Read Пәймана Ну (Инщил) Тимотʼейо I 1 Bible Online

Тимотʼейо I 1 - Пәймана Ну (Инщил) bible

Тимотʼейо I 1

¹Жь Паԝлос, шандийе Мәсиһ Иса, бь әʼмьре Хԝәдейе Хьлазкьре мә у Мәсиһ Исайе гӧмана мә,

²Тимотʼейойе лаԝе хԝәйи баԝәрийедайи һәԛ-һʼәлалрʼа: Дә бьра рʼәʼм, кʼәрәм у әʼдьлайи жь Бав Хԝәде у Мәсиһ Исайе Хӧдане мә ль тә бә.

³Гава әз дьчумә Мәкәдонйайе, мьн һиви жь тә кьр, кӧ ль Әфәсе бьмини, ԝәки тʼәмийе бьди чәнд кәса, кӧ һинкьрьна нәрʼаст һин нәкьн

⁴у гӧһ нәдьнә чʼьловискийа у рʼәԛәма сьлсьләта кӧ хьлазийа ԝан тʼӧнә. Әв йәк һе шәрʼ-дәʼԝа тʼәврʼадькә, нә кӧ тʼьвдира[1] Хԝәдейә кӧ бь баԝәрийе те наскьрьне[2] мийасәр дькә.

⁵Сәре тʼәмийе һʼьзкьрьн ә, кӧ жь дьле сах, бь исафа рʼьһʼәт у жь баԝәрийа бедӧрʼути йә.

⁶Һьнәк же дагәрʼийан у пәй готьнед пʼучʼ кʼәтьн.

⁷Дьхԝазьн бьбьнә дәрсдаред Ԛануне, ле әԝ хԝәха жи ньзаньн чь дьбежьн, нә жи ԝан тьштед кӧ дьдьнә зора хԝә фәʼм дькьн.

⁸Әм заньн кӧ Ԛанун ԛәнщ ә, һәгәр йәк бь ԛануни ԝе бьԛәдинә.

⁹Бәле фәʼмдари йә, кӧ ԛанун бона рʼаста найе дайине, ле бона нәһәԛ у сәрһʼьшка, бона нәпʼак у гӧнәкʼара, бона мьрʼдарʼ у һʼәрама, бона бавкӧж у декӧжа, бона меркӧжа,

¹⁰бенамуса, кʼона, дьзед мәрийа, дәрәԝин у шәʼдәдәрәԝа йә у бона һәр кәсед дьнә кӧ тьштед мьԛабьли һинкьрьна сахләм дькьн.

¹¹Әв һинкьрьн ль Мьзгинийа хԝәйирʼумәтә Хԝәдейе һежайи шькьрийе дьгьрә, кʼижан ль мьн һатийә спартьне.

¹²Әз жь Мәсиһ Исайе Хӧдане мә рʼази мә, Йе кӧ ԛәԝат да мьн, әз амьн һʼәсаб кьрьм, данимә сәр ве хьзмәткʼарийе.

¹³Мьн жи бәре Әԝ беһӧрмәт дькьр, дьзеранд у нәйарти ль Ԝи дькьр, ле рʼәʼм ль мьн бу, чьмки мьн нәбаԝәрийеда бь нәзанийа хԝә кьрьн[3].

¹⁴Кʼәрәма Хӧдане мә пʼьрʼ сәр мьнда рʼьжийа, тʼәви баԝәри у һʼьзкьрьна Мәсиһ Иса.

¹⁵Ве готьнеда хельф тʼӧнә у лап һежайи ԛәбулкьрьне йә, кӧ: «Мәсиһ Иса һатә дьне, гӧнәкʼара хьлаз бькә», сәре кʼижана әз ьм.

¹⁶Ле бона ԝе йәке рʼәʼм ль мьн бу, ԝәки Мәсиһ Иса сәр мьн, чаԝа сәре гӧнәкʼара тʼәмамийа сәбьра Хԝә бьдә кʼьфше, чаԝа нәхшәк бона ԝан, йед кӧ ԝе баԝәрийа хԝә Ԝи биньн, жийина һʼәта-һʼәтайе бьстиньн.

¹⁷Аԝа бьра ԝи Пʼадшайе һʼәта-һʼәтайейи нәмьри у нәхӧйа, Хԝәдейе бешьрики-беһәвалрʼа һӧрмәт у рʼумәт бә һʼәта-һʼәтайе! Амин.

¹⁸Ве тʼәмийе әз дьдьмә тә, лаԝе мьн Тимотʼейо, ль гора ԝан пʼехәмбәртийед кӧ пешда бона тә бун, ԝәки тӧ бь ԝан шәрʼе хԝәйи ԛәнщ бьки,

¹⁹дәст жь баԝәрийе нәкә у исафа хԝә рʼьһʼәт хԝәй кә. Һьнәка әв йәк жь хԝә дур хьстьнә, дәԝра баԝәрийа хԝә ԝәлгәрʼандьн.

²⁰Жь ԝан бун, Һумәнайо у Скәндәр, йед кӧ мьн данә дәсте мирещьн, ԝәки әԝ һин бьн рʼастийа Хԝәде беһӧрмәт нәкьн.