Read Пәймана Ну (Инщил) Тʼесалоники I 2 Bible Online

Тʼесалоники I 2 - Пәймана Ну (Инщил) bible

Тʼесалоники I 2

¹Һун хԝәха жи заньн хушк-бьрано, кӧ әм бадиһәԝа нәһатьнә щәм ԝә.

²Мә пешийе Филипйайеда щәфа кʼьшандьбу у һатьбунә рʼәзилкьрьне, чаԝа һун заньн, паше мә бь ԛәԝата Хԝәдейе хԝә диса тӧрӧш кьр, нава ԝе мьԛабьлийа гьранда Мьзгинийа Хԝәде ԝәрʼа бежьн[4].

³Ве һивикьрьна мәда нә тьштәки хельф һәйә, нә һʼәрами у нә жи фелбази.

⁴Ле чаԝа Хԝәде әм лайиԛи ве йәке кьрьн у Мьзгинидайин спартә мә, әм ӧса хәбәр дьдьн. Әм ӧса накьн кӧ ль мәрьва хԝәш бен, ле ль Хԝәде, Йе кӧ дьле мә әʼнәнә дькә.

⁵Мә готьнед хԝәда һʼьләкʼари нәкьрьн, чаԝа һун заньн, нә жи пәй тьмайа тʼәркәльпаскьри[5] кʼәтьн. Хԝәде шәʼдә йә!

⁶Нә жи әм наве хԝә гәрʼийан, нә нава ԝәда, нә нава йед майинда,

⁷бәле мә дькарьбу чаԝа шандийед Мәсиһ сәр ԝә бьбуна баргьрани. Ле бәле әм нава ԝәда рʼунәрм бунә, чаԝа кәваник кӧ зарʼед хԝәрʼа дьрʼьщьфә.

⁸Ӧса жи дьле мә сәр ԝә дьшәԝьти, һʼәта кӧ мә дьхԝәст нә кӧ тʼәне Мьзгинийа Хԝәде бьда ԝә, ле әʼмьре хԝә жи, чьмки һун бьбунә дәлалийед мә.

⁹Әԝ хәбат у щәфе мә те бира ԝә хушк-бьрано? Әм шәв у рʼож дьхәбьтин, кӧ сәр ԝә тʼӧ кәси нәбьнә баргьрани, гава мә Мьзгинийа Хԝәде ԝәрʼа даннасин кьр.

¹⁰Һун хԝәха шәʼдә нә, ӧса жи Хԝәде, кӧ әм тʼәви ԝә баԝәрмәнда чаԝа һʼәлал, рʼаст у беԛӧсур рʼабун-рʼуньштьн.

¹¹Һун пʼак заньн әм һьндава ԝә һәр кәсида ӧса бунә, чаԝа бав һьндава зарʼед хԝәда.

¹²Мә дьл дьда ԝә, ль бәр дьле ԝәда дьһатьн у лава жь ԝә дькьр, кӧ һун лайиԛи Ԝи Хԝәдейи бьмәшьн, Йе кӧ һун гази Пʼадшати у рʼумәта Хԝә кьрьнә.

¹³У бона ве йәке жи әм һәр гав рʼазибуне дьдьнә Хԝәде: Гава ԝә жь мә хәбәра Хԝәде бьһист, ԝә нә кӧ чаԝа хәбәра мәрьвайе, ле чаԝа хәбәра Хԝәде ԛәбул кьр, рʼаст жи ӧса йә, кӧ нава ԝә баԝәрмәндада Йа хԝә дькә.

¹⁴Чьмки һун жи хушк-бьрано, кʼәтьнә һʼале ԝан щьвинед Хԝәдейә пʼара Мәсиһ Иса, кӧ ль Щьһустане нә, ԝә жи хут әԝ щәфа дәсте мьләте хԝәда кʼьшандьн, чаԝа ԝан жи дәсте ԝан щьһуйада[6],

¹⁵йед кӧ һьн Хӧдан Иса, һьн жи пʼехәмбәр кӧштьн у әм жи зерандьн. Әвана ль Хԝәде хԝәш найен у мьԛабьли дьне-әʼламе нә!

¹⁶Вана дькьр, ԝәки әм нәщьһуйарʼа хәбәр нәдьн, кӧ әԝ хьлаз бьн. Бь ве йәке һәр гав кʼаса хԝәйә гӧна дадьгьртьн у һәйнәсәр хәзәб анинә сәре хԝә.

¹⁷Ле әм хушк-бьрано, рʼаст ә дәмәкә кьн рʼу бь рʼу жь һәв хәриб кʼәтьн, (ле нә бь дьла), әм һе кʼәтьнә дәмана дитьна рʼуйе ԝә.

¹⁸Мә хԝәст әм бьһатана щәм ԝә, мьн Паԝлос хԝәха жи хԝәст чәнд щара бем, ле мирещьн рʼе нәда мә.

¹⁹Бәле кʼи йә гӧмана мә, йан жи шабун, йан әԝ кʼофийа әм пе дьфьрʼьн, бәр Хӧдане мә Иса, ԝи зәмане һатьна Ԝида, һәгәр нә һун?

²⁰Рʼаст һун ьн әԝ рʼуспити у шабуна мә.