Read Пәймана Ну (Инщил) Тимотʼейо I 4 Bible Online

Тимотʼейо I 4 - Пәймана Ну (Инщил) bible

Тимотʼейо I 4

¹Рʼӧһʼ ашкәрә дьбежә, кӧ рʼожед ахьрийеда һьнәк ԝе жь баԝәрийе бькʼәвьн, гӧһ бьдьнә рʼӧһʼед дәрәԝин у һинкьрьнед щьна.

²Әԝ һинкьрьн бь дӧрʼутийа дәрәԝина дьбьн, исафа кʼижана кʼьзьри йә.

³Әԝ мәрьв һʼал-зәԝаще дьдьнә һьлдане, жь ԝан хԝарьна пашда дьдьнә гьртьне, кʼижан Хԝәде әԝ бона баԝәрмәнд у рʼастинаскьрийа әʼфьрандьнә, кӧ бь рʼазибуне бьхԝьн.

⁴Һәр тьште кӧ Хԝәде әʼфьрандийә ԛәнщ ә у тьштәки һʼәрам теда тʼӧнә, һәгәр бь рʼазибун те ԛәбулкьрьне,

⁵чьмки бь хәбәра Хԝәде у дӧа ԛәбул дьбә.

⁶Һәгәр тӧ ван ширәта бьди хушк-бьра, те бьби ԛӧльхкʼаре Мәсиһ Исайи ԛәнщ, чаԝа тӧ хԝәха жи бь ԝан готьнед баԝәрийе у һинбуна ԛәнщә кӧ тӧ пәй чуйи, ԛьнйат дьби.

⁷Хԝә жь чʼьловискийед пирайә һʼәрам дур хԝәй кә. Хԝә хԝәденасийеда һиндар кә.

⁸Һиндарийа ԛальб кери һьндьк тьшти те, ле йа хԝәденасийе кери һәр тьшти те, созе ԝе һьн ль ве дьне һәйә, һьн жи ль ԝе дьне.

⁹Ве готьнеда хельф тʼӧнә у лап һежайи ԛәбулкьрьне йә.

¹⁰Бона ве йәке әм дьхәбьтьн у дьчәрчьрьн, чьмки әм гӧмана хԝә ль Хԝәдейе сах тиньн, кӧ Хьлазкьре һʼәму мәрьва йә, илаһи Йе баԝәрмәнда.

¹¹Тʼәмийа ван тьшта бьдә у һин кә.

¹²Нәбә кӧ йәк щаһьлтийа тә беһӧрмәт кә, ле тӧ баԝәрмәндарʼа бьбә нәхшәк, хәбәрданеда, рʼабун-рʼуньштьнеда, һʼьзкьрьнеда, баԝәрийе у һʼәлалийеда.

¹³Һʼәта һатьна мьн хԝә бьдә ԝе йәке, кӧ щьмәʼтерʼа ньвисаред пироз бьхуни, ширәт ки, һин ки.

¹⁴Һьндава ԝе пʼешкʼеша хԝәйә рʼӧһʼанида бе хәм нибә, йа кӧ бь пʼехәмбәртийе тәрʼа һатийә дайине, гава бәрпьрсийара дәсте хԝә данинә сәр тә.

¹⁵Гӧһе тә сәр ԝан тьшта бә у нава ԝанда бьминә, ԝәки пешдачуйина тә һʼәмуйава әʼйан бә.

¹⁶Һаш жь хԝә у һинкьрьна хԝә һәбә. Һәр гав нава ԝанда бьминә, чьмки бь ви тьһәри те хԝә жи хьлаз ки у ԝан жи, кʼижанед гӧһдарийа тә дькьн.