Read Пәймана Ну (Инщил) Колоси 4 Bible Online

Колоси 4 - Пәймана Ну (Инщил) bible

Колоси 4

¹Хԝәйино, хӧламед хԝәрʼа һәԛийе у рʼастийе бькьн. Бьзаньбьн кӧ Хԝәйе ԝә жи ль әʼзмен һәйә[33].

²Һәр гав хԝә бьдьнә дӧа, дӧакьрьнеда һʼьшйар бьминьн, шькьрийа хԝә ль Хԝәде биньн.

³Бона мә жи дӧа бькьн, ԝәки Хԝәде дәри бона хәбәрдане ль бәр мә вәкә, кӧ әм сӧрʼа Мәсиһ әʼлам кьн, бона кʼижане жи әз ван ԛәйдада мә.

⁴Дӧа бькьн, кӧ әз ԝе ӧса зәлал бьдьмә әʼйанкьрьне, чаԝа борще мьн әԝ гәрәке бе готьне.

⁵Һьндава нәбаԝәрада сәрԝахт бьн у дәст бьдьнә бәр ԝәхт[34].

⁶Бьра хәбәрдана ԝә тʼьме мәʼрифәти у хԝекьри бә у бьзаньбьн кӧ чаԝа щайиз ә щаба һәр кәси бьдьн.

⁷Бона мьн Тьхико ԝе һәр тьшти ԝәрʼа бежә. Әԝ бьраки дәлал ә, бәрдәстики амьн у һәвал-хӧламәки йәктийа Хӧданда йә.

⁸Әз бона ԝе йәке ԝи сәр ԝәда дьшиньм, ԝәки һун һаш жь мә һәбьн у әԝ бь ве йәке дьл бьдә ԝә.

⁹Әз ԝи тʼәви бьрайе мәйи амьни дәлал Онисимо дьшиньм, кӧ әԝ жь ԝә йә жи. Әԝана ԝәрʼа ԝе бона һәр тьштед кӧ ль вьр дьԛәԝьмьн бежьн[35].

¹⁰Әристархойе һәвале мьни кәледа ль ԝә сьлав дькә, ӧса жи Марԛосе пьсмаме Барнабас. (Бона ԝи ԝә тʼәми стандийә. Гава бе щәм ԝә, ԝи ԛәбул кьн.)

¹¹У Исайе кӧ жерʼа Йусто жи дьбежьн ль ԝә сьлав дькә. Әвана тʼәне жь алийе баԝәрмәндед щьһуйада бона Пʼадшатийа Хԝәде тʼәви шьхӧле мьн ьн у бина мьн бь ԝан дәркʼәтийә.

¹²Сьлаве Епафрасе хӧламе Мәсиһ Иса жи ль ԝә һәнә, кӧ әԝ йәк жь ԝә йә. Әԝ һәр гав бь дьл у щан бона ԝә дӧа дькә, ԝәки һун гьһишти мьԛәрʼм сәкьни бьн, тʼәмамийа әʼмьре Хԝәдеда баԝәр бьн.

¹³Әз шәʼдә мә, кӧ әԝ гәләки бона ԝә, ӧса жи бона йед Лаԝдькйайе у Һираполиседа хирәт дькә.

¹⁴Луԛайе дохторе дәлал ль ԝә сьлав дькә, ӧса жи Димас.

¹⁵Сьлаве бьдьнә хушк-бьрайед Лаԝдькйайе[36], Нимфаса хушк у щьвина мала ԝеда[37].

¹⁶Гава әва нәʼма нава ԝәда бе хԝәндьне, ӧса бькьн кӧ щьвина Лаԝдькйайеда жи бе хԝәндьне у нәʼма лаԝдькийарʼа шанди жи һун бьхуньн.

¹⁷У бежьнә Архипо: «Бона ԝи ԛӧльхе кӧ тә жь Хӧдан стандийә, мьԛати хԝә би, кӧ бини сери»[38].

¹⁸Әва сьлава мьн Паԝлос ә, мьн бь дәсте хԝә ньвиси. Ԛәйдед мьн бир нәкьн! Кʼәрәма Хԝәде ԝәрʼа бә.