хӧдан хӧламтийе бькьн[31].

²³У чь жи бькьн, бь дьл у щан бькьн, чаԝа бона Хӧдан, нә кӧ бона мәрьва.

²⁴Заньбьн кӧ һуне жь Хӧдан бенә хәлаткьрьне, ԝаре жорьн бьстиньн. Чьмки Хӧдан Мәсиһрʼа һун хӧламтийе дькьн.

²⁵Ле йе нәһәԛ ԝе ԝәкә нәһәԛийа хԝә бьстинә, чьмки ль щәм Хԝәде тʼӧ фьрԛи тʼӧнә[32].